- ઉત્તર કોરિયાના તાનાશાહ કિમે પુતિન સાથે કરી મુલાકાત
- પુતિને ઉત્તર કોરિયાના નેતાનું સ્વાગત કર્યું અને હાથ મિલાવ્યો
- રશિયા ઉત્તર કોરિયાને સેટેલાઇટ બનાવવામાં મદદ કરશે: પુતિન
રશિયાના પ્રવાસે ગયેલા ઉત્તર કોરિયાના તાનાશાહ કિમ જોંગ ઉને રાષ્ટ્રપતિ વ્લાદિમીર પુતિન સાથે મુલાકાત કરી છે. આ બેઠક બાદ રશિયન રાષ્ટ્રપતિ પુતિને જાહેરાત કરી હતી કે તેમનો દેશ ઉત્તર કોરિયાને સેટેલાઇટ બનાવવામાં મદદ કરશે. પુતિને કહ્યું હતું કે ઉત્તર કોરિયાએ રોકેટ ટેક્નોલોજીમાં ખૂબ જ રસ દાખવ્યો છે અને તે પોતાનો સ્પેસ પ્રોગ્રામ વિકસાવવાનો પ્રયાસ કરી રહ્યું છે. રશિયા ઉત્તર કોરિયાને સેટેલાઇટ બનાવવામાં મદદ કરશે. પુતિનની આ જાહેરાત ઉત્તર કોરિયા માટે સારા સમાચાર લઈને આવી છે ત્યારે અમેરિકા, દક્ષિણ કોરિયા અને જાપાન માટે તેને મોટો ઝટકો માનવામાં આવી રહ્યો છે.
રશિયાના રાષ્ટ્રપતિ પુતિન બુધવારે ઉત્તર કોરિયાના નેતા કિમ જોંગ ઉન સાથે દેશના દૂરના પૂર્વીય અમુર ક્ષેત્રમાં સ્થિત વોસ્ટોચની કોસ્મોડ્રોમ ખાતે મળ્યા હતા. આ બેઠક દર્શાવે છે કે અમેરિકા સાથે ચાલી રહેલા સંઘર્ષ વચ્ચે બંને નેતાઓના હિતો કેવી રીતે એક થઈ રહ્યા છે. રશિયાની રાજ્ય સમાચાર એજન્સી જણાવ્યું હતું કે કિમ અત્યાધુનિક સુવિધાઓ અને ભારે હથિયારોથી સજ્જ ટ્રેન દ્વારા ઉત્તર કોરિયાની રાજધાની પ્યોંગયાંગથી લાવવામાં આવેલી લિમોઝીનમાં વોસ્ટોચની કોસ્મોડ્રોમ પહોંચ્યા હતા.
તાનાશાહ કિમ જોંગ ઉન રશિયા કેમ પહોંચ્યા?
કોસ્મોડ્રોમમાં હાજર પુતિને ઉત્તર કોરિયાના નેતાનું સ્વાગત કર્યું અને તેમની સાથે હાથ મિલાવ્યો અને કહ્યું હતું કે તેઓ 'કિમને જોઈને ખૂબ ખુશ છે'. રશિયન રાજ્ય મીડિયાએ અહેવાલ આપ્યો છે કે કિમે પુતિનને તેમના વ્યસ્ત શેડ્યૂલમાંથી સમય કાઢીને રશિયાની મુલાકાત લેવા આમંત્રણ આપવા બદલ આભાર માન્યો હતો. બંને નેતાઓ કોસ્મોડ્રોમનું નિરીક્ષણ કર્યા પછી વાતચીત શરૂ કરશે.
આ બેઠકના થોડા સમય પહેલા ઉત્તર કોરિયાએ દરિયામાં બે બેલેસ્ટિક મિસાઈલ છોડી હતી. જાણકારોના મતે ઉત્તર કોરિયા પરમાણુ હથિયારોની સુરક્ષા માટે સેટેલાઇટ ટેક્નોલોજી અને ટેક્નોલોજી શોધી રહ્યું છે ત્યારે યુક્રેન યુદ્ધમાં ફસાયેલા રશિયાને હથિયારોની સખત જરૂર છે. ઉત્તર કોરિયા પાસે સોવિયેત યુગના શસ્ત્રોનો મોટો ભંડાર છે. રશિયા તેને લેવા માંગે છે પરંતુ અમેરિકા અને પશ્ચિમી દેશોએ આ અંગે કડક ચેતવણી આપી છે. આ ચેતવણી છતાં ઉત્તર કોરિયા અને રશિયા વચ્ચેના સંબંધો મજબૂત થતા જોવા મળી રહ્યા છે.
