- કમલા હેરિસ ચૂંટણી લડશે તે બાઈડેનની જેમ એક મજાક: ડોનાલ્ડ ટ્રમ્પ
- જો બાઈડેન અમેરિકાના રાષ્ટ્રપતિ પદની રેસમાં યોગ્ય નહોતા : ડોનાલ્ડ ટ્રમ્પ
- અમેરિકામાં નવેમ્બરમાં રાષ્ટ્રપતિ પદની ચૂંટણી યોજાશે
81 વર્ષીય બાઈડેને તેમની રાષ્ટ્રપતિની ઉમેદવારીમાંથી ખસી જવાનો નિર્ણય કર્યો છે. જેથી અમેરિકી રાષ્ટ્રપતિની ચૂંટણીની રેસમાં હવે કમલા હેરિસ ઉતરી ચુક્યાં છે. રિપબ્લિકન ઉમેદવાર ડોનાલ્ડ ટ્રમ્પે કમલા હેરિસને બાઈડેનની જગ્યાએ ચૂંટણી લડવા પર પ્રતિક્રિયા આપી છે. ટ્રમ્પે કહ્યું કે તેમને લાગે છે કે બાઈડેન કરતાં ઉપરાષ્ટ્રપતિ કમલા હેરિસને હરાવવાનું સરળ હશે. ટ્રમ્પે ઉમેર્યું, "કુટિલ જો બાઈડેન રાષ્ટ્રપતિ માટે લડવા માટે લાયક નથી, તે ચોક્કસપણે સેવા આપવા માટે લાયક નથી અને ક્યારેય પણ નથી!"
બાઈડેન દેશના ઈતિહાસમાં સૌથી ખરાબ રાષ્ટ્રપતિ છે: ટ્રમ્પ
પૂર્વ રાષ્ટ્રપતિ ટ્રમ્પે વધુમાં કહ્યું કે કમલા હેરિસનું રાષ્ટ્રપતિ પદના ઉમેદવાર તરીકે ચૂંટણી લડવું એ બાઈડેનની જેમ મજાક છે. ડોનાલ્ડ ટ્રમ્પે બાઈડેનને 'દેશના ઇતિહાસમાં અત્યાર સુધીના સૌથી ખરાબ રાષ્ટ્રપતિ' ગણાવ્યા હતા.
બાઈડેન નકલી સમાચાર દ્વારા રાષ્ટ્રપતિ બન્યા: ટ્રમ્પ
ટ્રુથ સોશિયલ પર ટ્રમ્પે લખ્યું, બિડેન રાષ્ટ્રપતિ બનવા માટે યોગ્ય નથી. તેમના ડોકટરો અને મીડિયા સહિત તેમની આસપાસના દરેક લોકો જાણતા હતા કે તેઓ પ્રમુખ બનવા માટે યોગ્ય નથી. તેણે ખોટું બોલીને અને ફેક ન્યૂઝ બનાવીને રાષ્ટ્રપતિ પદ હાંસલ કર્યું હતું. જો ઉપરાષ્ટ્રપતિ કમલા હેરિસ ડેમોક્રેટિક પાર્ટીના ઉમેદવાર બને છે તો તેમને ચૂંટણીમાં હરાવવા વધુ અનુકૂળ રહેશે.
બાઈડેન પર તેમની ઉમેદવારી પાછી ખેંચવા માટે દબાણ વધી રહ્યું છે
5 નવેમ્બરે યોજાનારી ચૂંટણીમાં 2025થી ચાર વર્ષની મુદત માટે રાષ્ટ્રપતિની પસંદગી કરવામાં આવનાર છે. 1968 પછી આ પ્રથમ વખત છે જ્યારે કોઈ અમેરિકન રાષ્ટ્રપતિએ ફરીથી ચૂંટણીની રેસમાંથી પોતાને દૂર કર્યા છે. અગાઉ 1968માં પ્રમુખ લિન્ડન જોન્સને ફરીથી ચૂંટણી ન લડવાનો નિર્ણય લીધો હતો. ખરાબ સ્વાસ્થ્ય અને યાદશક્તિની ખોટને કારણે, બાઈડેન પર ડેમોક્રેટિક પાર્ટીમાંથી તેમની ઉમેદવારી છોડી દેવાનું દબાણ વધી રહ્યું હતું.
