કંગાળ પાકિસ્તાનમાં વીજળીના બિલને લઈને હોબાળો, લોકોમાં ભારે આક્રોશ

• પાકિસ્તાનમાં વીજળીના બિલને લઈને હોબાળો 
  
• દેશમાં વીજળીની કિંમત 64 રૂપિયા પ્રતિ યુનિટ પર પહોંચી 
• વીજળી બિલને લઈને દેશભરમાં ભારે વિરોધ થયો

પાકિસ્તાનમાં વીજળીના બિલને લઈને હોબાળો ચાલી રહ્યો છે અને ગૃહયુદ્ધનો ખતરો પણ વ્યક્ત કરવામાં આવી રહ્યો છે. હકીકતમાં પાકિસ્તાનમાં વીજળીના ભાવ આસમાને પહોંચવા લાગ્યા છે અને લોકો આત્મહત્યા કરવા મજબૂર થઈ રહ્યા છે. પાકિસ્તાની મીડિયા અનુસાર દેશમાં વીજળીની કિંમત 64 રૂપિયા પ્રતિ યુનિટ પર પહોંચી ગઈ છે. વિક્રમી મોંઘવારી વચ્ચે વીજળીના ભાવમાં વધારાએ લોકોની કમર તોડી નાખી છે. આ જ કારણ છે કે રાજકીય અનિશ્ચિતતા વચ્ચે વીજળી બિલને લઈને દેશભરમાં ભારે વિરોધ થઈ રહ્યો છે. દેશના ઘણા વિસ્તારોમાં હિંસા શરૂ થઈ ગઈ છે અને વીજળી ચોરીની ઘટનાઓ પણ વધી રહી છે.

પાકિસ્તાન સરકારે વીજળીના દરમાં ધરખમ વધારો કરવો પડ્યો

પાકિસ્તાનની નાદાર સરકારે IMF પાસેથી 3 અબજ ડોલરની લોન લીધી છે જેથી દેશને ડિફોલ્ટથી બચાવી શકાય. હવે IMFની શરતો મુજબ પાકિસ્તાન સરકારે વીજળીના દરમાં ધરખમ વધારો કરવો પડ્યો છે. પાકિસ્તાનમાં થઈ રહેલા ભારે વિરોધને જોતા કાર્યવાહક વડાપ્રધાન અનવર ઉલ હક કાકરે ઈમરજન્સી બેઠક બોલાવી છે અને 48 કલાકની અંદર વીજળીના દરો ઘટાડવા માટે કહ્યું છે. જોકે, તેણે તાત્કાલિક કોઈ ઘટાડો કરવાની જાહેરાત કરી નથી.

પાકિસ્તાને વીજળી બિલ પર 48 ટકા ટેક્સ લાદ્યો 

પાકિસ્તાનના કેરટેકર પીએમે કહ્યું કે અમે ઉતાવળમાં એવું કોઈ પગલું નહીં ભરીએ જેનાથી દેશને નુકસાન થાય. અમે આવા પગલાં લઈ રહ્યા છીએ જેથી કરીને અમારા રાષ્ટ્રીય તિજોરી પર વધુ બોજ ન પડે. તેમણે કહ્યું હતું કે એવું શક્ય નથી કે જનતા પરેશાન થાય અને ઉચ્ચ અધિકારીઓ અને પીએમ મફત વીજળી લેતા હોય. પાકિસ્તાનમાં વીજળી બિલની હાલત એવી છે કે તે ઘણા વિસ્તારોમાં લોકોની આવક કરતાં વધુ થઈ ગઈ છે. પાકિસ્તાનના વરિષ્ઠ પત્રકાર કામરાન યુસુફના કહેવા પ્રમાણે, તેમને 64 રૂપિયા પ્રતિ યુનિટના દરે વીજળીનું બિલ ચૂકવવું પડે છે.

પાકિસ્તાની અહેવાલ અનુસાર, જ્યાં પહેલા લોકોનું વીજળી બિલ 2 હજારથી 2500 સુધી આવતું હતું હવે તે વધીને 10 હજાર રૂપિયાથી વધુ થઈ ગયું છે. જેના કારણે પહેલાથી જ મોંઘવારી સામે ઝઝૂમી રહેલા લોકો દયનીય બની ગયા છે. આલમ એ છે કે મસમોટા વીજ બિલના કારણે વ્યક્તિને આત્મહત્યા કરવી પડે છે. કહેવામાં આવી રહ્યું છે કે હવે કુલ વીજળી બિલ પર 48 ટકા ટેક્સ લગાવવામાં આવ્યો છે. પૂર્વ વડાપ્રધાન શહેબાઝ શરીફ દ્વારા IMF સાથે વચન આપીને લીધેલી લોનનો માર હવે જનતા ભોગવી રહી છે.