કંગાળ પાકિસ્તાનના રાષ્ટ્રપતિને થવું છે માલામાલ, અલ્વીએ પગાર વધારાની કરી માંગ

• પાકિસ્તાનની આર્થિક સ્થિતિ ખરાબ છતાં રાષ્ટ્રપતિ પગારનાં ભુખ્યા
  
• રાષ્ટ્રપતિએ 1,000-10,000 રૂપિયા નહીં પરંતુ લાખો રૂપિયાનો પગાર વધારો માંગ્યો 
• આરિફ અલ્વીને દર મહિને 2800 ડોલર એટલે કે 8,53,152 પાકિસ્તાની રૂપિયા મળે

પાકિસ્તાનની આર્થિક સ્થિતિ ખરાબ છે. દરેક વ્યક્તિ આ જાણે છે. સ્થિતિ એવી છે કે દેશ દેવા પર ચાલી રહ્યો છે. લોકો રોટી માટે સંઘર્ષ કરી રહ્યા છે. બેરોજગારીના કારણે લોકો પરેશાન છે. જોકે દેશના શાસકોને આની સાથે કોઈ લેવાદેવા નથી. તેની એક જ ઈચ્છા છે અને તે છે પોતાની બેગ ભરવાની. તો પછી આના કારણે સરકારી તિજોરી શા માટે ખાલી થવી જોઈએ?

હકીકતમાં આવું એટલા માટે કહેવામાં આવી રહ્યું છે કારણ કે દેશની બગડતી પરિસ્થિતિ વચ્ચે રાષ્ટ્રપતિ ડો. આરિફ અલ્વીએ પોતાનો પગાર વધારવાની માંગ કરી છે. રાષ્ટ્રપતિએ 1,000-10,000 રૂપિયા નહીં પરંતુ લાખો રૂપિયાનો પગાર વધારો માંગ્યો છે. સૌથી ચોંકાવનારી વાત એ છે કે રાષ્ટ્રપતિએ પગાર વધારવાની માંગ એક નહીં પરંતુ બે વખત કરી છે. પહેલીવાર 1લી જુલાઈ 2021થી અને બીજી વખત 1લી જુલાઈ 2023થી.

પાકિસ્તાની રાષ્ટ્રપતિનો પગાર કેટલો છે?

હાલમાં પાકિસ્તાનના રાષ્ટ્રપતિ આરિફ અલ્વીને દર મહિને 2800 ડોલર એટલે કે 8,53,152 પાકિસ્તાની રૂપિયા મળે છે. જોકે આટલા પૈસાથી પણ પાકિસ્તાની રાષ્ટ્રપતિ ખુશ દેખાતા નથી. જુલાઈ 2021માં તેમણે માંગ કરી હતી કે તેમનો પગાર વધારીને 3360 ડોલર એટલે કે 10,23,782 પાકિસ્તાની રૂપિયા કરવામાં આવે. ત્યારપછી જુલાઈ 2023માં ફરી એક વખત માંગ ઉઠી કે તેમનો પગાર વધારીને 4034 ડોલર (12,29,148.50 પાકિસ્તાની રૂપિયા) કરવામાં આવે.

રાષ્ટ્રપતિના સચિવાલયે આ મહિનાની શરૂઆતમાં તેના સૈન્ય સચિવાલય દ્વારા સચિવ કેબિનેટને એક પત્ર લખ્યો હતો. પ્રમુખના પગારમાં વધારો કરવાની માંગણી સંતોષવામાં આવે તેવું જણાવાયું હતું. રાષ્ટ્રપતિ સચિવાલય વતી કહેવામાં આવ્યું હતું કે પગાર વધારવાના સંબંધમાં 'રાષ્ટ્રપતિના પગાર, ભથ્થાં અને વિશેષાધિકારો (સુધારો) અધિનિયમ 2018'ના ચોથા અનુસૂચિમાં સુધારો કરવો જોઈએ.

રાષ્ટ્રપતિએ ચીફ જસ્ટિસના પગારનો ઉલ્લેખ કર્યો

રાષ્ટ્રપતિના સચિવાલયના સૈન્ય સચિવાલય દ્વારા લખવામાં આવેલા પત્રમાં રાષ્ટ્રપતિને વધુ પગાર કેમ મળવો જોઈએ તેની વ્યાજબી દલીલ પણ કરવામાં આવી છે. તેમાં કહેવામાં આવ્યું છે કે 2021 થી 2023ના સમયગાળામાં પાકિસ્તાનના ચીફ જસ્ટિસનો પગાર બમણો થઈ ગયો છે. તેથી રાષ્ટ્રપતિનો પગાર પણ વધવો જોઈએ. પત્રમાં કહેવામાં આવ્યું છે કે ખુદ રાષ્ટ્રપતિના આદેશ પર ચીફ જસ્ટિસના પગારમાં વધારો કરવામાં આવ્યો છે.

જુલાઈ 2021થી ચીફ જસ્ટિસને દર મહિને 10,24,324 પાકિસ્તાની રૂપિયાનો પગાર મળ્યો હતો. ત્યાર બાદ જુલાઈ 2023થી તેમને 12,29,189 રૂપિયાનો પગાર મળી રહ્યો છે. પત્રમાં કહેવામાં આવ્યું હતું કે, નિયમ મુજબ રાષ્ટ્રપતિનો પગાર ચીફ જસ્ટિસના પગાર કરતાં એક રૂપિયો વધુ હોવો જોઈએ. પાકિસ્તાનના નાણાં મંત્રાલયે પગાર વધારવાની મંજૂરી આપી દીધી છે. આ રીતે જુલાઈ 2021થી પાકિસ્તાનના રાષ્ટ્રપતિને અત્યાર સુધીના તમામ નાણાં ચૂકવવામાં આવશે.