અમેરિકાના રાજકારણમાં ઇમિગ્રેશનને લઈને ફરી એકવાર મોટો વિવાદ શરૂ થયો છે. રાષ્ટ્રપતિ ડોનાલ્ડ ટ્રમ્પે ગેરકાયદેસર ઇમિગ્રન્ટ્સ અને પ્રવાસીઓના બાળકોને અમેરિકામાં જન્મના આધારે મળતી નાગરિકતાને રોકવા માટે બે નવા આદેશો જારી કર્યા છે. તાજેતરમાં જ જૂન મહિનામાં યુએસ સુપ્રીમ કોર્ટે ટ્રમ્પના અગાઉના આદેશને ફગાવી દીધો હતો અને બંધારણના ૧૪મા સુધારાને ટાંકીને યુએસમાં જન્મેલા દરેક બાળકને આપમેળે નાગરિકતા મળવાની વાતનું સમર્થન કર્યું હતું. પરંતુ, ટ્રમ્પે કોર્ટના આ નિર્ણયને ઉલટાવી દેવા માટે હવે આ કડક પગલાં ભર્યા છે.

બર્થ ટૂરિઝમ પર પ્રતિબંધ

ગુરુવારે જારી કરવામાં આવેલા નવા આદેશોમાં ખાસ કરીને "બર્થ ટૂરિઝમ" ને નિશાન બનાવવામાં આવ્યું છે. આ નિયમ હેઠળ, જે વિદેશી માતાઓ માત્ર અમેરિકામાં બાળકને જન્મ આપવા માટે જ પ્રવાસી વિઝા પર દેશમાં આવે છે, તેમના સંતાનોને હવે આપમેળે અમેરિકન નાગરિકતા આપવામાં આવશે નહીં. આ ઉપરાંત, બીજા આદેશ અનુસાર જે બાળકોના માતા-પિતા આતંકવાદ જેવી ગતિવિધિઓ સાથે સંકળાયેલા છે, તેમને પણ યુએસ નાગરિકતા નકારવામાં આવશે. આ સાથે જ રાજદ્વારીઓ, વિદેશી સરકારોના કર્મચારીઓ અને વિદેશી હિતો માટે લોબિંગ કે કામ કરતા લોકોના ઘરે અમેરિકામાં જન્મેલા બાળકોને પણ આ નાગરિકતાના અધિકારથી વંચિત રાખવામાં આવશે.

નીતિઓને ખૂબ જ કડકાઈથી લાગુ કરાશે

વ્હાઇટ હાઉસના ડેપ્યુટી ચીફ ઓફ સ્ટાફ અને ઇમિગ્રેશન નીતિઓના મુખ્ય સૂત્રધાર સ્ટીફન મિલરે સ્પષ્ટ કર્યું છે કે સરકાર આ નીતિઓને ખૂબ જ કડકાઈથી લાગુ કરશે. રાષ્ટ્રપતિ ડોનાલ્ડ ટ્રમ્પે સુપ્રીમ કોર્ટના અગાઉના નિર્ણયને દેશ માટે નુકસાનકારક ગણાવ્યો હતો અને ચેતવણી આપી હતી કે 'બર્થ ટૂરિઝમ' સામેની આ લડાઈ હવે અલગ અને વધુ આક્રમક રીતે લડવામાં આવશે.

દેશી નાગરિકોમાં ચિંતાનું મોજું 

આ નિર્ણયોથી અમેરિકામાં વિઝા પર આવતા વિદેશી નાગરિકો અને ખાસ કરીને ઇમિગ્રન્ટ્સ સમુદાયમાં ચિંતાનું મોજું ફરી વળ્યું છે. બંધારણીય વિશેષજ્ઞો અને ટ્રમ્પ પ્રશાસન વચ્ચેનો આ વિવાદ આગામી સમયમાં વધુ ઉગ્ર બને તેવી પૂરી શક્યતા છે, કારણ કે એક તરફ સુપ્રીમ કોર્ટનો ૧૪મો સુધારો નાગરિકતાની ખાતરી આપે છે, તો બીજી તરફ ટ્રમ્પ પ્રશાસન રાષ્ટ્રીય સુરક્ષા અને કાયદાકીય છટકબારીઓ બંધ કરવાના નામે આ નિયમો સખત બનાવી રહ્યું છે.

આ પણ વાંચોઃ ગુજરાતથી લઇને આસામ સુધી, ખૂણે ખૂણે પ્રખ્યાત છે આ હેન્ડલૂમ સાડીઓ