યુએસ વાણિજ્ય વિભાગ દ્વારા એક અત્યંત મહત્વપૂર્ણ અને રાહતરૂપ જાહેરાત કરવામાં આવી છે. આ નવા નિર્ણય અનુસાર, યુનાઇટેડ સ્ટેટ્સ ભારત સહિત ૨૦ દેશોમાંથી આયાત થતી ચોક્કસ તબીબી ફોર્મ્યુલેશન્સ, દવાઓ અને તેના સંબંધિત મહત્વપૂર્ણ ઘટકો પર કોઈ પણ પ્રકારનો એડ વેલોરમ (મૂલ્ય-આધારિત) ટેરિફ વસૂલશે નહીં. આ વિશેષ છૂટ ખાસ કરીને એવા ઉત્પાદનો માટે છે જેનો ઉપયોગ દુર્લભ અને ગંભીર રોગોની સારવારમાં થાય છે.
શૂન્ય ટેરિફનો લાભ મેળવતા દેશો
યુએસ વાણિજ્ય વિભાગ દ્વારા ફેડરલ રજિસ્ટરમાં પાત્ર દેશોની સત્તાવાર યાદી જાહેર કરવામાં આવી છે. ભારત ઉપરાંત આ યાદીમાં આર્જેન્ટિના, બાંગ્લાદેશ, કંબોડિયા, ઇક્વાડોર, અલ સાલ્વાડોર, યુરોપિયન યુનિયન, ગ્વાટેમાલા, ઇન્ડોનેશિયા, જાપાન, જોર્ડન, મલેશિયા, ઉત્તર મેસેડોનિયા, દક્ષિણ કોરિયા, સ્વિટ્ઝર્લૅન્ડ, લિક્ટેંસ્ટાઇન, તાઇવાન, થાઇલેન્ડ, યુનાઇટેડ કિંગડમ અને વિયેતનામનો સમાવેશ થાય છે. આ દેશોમાંથી આવતી આ પાત્ર દવાઓ પર શૂન્ય ટકા ટેરિફ લાગુ રહેશે.
વર્લ્ડ કસ્ટમ્સ ઓર્ગેનાઇઝેશનના જણાવ્યા અનુસાર, એડ વેલોરમ ટેરિફ એટલે આયાત થતા માલના નાણાકીય મૂલ્ય પર લગાવવામાં આવતી નિશ્ચિત ટકાવારી કર. પરંતુ યુએસ સાથેના વેપાર અને સુરક્ષા માળખા કરારને કારણે આ દેશોના લાયક ઉત્પાદનો પર શૂન્ય ટેરિફનો ફાયદો મળશે.
100 ટકા ટેરિફની તૈયારી વચ્ચે મોટી રાહત
આ પગલું એવા સમયે લેવામાં આવ્યું છે જ્યારે વોશિંગ્ટન દ્વારા 29 સપ્ટેમ્બરથી કેટલાક પેટન્ટ કરાયેલા ફાર્માસ્યુટિકલ્સ અને સંબંધિત ઘટકો પર 100 ટકા જેટલો ઊંચો ટેરિફ લાદવાની તૈયારીઓ ચાલી રહી છે. યુએસ રાષ્ટ્રપતિ ડોનાલ્ડ ટ્રમ્પે સ્થાનિક ઉત્પાદનને ઉત્તેજન આપવા માટે 2 એપ્રિલે એક વિશેષ ઘોષણા કરી હતી. વેપાર વિસ્તરણ કાયદાની કલમ 232 હેઠળ આ 100% કસ્ટમ ડ્યુટી લાદવાની જોગવાઈ કરવામાં આવી છે.
આ કરવેરાની નીતિ અમુક કંપનીઓ માટે ૩૧ જુલાઈથી અને અન્ય માટે 29 સપ્ટેમ્બરથી લાગુ થઈ ચૂકી છે. જોકે, ફેડરલ રજિસ્ટરમાં પ્રકાશિત નવી યાદીને કારણે ભારત જેવા મુખ્ય વૈશ્વિક ભાગીદાર દેશોમાંથી આયાત થતી તબીબી ચીજવસ્તુઓને આ ભારે કરમાંથી સંપૂર્ણ મુક્તિ મળી ગઈ છે.
કઈ દવાઓને મળશે આ મુક્તિ?
અમેરિકી વહીવટીતંત્રની સૂચના મુજબ, આ શૂન્ય ટકા ટેરિફનો દર અત્યંત ગંભીર અને જટિલ રોગોની સારવારમાં વપરાતી દવાઓ પર લાગુ થશે. આ યાદીમાં મુખ્યત્વે વંધ્યત્વ સારવાર (ફર્ટિલિટી ટ્રીટમેન્ટ), સેલ થેરાપી, જનીન ઉપચાર (જીન થેરાપી), એન્ટિબોડી-ડ્રગ કન્જુગેટ્સ તેમજ પ્રાણીઓની દવાઓનો સમાવેશ થાય છે. આ વિશેષ દવાઓના ઉત્પાદનમાં વપરાતા મુખ્ય કાચા માલ અને ઘટકો પર પણ આ ટેરિફ માફીનો લાભ મળશે. આ નિર્ણયથી ભારતીય ફાર્માસ્યુટિકલ ઉદ્યોગને વૈશ્વિક બજારમાં મોટી રાહત મળશે અને દર્દીઓને પણ આર્થિક બોજમાંથી મુક્તિ મળશે.
આ પણ વાંચોઃ Chinaમાં ભ્રષ્ટાચાર પર સૌથી મોટી કાર્યવાહી, BAICના પૂર્વ ચેરમેનને મોતની સજા
