અમેરિકાના કેલિફોર્નિયા રાજ્યમાં બનેલા એક ગંભીર માર્ગ અકસ્માતમાં બે ભારતીય વિદ્યાર્થીનીઓના દુઃખદ મોત થયા છે. આ બંને યુવતીઓએ તાજેતરમાં માસ્ટર્સની ડિગ્રી પૂર્ણ કરી હતી અને અમેરિકા ખાતે રોજગારની શોધમાં હતી. આ ઘટના બાદ તેમના વતન તેલંગાણાના મહબૂબાબાદ જિલ્લામાં શોકનો માહોલ છવાઈ ગયો છે.
બંને નોકરીની શોધમાં હતા
પ્રાપ્ત વિગતો મુજબ, ગારલા મંડલની રહેવાસી 24 વર્ષની પુલ્લાખંડમ મેઘના રાણી અને કડિયાલા ભાવના અભ્યાસ અર્થે અમેરિકા ગઈ હતી. બંનેએ કેલિફોર્નિયામાં રહીને ઉચ્ચ શિક્ષણ પૂર્ણ કર્યું હતું અને અભ્યાસ બાદ ત્યાં જ નોકરી મેળવવા માટે પ્રયત્ન કરી રહી હતી. મેઘના અને ભાવના માત્ર સહઅભ્યાસી જ નહીં પરંતુ નજીકની મિત્ર પણ હતી. તેઓ એકસાથે રહેતા અને ભવિષ્ય માટે સાથે યોજનાઓ બનાવી રહ્યા હતા. ઘટનાના દિવસે બંને મિત્રો સાથે બહાર ગયા હતા અને પરત ફરતી વખતે તેમની કાર ભયંકર અકસ્માતનો ભોગ બની. આ દુર્ઘટનામાં બંને યુવતીઓનું ઘટનાસ્થળે જ મોત થયું. અકસ્માતના ચોક્કસ કારણો હજી સુધી જાહેર કરવામાં આવ્યા નથી.
