મધ્ય પૂર્વ (મિડલ ઈસ્ટ) માં સ્થિતિ વધુ સ્ફોટક બની છે. અમેરિકા અને ઈરાન વચ્ચે વધી રહેલા ભારે તણાવ વચ્ચે યુએસ એરફોર્સે પોતાના સૌથી શક્તિશાળી અને સુપરસોનિક B-1 બોમ્બર તૈનાત કરી દીધા છે. ઓનલાઈન ફ્લાઈટ ટ્રેકિંગ વેબસાઈટો મુજબ, આ બોમ્બરે યુકેના એરબેઝ પરથી ઉડાન ભરી છે. આ તૈનાતીને ઈરાન વિરુદ્ધ અમેરિકી સૈન્ય કાર્યવાહીના મોટા વિસ્તરણ તરીકે જોવામાં આવી રહી છે.
CENTCOM નું નિવેદન અને ટ્રમ્પની ચેતવણી
જોકે, યુએસ સેન્ટ્રલ કમાન્ડ (CENTCOM) એ B-1 મિશનનો સીધો ઉલ્લેખ નથી કર્યો, પરંતુ સ્પષ્ટ કર્યું છે કે યુએસ સેનાએ ઈરાનના લશ્કરી ઓપરેશન સેન્ટર, નેવી મથકો, ડ્રોન સ્ટોરેજ, એરક્રાફ્ટ હેંગર અને સપ્લાય બેઝ પર સચોટ હુમલા કર્યા છે. આ કાર્યવાહીનો મુખ્ય હેતુ હોર્મુઝ સ્ટ્રેટ (Hormuz Strait) માં દરિયાઈ માર્ગોને સુરક્ષિત કરવાનો અને ઈરાનની ધમકીઓને નાબૂદ કરવાનો છે. બીજી તરફ, અમેરિકી પ્રમુખ ડોનાલ્ડ ટ્રમ્પે ચેતવણી આપી છે કે જો ઈરાન જહાજો પર હુમલા ચાલુ રાખશે, તો અમેરિકા તેહરાન સહિત ઈરાનના મહત્વના પુલ અને પાવર પ્લાન્ટ્સને પણ નિશાન બનાવી શકે છે. અમેરિકી અને ઇઝરાયેલી અધિકારીઓના મતે આગામી દિવસોમાં આ યુદ્ધ વધુ ભયાનક સ્વરૂપ ધારણ કરી શકે છે.