અમેરિકાના રાષ્ટ્રપતિ ડોનાલ્ડ ટ્રમ્પે જાહેરાત કરી છે કે તેમના દેશમાં ગેરકાયદેસર રીતે ટ્રક ચલાવતા ડ્રાઇવરોની જગ્યાએ હવે અમેરિકાના પૂર્વ સૈનિકોને નિમણૂક કરવામાં આવશે. તેમણે આરોપ લગાવ્યો કે યોગ્ય દસ્તાવેજો વિના ટ્રક ચલાવતા આવા ડ્રાઇવરોના કારણે દેશમાં માર્ગ અકસ્માતોની સંખ્યા વધી રહી છે. ટ્રમ્પે પોતાના નિવેદન દરમિયાન એવા અનેક અકસ્માતોના ઉલ્લેખ પણ કર્યા, જેમાં આવા ટ્રક ડ્રાઇવરો સામેલ હોવાનું તેમણે જણાવ્યું.
મોટી સંખ્યામાં ભારતીય મૂળના લોકો પણ સામેલ
ટ્રમ્પે જણાવ્યું છે કે અમેરિકામાં ગેરકાયદેસર રીતે કામ કરતા ટ્રક ડ્રાઇવરોને હટાવી તેમની જગ્યાએ અમેરિકી સેનાના નિવૃત્ત સૈનિકોને તક આપવામાં આવશે. આ જાહેરાતનો સીધો પ્રભાવ અમેરિકામાં કામ કરતા હજારો વિદેશી ટ્રક ડ્રાઇવરો પર પડી શકે છે, જેમાં મોટી સંખ્યામાં ભારતીય મૂળના લોકો પણ સામેલ હોવાનું માનવામાં આવે છે.
અમેરિકામાં માર્ગ અકસ્માતોની સંખ્યા વધી રહી છે
પેન્સિલ્વેનિયામાં યોજાયેલા મિલિટરી ઇન્વેસ્ટમેન્ટ સમિટ દરમિયાન ટ્રમ્પે કહ્યું કે તેમનું પ્રશાસન ગેરકાયદેસર રીતે અમેરિકા આવેલા અને યોગ્ય દસ્તાવેજો વિના કોમર્શિયલ ટ્રક ચલાવતા ડ્રાઇવરો સામે દેશવ્યાપી કાર્યવાહી શરૂ કરશે. તેમણે દાવો કર્યો કે આવા ડ્રાઇવરોના કારણે અમેરિકામાં માર્ગ અકસ્માતોની સંખ્યા વધી રહી છે અને લોકોના જીવ જોખમમાં મુકાઈ રહ્યા છે.
એક જીવલેણ ટ્રક અકસ્માતનો પણ ઉલ્લેખ કર્યો
ટ્રમ્પે પોતાના ભાષણ દરમિયાન પેન્સિલ્વેનિયામાં તાજેતરમાં થયેલા એક જીવલેણ ટ્રક અકસ્માતનો પણ ઉલ્લેખ કર્યો, જેમાં એક સ્ટેટ ટ્રૂપરનું મોત થયું હતું. તેમણે આ ઘટનાને ગેરકાયદેસર ઇમિગ્રન્ટ ટ્રક ડ્રાઇવરો સાથે જોડતાં કહ્યું કે દેશની સુરક્ષા અને માર્ગ સલામતી માટે કડક પગલાં લેવાની જરૂર છે.
આવા ઘણા ડ્રાઇવરોને અંગ્રેજીમાં લખાયેલા ટ્રાફિક સંકેતો સમજાતા નથી
ટ્રમ્પે વધુમાં આરોપ લગાવ્યો કે આવા ઘણા ડ્રાઇવરોને અંગ્રેજીમાં લખાયેલા ટ્રાફિક સંકેતો સમજાતા નથી. તેમણે એવો પણ દાવો કર્યો કે કેટલાક ડ્રાઇવરો ડ્રગ્સ અથવા દારૂના નશામાં વાહન ચલાવે છે, જેના કારણે ગંભીર અકસ્માતો સર્જાય છે. જોકે, આ દાવાઓ અંગે તેમણે કોઈ સત્તાવાર આંકડા અથવા પુરાવા રજૂ કર્યા નહોતા.
નિવૃત્ત સૈનિકોને રોજગારી આપવાની નવી યોજનાની પણ જાહેરાત
ટ્રમ્પે કહ્યું કે અમેરિકા પોતાના રસ્તાઓ પર ગેરકાયદેસર રીતે આવેલા લોકોને ટ્રક ચલાવવા દેવા માંગતું નથી. તેમના મુજબ, આ જગ્યાઓ પર અમેરિકાની સેવા આપનાર પૂર્વ સૈનિકોને રોજગાર મળવો જોઈએ. તેમણે નિવૃત્ત સૈનિકોને રોજગારી આપવાની નવી યોજનાની પણ જાહેરાત કરી.
અમેરિકાના ટ્રાન્સપોર્ટ ક્ષેત્રમાં કામ કરતા ગેરકાયદેસર ઇમિગ્રન્ટો પર તેની અસર જોવા મળી શકે
આ પ્રસ્તાવ હેઠળ અમેરિકી સેનામાં ભારે ટ્રક ચલાવવાનો અનુભવ ધરાવતા પૂર્વ સૈનિકોને કોમર્શિયલ ડ્રાઇવિંગ લાઇસન્સ (CDL) મેળવવાની પ્રક્રિયામાં મોટી રાહત આપવામાં આવશે. ટ્રમ્પના જણાવ્યા મુજબ, આવા સૈનિકોને અલગથી લાંબી પ્રક્રિયા કર્યા વિના સીધી CDL માટે પાત્ર માનવામાં આવશે, જેથી તેઓ ઝડપથી ટ્રક ડ્રાઇવર તરીકે કામ શરૂ કરી શકે.
વિશ્લેષકોનું માનવું છે કે જો આ યોજના અમલમાં આવશે તો અમેરિકાના ટ્રાન્સપોર્ટ ક્ષેત્રમાં કામ કરતા ગેરકાયદેસર ઇમિગ્રન્ટો પર તેની અસર જોવા મળી શકે છે. બીજી તરફ, કાયદેસર દસ્તાવેજો સાથે કામ કરતા ટ્રક ડ્રાઇવરો માટે હાલ કોઈ ફેરફારની જાહેરાત કરવામાં આવી નથી. તેમ છતાં, ટ્રમ્પના આ નિવેદન બાદ ઇમિગ્રેશન નીતિ, રોજગાર અને માર્ગ સલામતી અંગે અમેરિકામાં નવી રાજકીય ચર્ચા શરૂ થઈ છે. ખાસ કરીને ભારતીય સમુદાય સહિત વિવિધ ઇમિગ્રન્ટ વર્ગો આ પ્રસ્તાવના સંભવિત પ્રભાવ પર નજર રાખી રહ્યા છે.
