- બ્રિટનના વડાપ્રધાન ઋષિ સુનકે મોરારી બાપુની રામકથામાં હાજરી આપી
- તેઓ અહીં વડાપ્રધાન તરીકે નહીં, પરંતુ એક હિન્દુ તરીકે જોડાયા છે: સુનક
- બાપુ, તમારા આશીર્વાદથી હું આપણા શાસ્ત્રોએ જે રીતે શીખવ્યું છે તે જ રીતે આગળ વધીશ
બ્રિટનના વડાપ્રધાન ઋષિ સુનકે મંગળવારે આધ્યાત્મિક નેતા મોરારી બાપુની રામકથામાં હાજરી આપી હતી. કેમ્બ્રિજ યુનિવર્સિટીમાં મોરારી બાપુની રામકથા થઈ રહી છે. આ દરમિયાન ઋષિ સુનકે પણ મોરારી બાપુના પોડિયમ પર 'જય સિયારામ'ના નારા લગાવતા પુષ્પાંજલિ અર્પણ કરી હતી.
હું એક હિન્દુ તરીકે કથામાં જોડાયો:સુનક
મોરારી બાપુની રામકથા સાંભળવા અહીં આવેલા ઋષિ સુનકે પોતાના સંબોધનમાં જણાવ્યું હતું કે ભારતના સ્વતંત્રતા દિવસ નિમિત્તે મોરારી બાપુની રામકથામાં હાજર રહેવું એ સન્માન અને આનંદની વાત છે. તેમણે કહ્યું હતું કે તેઓ અહીં વડાપ્રધાન તરીકે નહીં, પરંતુ એક હિન્દુ તરીકે જોડાયા છે.
શું કહ્યું ઋષિ સુનકે?
સુનકે કહ્યું હતું કે, 'મારા માટે આસ્થા ખૂબ જ અંગત બાબત છે'. તે મને મારા જીવનના દરેક પાસામાં માર્ગદર્શન આપે છે. વડા પ્રધાન બનવું એ ખૂબ જ સન્માનની વાત છે પરંતુ આ સરળ કાર્ય નથી.આપણે મુશ્કેલ નિર્ણયો લેવા પડશે. અને અમારો વિશ્વાસ મને મારા દેશ માટે શ્રેષ્ઠ કરવા માટે હિંમત અને શક્તિ આપે છે.'
હિંદુ હોવાનો ગર્વ:સુનક
તેમણે કહ્યું હતું કે, 'જ્યારે હું ચાન્સેલર હતો ત્યારે 11 ડાઉનિંગ સ્ટ્રીટ પર દિવાળી પર દીવા પ્રગટાવવાની એક અદ્ભુત અને ખાસ ક્ષણ હતી. 10 ડાઉનિંગ સ્ટ્રીટ ખાતે મારા ડેસ્ક પર ભગવાન ગણેશની સુવર્ણ મૂર્તિ હોવાનું મને ગર્વ છે. સુનકે કહ્યું હતું કે મને બ્રિટિશ અને હિંદુ હોવાનો ગર્વ છે. આ દરમિયાન તેમણે સાઉથ હેમ્પટનમાં તેમના બાળપણને પણ યાદ કર્યું અને કહ્યું કે તે ઘણીવાર તેમના ભાઈ-બહેનો સાથે પડોશમાં બનેલા મંદિરમાં જતો હતો. અને તેમના પરિવાર સાથે હવન, પૂજા, આરતીમાં ભાગ લેતા અને પ્રસાદ વહેંચતા હતા.
સુનકે કહ્યું હતું કે હું આજે અહીંથી રામાયણની સાથે ભગવદગીતા અને હનુમાન ચાલીસાને યાદ કરીને જાઉં છું. મારા માટે ભગવાન રામ જીવનના પડકારોનો સામનો કરવા માટે એક પ્રેરણાદાયી વ્યક્તિ બની રહેશે. બાપુ, તમારા આશીર્વાદથી હું આપણા શાસ્ત્રોએ જે રીતે શીખવ્યું છે તે જ રીતે આગળ વધીશ. તમે જે કરો છો તેના માટે આભાર. તમારા સત્ય, પ્રેમ અને કરુણાના ઉપદેશો હવે પહેલા કરતા વધુ સુસંગત છે.
તમને જણાવી દઈએ કે પીએમ ઋષિ સુનકે મોરારી બાપુને કાળી શાલ પહેરાવી, ત્યારબાદ મોરારી બાપુએ પણ શાલ પહેરાવીને તેમનું અભિવાદન કર્યું હતું. મોરારી બાપુએ સુનકને શિવલિંગ પણ અર્પણ કર્યું હતું.
