- ઋષિ સુનક G20 સમિટ માટે ભારત મંડપમ પહોંચ્યા
- ભારત મંડપમ પહોંચતા જ મોદીએ ભારતના જમાઈનું ઉષ્માભર્યું સ્વાગત કર્યું
- મોદી અને સુનક વચ્ચે થોડીવાર વાતચીત થઈ
'ભારતના જમાઈ' અને બ્રિટિશ વડાપ્રધાન ઋષિ સુનક G20 સમિટ માટે ભારત મંડપમ પહોંચ્યા છે. ભારત મંડપમ પહોંચતા જ વડાપ્રધાન મોદીએ તેમનું ઉષ્માભર્યું સ્વાગત કર્યું હતું. મોદીએ સૌપ્રથમ સુનકને હાથ જોડીને અભિવાદન કર્યું અને પછી તેમને ગળે લગાવીને આ વિશાળ સંમેલનમાં તેમનું સ્વાગત કર્યું હતું. આ પછી મોદી અને સુનક વચ્ચે થોડીવાર વાતચીત થઈ હતી.
ખાલિસ્તાન મુદ્દે કહ્યું- હું સહન નહીં કરું
અલગતાવાદી ઘટનાઓ અને કટ્ટરવાદી હિંસા પર બ્રિટિશ પીએમ ઋષિ સુનકે કહ્યું હતું કે, 'હું સ્પષ્ટપણે કહેવા માંગુ છું કે બ્રિટનમાં કોઈપણ પ્રકારનો ઉગ્રવાદ કે હિંસા સ્વીકાર્ય નથી. એટલા માટે અમે ભારત સરકાર સાથે મળીને કામ કરી રહ્યા છીએ. ખાસ કરીને ખાલિસ્તાન તરફી ઉગ્રવાદનો સામનો કરવા માટે. મને નથી લાગતું કે આ યોગ્ય છે. અમારા સુરક્ષા મંત્રી હાલમાં ભારતમાં તેમના સમકક્ષો સાથે વાત કરી રહ્યા હતા. અમારી પાસે ગુપ્ત માહિતી અને માહિતી શેર કરવા માટે એકસાથે કામ કરતા જૂથો છે જેથી કરીને અમે આ પ્રકારના હિંસક ઉગ્રવાદને જડમૂળથી ઉખેડી શકીએ. આ યોગ્ય નથી અને હું યુકેમાં તેને સહન કરીશ નહીં.
FTA પર વાટાઘાટો ચાલુ
ભારત અને બ્રિટન વચ્ચે ફ્રી ટ્રેડ એગ્રીમેન્ટ (FTA) પર ચાલી રહેલી ચર્ચાઓ પર બ્રિટિશ વડાપ્રધાન સુનકે કહ્યું હતું કે, 'મોદીજી અને હું બંને આપણા દેશો વચ્ચે એક વ્યાપક અને મહત્વાકાંક્ષી વેપાર કરાર પૂર્ણ થાય તે જોવા આતુર છીએ. અમે બંને માનીએ છીએ કે એક સારો સોદો હજુ પણ છે પરંતુ વેપાર કરારમાં હંમેશા સમય લાગે છે. અમારે બંને દેશો માટે કામ કરવું પડશે. જો કે આપણે ઘણી પ્રગતિ કરી લીધી છે હજુ પણ સખત મહેનત બાકી છે. પીએમ સાથેના સમીકરણ પર બ્રિટિશ પીએમે કહ્યું હતું કે, મને મોદીજી માટે ખૂબ જ આદર છે અને તેઓ અંગત રીતે મારા પ્રત્યે ખૂબ જ પ્રેમાળ છે. હું આ G20ને ભારત માટે મોટી સફળતા અપાવવામાં વડાપ્રધાન મોદીને ટેકો આપવા માટે ખૂબ જ ઉત્સુક છું.
ભારતના જમાઈની મજાક ઉડાવી
બ્રિટિશ વડા પ્રધાન ઋષિ સુનકનું સાસરૂ ભારત છે. તેમની પત્ની અક્ષતા મૂર્તિ ઈન્ફોસિસ કંપનીના માલિક નારાયણ મૂર્તિની પુત્રી છે. આ કારણથી સુનકને 'ભારતનો જમાઈ' કહેવામાં આવે છે. તેને મજાકના સ્વરમાં લેતાં તેમણે કહ્યું હતું કે G20 નેતાઓની સમિટ માટે તેમની નવી દિલ્હીની મુલાકાત ખૂબ જ ખાસ છે.
