ઇસ્ફહાનમાં ઇરાનના મુખ્ય પરમાણુ સ્થળ સાથે સંબંધિત નવી સેટેલાઇટ છબીઓમાં એક મોટી વાત બહાર આવી છે. 27 જૂને લેવામાં આવેલી આ તસવીરોમાં, સ્પષ્ટપણે જોઈ શકાય છે કે ઇરાને ઇસ્ફહાન યુરેનિયમ કન્વર્ઝન ફેસિલિટીના ભૂગર્ભ સંકુલમાં સ્થિત એક ટનલનો પ્રવેશદ્વાર ફરીથી ખોલ્યો છે. તેને પહેલા સીલ કરવામાં આવ્યું હતું.
આ ટનલ ફરીથી ખોલવાના કારણોની કોઈ પુષ્ટિ કરવામાં આવી નથી, પરંતુ આ એવા સમયે થઈ રહ્યું છે જ્યારે ઈરાન અને અમેરિકા વચ્ચે પરમાણુ યુદ્ધ ચરમસીમાએ છે. એક અહેવાલ મુજબ, યુએસ જોઈન્ટ ચીફ્સ ઓફ સ્ટાફના ચેરમેન જનરલ ડેન કેને યુએસ સેનેટને જાણ કરી છે કે ઇસ્ફહાન સ્થળ પર અમેરિકાના હુમલામાં 'મેસિવ ઓર્ડનન્સ પેનિટ્રેટર' નો ઉપયોગ કરવામાં આવ્યો ન હતો. તેના બદલે, ટોમાહોક મિસાઈલ અમેરિકન સબમરીનમાંથી છોડવામાં આવી હતી.
ફોર્ડો પરમાણુ સ્થળ પર ખોદકામ શરૂ
અમેરિકાના હુમલા બાદ ઈરાને ફોર્ડો પરમાણુ સ્થળ પર ખોદકામ શરૂ કરી દીધું છે. ઈરાનને થોડા દિવસોમાં નુકસાનનો અંદાજ આવી જશે. 27 જૂનના મેક્સારના સેટેલાઇટ ફોટા દર્શાવે છે કે ફોર્ડો પરમાણુ સ્થળ પર ખોદકામ અને માટી કાઢવાના મશીનો કામ કરી રહ્યા છે. તેમજ તે એ સ્થળ હતું જેને અમેરિકાએ બોમ્બમારા દરમિયાન તેને નિશાન બનાવ્યું હતું.
ઇઝરાયલ માને છે કે આ તસવીરો કદાચ ખતરનાક યુરેનિયમ કાઢવાનો પ્રયાસ દર્શાવે છે, જે અત્યાર સુધી શોધી શકાયો નથી. તસવીરોમાં ટ્રક, જેસીબી અને વાહનો સ્પષ્ટપણે દેખાય છે.
જનરલ કેને આ મહત્વપૂર્ણ માહિતી આપી
યુએસ જોઈન્ટ ચીફ્સ ઓફ સ્ટાફના ચેરમેન જનરલ કેને જણાવ્યું હતું કે ઇસ્ફહાન પરમાણુ સુવિધા એટલી ઊંડાઈએ સ્થિત છે કે બંકર બસ્ટર બોમ્બ પણ ત્યાં અસરકારક નથી, તેથી ટોમહોક મિસાઈલોનો ઉપયોગ કરવામાં આવ્યો હતો.
ડોનાલ્ડ ટ્રમ્પ ફરી એકવાર ઈરાન સામે કડક બન્યા
અમેરિકાના ડોનાલ્ડ ટ્રમ્પે શુક્રવારે ડોનાલ્ડ ટ્રમ્પે ફરી એકવાર ઈરાન પ્રત્યે કડક વલણો દર્શાવ્યા હતા. જ્યારે તેમને પૂછવામાં આવ્યું કે શું જરૂર પડ્યે તેઓ ફરીથી ઈરાનના પરમાણુ સ્થળો પર હુમલો કરશે, ત્યારે તેમણે ખચકાટ વિના કહ્યું, હા, બિલકુલ, કોઈ પણ સવાલ વિના.
ટ્રમ્પને સેનેટમાં સમર્થન મળ્યું
રિપબ્લિકન પાર્ટી પાસે સેનેટમાં 53-47 બહુમતી છે અને તેણે ટ્રમ્પના નિર્ણયોને ખુલ્લેઆમ સાથ આપ્યો હતો. મોટાભાગના રિપબ્લિકન કાયદા નિર્માતાઓ કહે છે કે ઈરાન અમેરિકા અને તેના સાથી દેશો માટે ગંભીર ખતરો છે અને ટ્રમ્પ દ્વારા નિર્ણાયક પગલાં લેવા જરૂરી છે.
આ કાયદા નિર્માતાઓએ ગયા અઠવાડિયે ટ્રમ્પ દ્વારા કોંગ્રેસની મંજૂરી વિના ઈરાનના ત્રણ મુખ્ય પરમાણુ સ્થળો પર કરવામાં આવેલા હુમલાઓનું પણ સમર્થન કર્યું હતું. તેઓ માને છે કે કટોકટીના સમયે રાષ્ટ્રપતિને તાત્કાલિક નિર્ણયો લેવાનો અધિકાર હોવો જોઈએ.
