અમેરિકન રાષ્ટ્રપતિ ડોનાલ્ડ ટ્રમ્પે એક મોટો ખુલાસો કરતા જણાવ્યું છે કે ચીનના રાષ્ટ્રપતિ શી જિનપિંગ આગામી બે અઠવાડિયામાં અમેરિકાની મુલાકાતે આવશે. ટ્રમ્પે આ જાહેરાત વ્હાઇટ હાઉસ નજીક ચાલી રહેલા નવા બોલરૂમ અને લશ્કરી સંકુલના નિર્માણ કાર્ય વિશે વાત કરતી વખતે કરી હતી. તેમણે આ પ્રોજેક્ટની તુલના ચીનના પ્રખ્યાત 'ગ્રેટ હોલ' સાથે કરી હતી અને ગર્વપૂર્વક જણાવ્યું હતું કે હવે અમેરિકા પાસે પણ પોતાનો એક ભવ્ય 'ગ્રેટ હોલ' હશે.

શી જિનપિંગ લેશે અમેરિકાની મુલાકાતઃ ટ્રમ્પ

આ જાહેરાત રાષ્ટ્રપતિ ટ્રમ્પે વ્હાઇટ હાઉસના રોઝ ગાર્ડનમાં આયોજિત 'બેક-ટુ-સ્કૂલ' કાર્યક્રમના લોન્ચિંગ દરમિયાન કરી હતી. જોકે, તેમના દ્વારા શી જિનપિંગ સાથેની મુલાકાતની ચોક્કસ તારીખ, સમયપત્રક કે અન્ય કોઈ વિગતો શેર કરવામાં આવી ન હતી. ટ્રમ્પે કાર્યક્રમમાં જણાવ્યું કે, "રાષ્ટ્રપતિ શી બે અઠવાડિયામાં આવી રહ્યા છે. મેં થોડા સમય પહેલા ચીનની મુલાકાત લીધી હતી અને ત્યાંનો ગ્રેટ હોલ જોયો હતો. હવે અમેરિકામાં પણ આપણો પોતાનો ગ્રેટ હોલ હશે, જે ખૂબ જ મહત્વપૂર્ણ છે."

વ્હાઇટ હાઉસમાં ચીન જેવો ગ્રેટ હોલ

આ પ્રસંગે ટ્રમ્પે વ્હાઇટ હાઉસ કોમ્પ્લેક્સમાં થઈ રહેલા બાંધકામની પણ ચર્ચા કરી હતી. તેમણે સમજાવ્યું કે આ પ્રોજેક્ટમાં વિશ્વના શ્રેષ્ઠ કક્ષાના બોલરૂમ અને લશ્કરી સંકુલનો સમાવેશ થાય છે. શિક્ષણ સંબંધિત ચર્ચા પૂરી કર્યા પછી, તેઓ ફરીથી બાંધકામની વાતો પર આવ્યા હતા અને કાર્યક્રમમાં હાજર રહેલા બાળકો તથા તેમના પરિવારોને બાંધકામ સ્થળની મુલાકાત લેવા માટે પ્રોત્સાહિત કર્યા હતા. બાળકોને આ નવું નિર્માણ બતાવવા માટે ટ્રમ્પ વિશેષ ઉત્સાહિત દેખાતા હતા.

હજુ સુધી સત્તાવાર પુષ્ટિ કે નિવેદન નહીં

દરમિયાન, ચીન કે વ્હાઇટ હાઉસ તરફથી શી જિનપિંગની આ મુલાકાત અંગે હજુ સુધી કોઈ સત્તાવાર પુષ્ટિ કે નિવેદન બહાર પાડવામાં આવ્યું નથી. તેમ છતાં, આ જાહેરાત વિશ્વની આ બે મહાસત્તાઓ વચ્ચે ઉચ્ચ-સ્તરીય વાચીત અને સંબંધો સુધારવાની દિશામાં એક મહત્વપૂર્ણ સંકેત પૂરો પાડે છે.

આ પણ વાંચોઃ અંતરિક્ષમાં કોઇ બીમાર પડે તો આ રીતે થાય છે અદ્દભુત સારવાર