પશ્ચિમ એશિયામાં તણાવ તેની ચરમસીમાએ પહોંચ્યો છે. હોર્મુઝ સ્ટ્રેટને ખુલ્લું મૂકવા માટે આપવામાં આવેલા 48 કલાકના અલ્ટીમેટમની સમયમર્યાદા સમાપ્ત થતાની સાથે જ ઈરાનના બે મહત્વપૂર્ણ ઊર્જા સ્થળો પર હવાઈ હુમલા કરવામાં આવ્યા હોવાના અહેવાલ છે. આ ઘટનાક્રમ એવા સમયે સામે આવ્યો છે જ્યારે અમેરિકી પ્રમુખ ડોનાલ્ડ ટ્રમ્પ એક તરફ શાંતિ અને વાટાઘાટોના સંકેતો આપી રહ્યા છે, તો બીજી તરફ જમીની હકીકત યુદ્ધ તરફ ઈશારો કરી રહી છે.
ઈરાનના ઊર્જા માળખાને નિશાન બનાવ્યું
ઈરાનના રિવોલ્યુશનરી ગાર્ડની નજીક ગણાતી સમાચાર એજન્સીના જણાવ્યા અનુસાર, મંગળવારે વહેલી સવારે ઈરાનના ઊર્જા માળખાને નિશાન બનાવવામાં આવ્યું હતું. આ હુમલામાં મુખ્યત્વે બે સ્થળો પ્રભાવિત થયા છે. આ વિસ્તાર ઈરાનની ઉર્જા સુરક્ષા માટે વ્યૂહાત્મક રીતે અત્યંત મહત્વનો ગણાય છે. આ પ્લાન્ટને સપ્લાય કરતી મુખ્ય ગેસ પાઇપલાઇનને નિશાન બનાવીને ઉર્જા પુરવઠો ખોરવવાનો પ્રયાસ કરવામાં આવ્યો છે. જો કે, અત્યાર સુધી ઈઝરાયેલ કે અમેરિકાએ આ હુમલાની સત્તાવાર જવાબદારી સ્વીકારી નથી. સામાન્ય રીતે, આવા સંવેદનશીલ સૈન્ય ઓપરેશન્સમાં બંને દેશો મૌન જાળવતા હોય છે.
