ઈરાનના દક્ષિણ ભાગમાં એક ભયંકર બસ અકસ્માતની ઘટના બની છે. અહીં બસ પલટી જવાને કારણે 21 લોકોના મોત થયા છે. મળતી માહિતી પ્રમાણે શનિવારે આ સમાચાર જાહેર કરવામાં આવ્યા હતા. ફાર્સ વિસ્તારના આપત્તિ સંગઠનના પ્રમુખે જણાવ્યું કે પ્રાંતની રાજધાની શિરાજના દક્ષિણમાં બનેલી આ દુર્ઘટનામાં 34 લોકો ઘાયલ થયા છે.
આબેદે જણાવ્યું હતું કે બચાવ અભિયાન શરૂ કરી દેવાયું છે. તેમણે જણાવ્યું હતું કે આ અભિયાન અને તપાસ પુરી થયા બાદ જ ચોક્ક્સ આંકડાઓ જાહેર કરી શકાશે. અધિકારીએ જણાવ્યું હતું કે આ ઘટના સવારે 11 વાગ્યાને 5 મિનિટે બની હતી અને બચાવદળ તરત જ ઘટના સ્થળ પર પહોંચી ગયું હતું. તેમણે જણાવ્યું હતું કે અકસ્માતના કારણોની તપાસ કરવામાં આવી રહી છે.
