હોંગકોંગના વાંગ ફુક કોર્ટ હાઉસિંગ એસ્ટેટમાં લાગેલી ભીષણ આગે 75 વર્ષમાં દેશની સૌથી મોટી જીવલેણ દુર્ઘટના સર્જી છે. અલ જઝીરાના અહેવાલ મુજબ, અધિકારીઓએ આગના કાટમાળમાંથી વધુ 18 માનવ અવશેષો શોધી કાઢ્યા છે, જેના કારણે સત્તાવાર મૃત્યુઆંક વધીને 146 થયો છે. આ આગ બે દિવસ સુધી ચાલી હતી અને શુક્રવારે ફાયર ફાઇટરો દ્વારા કાબૂમાં લેવામાં આવી હતી. આગમાં સાત રહેણાંક ટાવર્સ લપેટમાં આવી ગયા હતા. હોંગકોંગ પોલીસના કેઝ્યુઅલ્ટી યુનિટના વડા, શુક-યિન ત્સાંગે જણાવ્યું હતું કે, અન્ય 100 લોકો હજુ પણ લાપતા છે અને 79 લોકો ઇજાગ્રસ્ત થયા છે.
સુરક્ષામાં ગંભીર ખામીઓ
પ્રાપ્ત વિગતો મુજબ, રહેવાસીઓએ અગાઉ પણ આગના જોખમો અને શંકાસ્પદ બાંધકામ પ્રથાઓ અંગે અધિકારીઓને વારંવાર ચેતવણી આપી હતી. અધિકારીઓનું કહેવું છે કે, છેલ્લા વર્ષથી ચાલી રહેલા નવીનીકરણ (Renovation) દરમિયાન ઉપયોગમાં લેવાયેલા વાંસના માળખા અને બારીઓને ઢાંકવા માટે વપરાયેલા જ્વલનશીલ ફોમ બોર્ડને કારણે આગ ઝડપથી ફેલાઈ હતી. આ મુદ્દાને કારણે જાહેર જનતામાં મોટો રોષ જોવા મળી રહ્યો છે.