થાઇલેન્ડની રાજધાની બેંગકોકથી ઉત્તરમાં આવેલા પ્રાંતમાં આવેલી એક પ્રખ્યાત શાળામાં ગોળીબારની અત્યંત હૃદયદ્રાવક ઘટના બની છે. શુક્રવાર, 7 ઓગસ્ટના રોજ બનેલી આ ઘટનાએ સમગ્ર દેશને હચમચાવી દીધો છે. સ્થાનિક મીડિયા અહેવાલો પ્રમાણે 19 વર્ષથી ઓછી વયના એક યુવકે શાળાના પરિસરમાં અંધાધૂંધ ગોળીબાર કર્યો હતો. આ હુમલામાં એક શિક્ષકનું કરુણ મૃત્યુ થયું છે, જ્યારે 15 જેટલા અન્ય લોકો ઘાયલ થયા છે. હુમલો કર્યા બાદ શૂટરે પોતે પણ આપઘાત કરી લીધો હોવાની પુષ્ટિ થઈ છે. 

શાળામાં યુવકે કર્યુ અંધાધૂંધ ફાયરિંગ

મળતી માહિતી પ્રમાણે આ ઘટના થાઇલેન્ડના બેંગકોકમાં આવેલી 'ડેબસિરિન નોન્થાબુરી સ્કૂલ'માં બનવા પામી હતી. મહત્વનું છે કે આ ઘટના એવા વિસ્તારમાં બની છે.જ્યાં સૌથી વધુ બંદૂક માલિકીનો દર જોવા મળે છે. એક અંદાજ પ્રમાણે અહીં આશરે 1 કરોડ બંદૂકો થાઇલેન્ડમાં ઉપલબ્ધ છે. મતલબ એવો થયો કે દર સાત લોકોએ એક વ્યક્તિ પાસે બંદૂક ઉપલબ્ધ છે. જોકે સરકાર દ્વારા બંદૂક સંબંધિત કાયદાઓ કડક કરવાના અગાઉ અનેક વચનો આપવામાં આવ્યા છે, છતાં દેશમાં ગોળીબાર અને હિંસાની ઘટનાઓ અટકવાનું નામ નથી લઇ રહી.

2022માં ઘટી હતી આવી જ એક ઘટના

અગાઉ પણ થાઇલેન્ડમાં આવી કરુણ ઘટનાઓ બની ચૂકી છે. આ વર્ષે ફેબ્રુઆરીમાં જ દક્ષિણ થાઇલેન્ડની એક શાળામાં થયેલા ગોળીબારમાં શાળાના આચાર્યનું મોત થયું હતું અને બે વિદ્યાર્થીઓ ઘાયલ થયા હતા, જ્યાં પોલીસે સમયસર કાર્યવાહી કરીને શૂટરની ધરપકડ કરી હતી. આ ઉપરાંત, વર્ષ 2022 માં એક ભૂતપૂર્વ પોલીસકર્મીએ બંદૂક અને છરી સાથે ઉત્તર થાઇલેન્ડની એક નર્સરીમાં ઘૂસીને 24 બાળકો અને 12 પુખ્ત વયના લોકોની નિર્દયતાથી હત્યા કરી હતી, જે થાઇલેન્ડના ઈતિહાસના સૌથી ભયાનક હત્યાકાંડોમાં ગણવામાં આવે છે.

સરકારે સામે અનેક સવાલો ઉભા થયા

શાળાઓ જેવા શૈક્ષણિક સંકુલોમાં વધતી જતી આ પ્રકારની હિંસાના કારણે વાલીઓ, વિદ્યાર્થીઓ અને સમગ્ર સમાજમાં ભારે ભય અને ચિંતાનું વાતાવરણ ફેલાઈ ગયું છે. કડક કાયદાકીય પગલાંઓ અને સુરક્ષાના સઘન પ્રબંધો વગર આ પ્રકારની દુર્ઘટનાઓને રોકવી મુશ્કેલ બની રહી છે, જેને લઈને હવે સરકાર સામે કડક કાર્યવાહી કરવા માટેનું દબાણ સતત વધી રહ્યું છે.

આ પણ વાંચોઃ સ્કીનને બનાવશે એકદમ ગ્લોઇંગ, ખાઓ આ એક ફ્રુટ