South Korea: દક્ષિણ કોરિયાના બેટરી પ્લાન્ટમાં ભીષણ આગ, 20 લોકોનાં મોત

• દક્ષિણ કોરિયાની રાજધાની સિયોલના દક્ષિણ વિસ્તારમાં બેટરી ફેકટરીમાં વિકરાળ આગ
  
• બેટરી પ્લાન્ટમાં લાગેલી આગનું કારણ અકબંધ
• ફાયર બ્રિગેડ અને પોલીસના જવાનો દ્વારા ફેકટરીમાં બચાવ અને રાહતની કામગીરી

 દક્ષિણ કોરિયામાં એક બેટરી પ્લાન્ટમાં ભીષણ આગ લાગવાની ઘટના સામે આવી છે. જેમાં આગને લીધે 20 લોકોનાં મોત થયા છે. જ્યારે 50થી વધુ ઈજાગ્રસ્ત હોવાનું સામે આવ્યું છે. આગને લીધે સમગ્ર વિસ્તારમાં હાહાકાર મચી ગયો છે. સોમવારે એક લીથિયમ બેટરી પ્લાન્ટમાં આ આગ ભભૂકી ઉઠી હતી. આગ એટલી તો વિકરાળ હતી કે એક જવાળાઓ ઉપર જોઈ શકાતી હતી. આગની જાણ થતા પોલીસ અને ફાયર વિભાગનો કાફલો ઘટનાસ્થળે પહોંચી તાબડતોબ બચાવ કામગીરી હાથ ધરી હતી.

બેટરી પ્લાન્ટમાં આગને લીધે દૂરથી ધૂમાડાના ગોટેગોટા જોઈ શકાતા હતા. તેમજ આગની ભયાનકતાને લીધે ફાયર બ્રિગેડની આવન-જાવનથી વાતાવરણ સાયરનથી ગૂંજી ઉઠયું હતુ. તો વળી મૃતકો અને ઈજાગ્રસ્ત કામદારોને પ્લાન્ટથી હોસ્પિટલ લઈ જતી એમ્બ્યૂલન્સની સતત આવન-જાવન ચાલુ થઈ હતી. આગને લીધે ઘટનાસ્થળેથી લોકોને દૂર કરવા પોલીસને ભારે જહેમત ઉઠાવવી પડી હતી. તો વળી ફાયર બ્રિગેડના જવાનોને આગ કાબૂ કરવા પાણી અને કેમિકલનો સતત મારો ચલાવવો પડયો હતો. જો કે ઘટનાસ્થળેથી કામદારોના મૃતદેહો એકપછી એક મળી આવતા પોલીસ અને જવાનોને કામગીરી કરવી પડી હતી. કેટલાક ફાયરના જવાનો પણ આગમાં દાજી જવા પામ્યા હતા.

દક્ષિણ કોરિયાના આંતરિક મંત્રાલયના જણાવ્યા પ્રમાણે સોમવારે સવારે 10.30 વાગ્યાના અરસામાં બેટરી પ્લાન્ટમાં અચાનક આગ લાગી હતી. આ ઘટના દક્ષિણ કોરિયાની રાજધાની સિયોલના હ્યાસોંગમાં બેટરી ફેકટરીમાં બની હતી. પ્લાન્ટમાં આગ લાગવાનું કારણ અકબંધ રહ્યું છે. જો કે ઘટનાસ્થળે રાહત અને બચાવ કામગીરી પૂરજોશમાં છે. આગ લાગી ત્યારે પ્લાન્ટમાં કુલ 70 કામદારો હાજર હોવાનું રજિસ્ટરમાં ઉલ્લેખ હતો. જો કે ભારે જહેમત બાદ આગ તો કાબૂમાં આવી ગઈ છે પરંતુ કામદારોના પરિવારજનોએ ફેકટરી આગળ કરૂણ આક્રંદ અને સૂત્રોચ્ચાર શરૂ કર્યો હતો.