મિડલ ઈસ્ટ (મધ્ય-પૂર્વ) ના રાજકારણમાંથી અમેરિકા માટે ખૂબ જ ચિંતાજનક સમાચાર સામે આવી રહ્યા છે. અત્યાર સુધી અમેરિકાના પરમ મિત્ર ગણાતા સાઉદી અરેબિયા અને સંયુક્ત આરબ અમીરાત (UAE) એ માત્ર ૨૪ કલાકની અંદર સુપરપાવર અમેરિકાને બે મોટા આંચકા આપ્યા છે. ઈરાન સાથેના તણાવમાં ફસાયેલા અમેરિકાને પહેલો ઝટકો આર્થિક મોરચે અને બીજો ઝટકો સૈન્ય મોરચે લાગ્યો છે. આ બંને દેશોએ અમેરિકી ટ્રેઝરી (સરકારી બોન્ડ) માંથી અંદાજે ૧૫ અબજ ડોલર (૧૫ બિલિયન ડોલર) ની પોતાની જમા પૂંજી પાછી ખેંચી લીધી છે, જેની સીધી અસર અમેરિકાના અર્થતંત્ર પર જોવા મળશે.

અમેરિકી તિજોરીમાંથી અબજો ડોલર ગાયબ!

સત્તાવાર આંકડાઓ અનુસાર, સાઉદી અરેબિયાએ અમેરિકી ટ્રેઝરી બોન્ડમાં પોતાની હિસ્સેદારી ૧૦.૮ અબજ ડોલર ઘટાડી દીધી છે, જેના પછી હવે તેની જમા પૂંજી ૧૪૯.૬ અબજ ડોલર બચી છે. એ જ રીતે, યુએઈએ પણ ૫.૮ અબજ ડોલર પાછા ખેંચી લીધા છે અને હવે અમેરિકી કોષમાં તેની ૧૧૪.૧ અબજ ડોલરની મૂડી જમા છે. અમેરિકા આ બોન્ડ્સ દ્વારા દુનિયાભરમાંથી નાણાં એકત્ર કરે છે જેથી તેનું અર્થતંત્ર મજબૂત રહે. સાઉદી અને યુએઈના આ પગલાથી વૈશ્વિક સ્તરે અમેરિકા પરનો ભરોસો ઘટશે, ડોલર નબળો પડશે અને અમેરિકા માટે લોન મોંઘી થઈ શકે છે.

ઈરાન પર હુમલો કરવાનો ટ્રમ્પનો પ્લાન રોકવો પડ્યો

બીજો મોટો ઝટકો ઈરાન પરના હુમલા સાથે જોડાયેલો છે. અહેવાલો અનુસાર, રાષ્ટ્રપતિ ડોનાલ્ડ ટ્રમ્પ ઈરાન પર મોટો સૈન્ય હુમલો કરવાથી માત્ર એક કલાક જ દૂર હતા, પરંતુ સાઉદી અને યુએઈએ આ હુમલાનો ખુલ્લેઆમ વિરોધ કરીને સાથ આપવાનો ઇનકાર કરી દીધો. બંને દેશોનું કહેવું છે કે જો યુદ્ધ થશે તો તેનાથી પ્રદેશમાં તેમના તેલના ભંડારો અને આર્થિક હિતોને ભારે નુકસાન થશે. ગલ્ફ દેશોના આ કડક વલણને કારણે ટ્રમ્પે પોતાનો નિર્ણય બદલવો પડ્યો છે.

નોંધનીય છે કે અગાઉ ફેબ્રુઆરી-માર્ચ મહિનામાં જ્યારે અમેરિકા અને ઈરાન વચ્ચે યુદ્ધ જેવી સ્થિતિ હતી, ત્યારે સાઉદી અને યુએઈએ છૂપી રીતે ઈરાન વિરુદ્ધ અમેરિકાને મદદ કરી હતી. પરંતુ હવે પોતાના આર્થિક નુકસાન અને તેલના કૂવાઓની સુરક્ષાને જોતા બંને દેશોએ અમેરિકાથી અંતર જાળવવાનું શરૂ કર્યું છે. હાલ કતારની મધ્યસ્થતામાં ઈરાન સાથે પરમાણુ કરાર માટે વાતચીત ચાલી રહી છે.

આ પણ વાંચો:Iran-America War : અમેરિકી સંસદમાં ઈરાન યુદ્ધ રોકવાનો પ્રસ્તાવ પાસ, ટ્રમ્પના 4 સાંસદોએ વિરૂદ્ધમાં વોટિંગ કર્યું