ફિફા વર્લ્ડ કપ 2026 ની ફાઇનલમાં સ્પેન સામે મળેલી 1-0 થી હાર આર્જેન્ટિનાના ચાહકો અને ખેલાડીઓ માટે પચાવવી મુશ્કેલ બની ગઈ છે. આ હાર બાદ આર્જેન્ટિનામાં તણાવનું વાતાવરણ સર્જાયું છે અને રાજધાની બ્યુનોસ એરેસમાં હિંસક રમખાણો ફાટી નીકળ્યા છે. લિયોનેલ મેસ્સીના કરિયરના આ છેલ્લા વર્લ્ડ કપમાં ટ્રોફી ચૂકી જવાથી નિરાશ થયેલા હજારો ચાહકો રસ્તા પર ઉતરી આવ્યા હતા. ઓબેલિસ્ક વિસ્તારમાં ચાહકો અને પોલીસ વચ્ચે ઉગ્ર અથડામણ થઈ હતી, જેમાં ભીડ દ્વારા પોલીસ પર પથ્થરમારો કરવામાં આવ્યો હતો અને અનેક સ્થળોએ આગજનીની ઘટનાઓ પણ સામે આવી છે. પરિસ્થિતિને કાબૂમાં લેવા માટે પોલીસે દબાણનો ઉપયોગ કરવો પડ્યો હતો, જેના કારણે અનેક લોકો ઈજાગ્રસ્ત થયા હોવાના અહેવાલ છે.
બંને દેશના ખેલાડીઓ વચ્ચે મારામારી થઇ
હિંસાની આ આગ માત્ર રસ્તાઓ સુધી જ સીમિત ન રહી, પરંતુ મેદાન પર પણ જોવા મળી હતી. મેચ પૂર્ણ થયા બાદ સ્પેનિશ અને આર્જેન્ટિનાના ખેલાડીઓ વચ્ચે મારામારીના દ્રશ્યો સર્જાયા હતા. આર્જેન્ટિનાના મિડફિલ્ડર લીએન્ડ્રો પેરેડેસ મેદાન પર પોતાનો સંયમ ગુમાવી બેઠા હતા અને તેમણે સ્પેનિશ ખેલાડીઓ સાથે ઝઘડો કર્યો હતો. એટલું જ નહીં, ડિફેન્ડર નાહુએલ મોલિનાએ સ્પેનિશ ખેલાડીને પેટમાં મુક્કો માર્યો હતો, જ્યારે પેરેડેસે એરિક ગાર્સિયાને ગળાથી પકડીને ધક્કો માર્યો હતો. સ્થિતિ વધુ વણસે તે પહેલાં આર્જેન્ટિનાના મુખ્ય કોચ સ્કેલોનીએ વચ્ચે પડીને મામલો થાળે પાડવો પડ્યો હતો.
https://twitter.com/nexta_tv/status/2079074161197273118