Trump's tariffs નો અમેરિકામાં થયો ઉગ્ર વિરોધ, ટ્રમ્પની નીતિઓ સામે સંસદમાં પ્રસ્તાવ લાવવાની તૈયારીઓ

ટેરિફ કેસમાં ફેડરલ કોર્ટના નિર્ણય બાદ, સેનેટમાં પણ ટ્રમ્પની મુશ્કેલીઓ વધી રહી છે. યુએસ સંસદમાં વિદેશ બાબતોની સમિતિ ટ્રમ્પના ટેરિફ પર કાર્યવાહી કરી શકે છે. ડેમોક્રેટ સાંસદ ગ્રેગરી મીક્સે હાઉસ ઓફ રિપ્રેઝન્ટેટિવ્સના સ્પીકર માઇક જોહ્ન્સનને ટેરિફ સમાપ્ત કરવાના પ્રસ્તાવ પર વિચાર કરવા અપીલ કરી છે.

સ્પીકર જોહ્ન્સનને ટ્રમ્પની અરાજકતાને છુપાવવાનું બંધ કરવું જોઈએ

ગ્રેગરીએ કહ્યું કે ટ્રાયલ અને એપેલેટ કોર્ટ બંનેએ ટ્રમ્પના ટેરિફને ગેરકાયદેસર જાહેર કર્યો છે. તેથી, સ્પીકર જોહ્ન્સનને ટ્રમ્પની અરાજકતાને છુપાવવાનું બંધ કરવું જોઈએ અને ટેરિફ સમાપ્ત કરવા માટે મારા પ્રસ્તાવો ગૃહમાં મૂકવા જોઈએ. અમેરિકન સિસ્ટમના લોકો ભારત પર ટેરિફ લાદવાના નિર્ણય સામે એક થઈ રહ્યા છે. તેમને ડર છે કે ટેરિફને કારણે ભારત સાથેની મિત્રતા તૂટી શકે છે.

કોર્ટે કહ્યું - ટ્રમ્પનો ટેરિફ ગેરકાયદેસર છે

ઉલ્લેખનિય છે કે ફેડરલ કોર્ટે ચુકાદો આપ્યો હતો કે ટ્રમ્પને કાયદેસર રીતે રાષ્ટ્રીય કટોકટી જાહેર કરવાનો અને વિશ્વના લગભગ દરેક દેશ પર આયાત કર લાદવાનો અધિકાર નથી. કોર્ટે કહ્યું કે ટ્રમ્પના મોટાભાગના વૈશ્વિક ટેરિફ ગેરકાયદેસર છે. જોકે, કોર્ટે એમ પણ કહ્યું છે કે આ ટેરિફ 14 ઓક્ટોબર સુધી અમલમાં રહેશે, જેથી ટ્રમ્પ વહીવટીતંત્રને સુપ્રીમ કોર્ટમાં અપીલ કરવાનો સમય મળી શકે.

ટ્રમ્પે કોર્ટના નિર્ણયને ખોટો ગણાવ્યો

કોર્ટના નિર્ણય પછી, ડોનાલ્ડ ટ્રમ્પે કહ્યું કે દેશો પર લાદવામાં આવેલા તમામ ટેરિફ અમલમાં રહેશે. તેમણે કોર્ટના નિર્ણયને એકતરફી અને ખોટો ગણાવ્યો. ટ્રમ્પે કહ્યું, તેઓ જાણે છે કે અમેરિકા અંતે જીતશે. જો આ ટેરિફ ક્યારેય દૂર કરવામાં આવે છે, તો તે દેશ માટે સંપૂર્ણપણે વિનાશક બનશે. તે આપણને આર્થિક રીતે નબળા બનાવશે, અને આપણે મજબૂત બનવું પડશે.

60 દેશો પર નવા ટેરિફની જાહેરાત

2 એપ્રિલના રોજ, ટ્રમ્પે અમેરિકા સાથે વેપાર ખાધનો સામનો કરી રહેલા 60 દેશો પર નવા ટેરિફની જાહેરાત કરી. ટ્રમ્પે આ દિવસને મુક્તિ દિવસ નામ આપ્યું. ભારતીય માલ પર 25% ટેરિફ લાદવામાં આવ્યો છે. રશિયન ક્રૂડ ઓઇલ ખરીદવા પર 25% દંડ પણ લાદવામાં આવ્યો છે. 27 ઓગસ્ટથી ભારતીય માલ પર કુલ 50% ટેરિફ લાદવામાં આવ્યો છે.