- પાકિસ્તાનના સિંધ પ્રાંતમાં ડાકુઓએ રોકેટ લોન્ચરથી મંદિર પર હુમલો કર્યો
- જો સીમા હૈદરને પાકિસ્તાન પરત નહીં મોકલે તો મંદિરો પર હુમલો કરશે:પાકિસ્તાની ડાકુ
- હુમલાખોરોએ રવિવારે મંદિરમાં અંધાધૂંધ ગોળીબાર કર્યો તેથી પોલીસ ટીમ ઘટનાસ્થળે દોડી ગઈ
પાકિસ્તાનના દક્ષિણ સિંધ પ્રાંતમાં ડાકુઓની ટોળકીએ રવિવારે (16 જુલાઈ)ના રોજ રોકેટ લોન્ચર વડે હિંદુ મંદિર પર હુમલો કર્યો હતો. એક પોલીસ અધિકારીએ આ માહિતી આપી હતી. હુમલાખોરોએ સિંધ પ્રાંતના કશ્મોર વિસ્તારમાં સ્થાનિક હિંદુ સમુદાય દ્વારા બનાવવામાં આવેલા નાના મંદિર અને લઘુમતી હિંદુ સમુદાયના સભ્યોના નજીકના ઘરો પર હુમલો કર્યો હતો.
પાકિસ્તાની ડાકુઓએ ધમકી આપી હતી કે જો સીમા હૈદરને પાકિસ્તાન પરત નહીં મોકલવામાં આવે તો તેઓ મંદિરો પર હુમલો કરશે. ત્યાર બાદ રવિવારે પાકિસ્તાનના સિંધ પ્રાંતમાં ડાકુઓએ રોકેટ લોન્ચરથી મંદિર પર હુમલો કર્યો હતો. હુમલાખોરોએ રવિવારે મંદિરમાં અંધાધૂંધ ગોળીબાર કર્યો હતો જેના પગલે કશ્મોર-કંથકોટના વરિષ્ઠ પોલીસ અધિક્ષક (એસએસપી) ઈરફાન સમોની આગેવાની હેઠળની પોલીસ ટીમ ઘટનાસ્થળે દોડી ગઈ હતી.
સીમા હૈદરથી ગુસ્સે ભરાયા હુમલાખોરો
પાકિસ્તાનના ડાકુઓએ થોડા દિવસો પહેલા સીમા હૈદર ઝાખરાનીની PUBG લવ સ્ટોરીનો બદલો લેવા કાશ્મીર અને ઘોટકી નદીના વિસ્તારોમાં હિન્દુ ધર્મસ્થાનો અને સમુદાયના સભ્યો પર હુમલો કરવાની ધમકી આપી હતી. પાકિસ્તાનની 4 બાળકોની માતા સીમા હૈદર પોતાનો દેશ છોડીને એક હિન્દુ વ્યક્તિ સાથે રહેવા ભારત આવી છે તેને લઈને વિવાદ થયો છે.
સીમાએ 2019માં ઓનલાઈન ગેમ PubG રમતી વખતે તે વ્યક્તિ સાથે મિત્રતા કરી હતી અને તેના પ્રેમમાં પડી ગઈ હતી. ઉત્તર પ્રદેશ પોલીસના જણાવ્યા અનુસાર, 30 વર્ષની સીમા અને 22 વર્ષીય સચિન મીના દિલ્હી નજીક ગ્રેટર નોઈડાના રબુપુરા વિસ્તારમાં રહે છે. સચિન ત્યાં કરિયાણાની દુકાન ચલાવે છે.
હિન્દુ સમુદાયના 30 લોકોને બંધક બનાવ્યા
આ દરમિયાન પાકિસ્તાનના માનવાધિકાર આયોગ (HRCP) એ કહ્યું છે કે તે સિંધના કશ્મોર અને ઘોટકી જિલ્લાઓમાં કાયદો અને વ્યવસ્થાની બગડતી સ્થિતિના અહેવાલોથી ચિંતિત છે જ્યાં મહિલાઓ અને બાળકો સહિત હિન્દુ સમુદાયના લગભગ 30 સભ્યોની કથિત રીતે બંધક બનાવ્યા હતા.
કરાચીમાં ઘણા પ્રાચીન હિન્દુ મંદિરો છે. પાકિસ્તાનમાં હિન્દુઓ સૌથી મોટો લઘુમતી સમુદાય છે. પાકિસ્તાનની મોટાભાગની હિન્દુ વસ્તી સિંધ પ્રાંતમાં સ્થાયી છે જ્યાં તેઓ મુસ્લિમ રહેવાસીઓ સાથે સંસ્કૃતિ, પરંપરાઓ અને ભાષા વહેંચે છે.
