US President Election 2024 Update: ડોનાલ્ડ ટ્રમ્પને જીતની શુભેચ્છા આપવાનો પુતિનનો ઈનકાર

ડોનાલ્ડ ટ્રમ્પને મલ્લિકાર્જુન ખડગેએ જીતની શુભકામનાઓ પાઠવી

અમેરિકાના રાષ્ટ્રપતિ પદની ચૂંટણીમાં ડોનાલ્ડ ટ્રમ્પ બહુમતી સાથે ફરી રાષ્ટ્રપતિ બનવા જઈ રહ્યા છે ત્યારે ભારતના કોંગ્રેસ મલ્લિકાર્જુન ખડગેએ ટ્રમ્પને જીતની શુભેચ્છાઓ પાઠવી હતી.

ડોનાલ્ડ ટ્રમ્પની જીત અંગે ચીને આપ્યું મહત્ત્વનું નિવેદન

અમેરિકામાં રાષ્ટ્રપતિ પદની ચૂંટણી પૂર્ણ થઈ ગઈ છે. હવે ટ્રમ્પ વિજેતા જાહેર થઈ ગયા છે. ત્યારે ડોનાલ્ડ ટ્રમ્પની જીત અંગે ચીને શુભેચ્છા આપતા જણાવ્યું છે કે, પરસ્પર સન્માનના આધારે કામ કરતા રહીશું. ચીનના વિદેશ મંત્રાલયે અમેરિકા-ચીન નીતિ અંગે આપ્યું હતું નિવેદન. અમેરિકા સાથે સાતત્યપૂર્ણ નીતિ રહી હોવાનું ચીને જણાવ્યું હતું. 

ડોનાલ્ડ ટ્રમ્પની જીત પહેલા અમેરિકાએ હાઈપર સોનિક મિસાઈલનું પરીક્ષણ કર્યું

ડોનાલ્ડ ટ્રમ્પ યુએસ પ્રમુખપદની ચૂંટણીમાં જીતની જાહેરાત પહેલા અમેરિકાએ પોતાની હાઈપરસોનિક મિસાઈલનું પરીક્ષણ કરીને બધા દેશોને ચોંકાવી દીધા છે.

ભૂતપૂર્વ રાષ્ટ્રપતિ ડોનાલ્ડ ટ્રમ્પ અમેરિકી રાષ્ટ્રપતિની ચૂંટણીમાં પોતાની લીડ જાળવી રહ્યા છે, એક રીતે તેમની જીત નક્કી માનવામાં આવે છે. તેમની જીતની જાહેરાતના થોડા સમય પહેલા, યુએસ સંરક્ષણ વિભાગે મિનિટમેન III ઈન્ટરકોન્ટિનેન્ટલ બેલિસ્ટિક મિસાઇલ (ICBM)નું પરીક્ષણ કર્યું હતું

ડોનાલ્ડ ટ્રમ્પને જીતની શુભેચ્છા આપવાનો પુતિને કર્યો ઈનકાર

અમેરિકામાં ફરી એકવાર ડોનાલ્ડ ટ્રમ્પ રાષ્ટ્રપતિ બનશે. જો કે, હજી આની સત્તાવાર રીતે જાહેરાત નથી કરાઈ પરંતુ રાષ્ટ્રપતિ ચૂંટણીના પરિણામોની છબી સ્પષ્ટ થઈ ગઈ છે. વિશ્વના નેતાઓ ટ્રમ્પને જીતની શુભકામના પાઠવી રહ્યા છે. પરંતુ આ દરમિયાન રશિયાના રાષ્ટ્રપતિ વ્લાદિમીર પુતિનનું ચોંકાવનારું નિવેદન સામે આવ્યું છે. પુતિને કહ્યું કે, તેઓ હમણાં ટ્રમ્પને જીતની શુભેચ્છા નહિ આપે. ટ્રમ્પની નીતિઓને જોયા પછી તેઓને શુભકામના આપવામાં આવશે.

યુએસ ચૂંટણીમાં જીત બાદ ડોનાલ્ડ ટ્રમ્પનો વિજય ડાન્સ, વીડિયો થયો વાયરલ

અમેરિકામાં રાષ્ટ્રપતિની ચૂંટણી માટે મતગણતરીમાં જીત જાહેર થયા બાદ ડોનાલ્ડ ટ્રમ્પે પોતાના સમર્થકોને સંબોધિત કર્યા હતા. આ દરમિયાન ટ્રમ્પ સ્ટેજ પર ખુશીથી નાચતા પણ જોવા મળ્યા હતા.  

યુક્રેનના રાષ્ટ્રપતિ ઝેલેન્સકીએ ટ્રમ્પને આપી અભિનંદન, જાણો શું કહ્યું

યુક્રેનના રાષ્ટ્રપતિ વોલોડીમિર ઝેલેન્સકીએ પણ ડોનાલ્ડ ટ્રમ્પને તેમની પ્રભાવશાળી ચૂંટણી જીત બદલ અભિનંદન પાઠવ્યા છે. "મને સપ્ટેમ્બરમાં રાષ્ટ્રપતિ ટ્રમ્પ સાથેની અમારી અદ્ભુત મુલાકાત યાદ છે, જ્યારે અમે યુક્રેન-યુએસ વ્યૂહાત્મક ભાગીદારી, વિજય યોજના અને યુક્રેન સામે રશિયન આક્રમણને સમાપ્ત કરવાના માર્ગો વિશે વાત કરી હતી," ઝેલેન્સકીએ X પર એક પોસ્ટમાં જણાવ્યું હતું.

ડોનાલ્ડ ટ્રમ્પ ખુરશી સંભાળે તે પહેલા ઈરાનના ખરાબ દિવસો શરૂ

ઈરાન દેશનું ચલણ રિયાલ બુધવારે અત્યાર સુધીના સૌથી નીચલા સ્તરે પહોંચી ગયું છે. વર્ષ-2015માં ઈરાની રિયાલ એક ડોલરની સરખામણીએ 32,000 રિયાલ હતું અને આજે સૌથી નીચલા સ્તરે 703,000 પર પહોંચી ગયું છે. 

ડોનાલ્ડ ટ્રમ્પની જીત બાદ ટેસ્લાના શેરમાં જંગી 12 ટકાનો ઉછાળો નોંધાયો

અમેરિકામાં રાષ્ટ્રપતિ પદની ચૂંટણીની મતગણતરી હાથ ધરાઈ હતી. જેમાં છેલ્લે ડોનાલ્ડ ટ્રમ્પ સત્તાવાર રીતે જાહેરા થયા છે. જેના લીધે એલન મસ્કની કંપની ટેસ્લાના શેરમાં 12 ટકાનો જોરદાર ઉછાળો આવ્યો છે. ટેસ્લાના શેર્સ ઉછળતા અમેરિકાની માર્કેટમાં ભારે તેજીના એંધાણ છે.

અમેરિકાના નવા રાષ્ટ્રપતિ ટ્રમ્પે અંગત જીવનમાં ત્રણ લગ્ન કર્યા છે

અમેરિકામાં રાષ્ટ્રપતિ ચૂંટણી વર્ષ-2024ના પરિણામો સ્પષ્ટ થઈ ગયા છે. પૂર્વ રાષ્ટ્રપતિ અને રિપબ્લિકન પાર્ટીના ઉમેદવાર ડોનાલ્ડ ટ્રમ્પે ચૂંટણીમાં ડેમોક્રેટ પાર્ટીના ઉમેદવાર કમલા હેરિસને હરાવીને ઈતિહાસ રચ્યો છે. વર્ષ-2016માં રાષ્ટ્રપતિની ચૂંટણી જીતનાર ડોનાલ્ડ ટ્રમ્પનું રાજકીય જીવન ઉથલપાથલ અને વિવાદોથી ભરેલું રહ્યું છે. તેમના રાજકીય જીવનને દરેક વ્યક્તિ જાણે છે.  

અમેરિકી ચૂંટણી અંગે નાસ્ત્રેદમસ લિફ્ટમેનની આગાહી ખોટી નીકળી 

ચૂંટણી પરિણામો પર અમેરિકાના નોસ્ટ્રાડેમસ એલન લિચમેનની ભવિષ્યવાણીની ખૂબ ચર્ચા થઈ રહી છે. તેમણે કહ્યું હતું કે કમલા હેરિસ આ ચૂંટણી જીતશે, જ્યારે ડોનાલ્ડ ટ્રમ્પ જીતશે. 

ઈઝરાયેલના PM નેતન્યાહૂએ પણ ટ્રમ્પને અભિનંદન પાઠવ્યા

ઈઝરાયલના પીએમ બેન્જામિન નેતન્યાહૂએ સોશિયલ મીડિયા X પર પોસ્ટ કરીને ડોનાલ્ડ ટ્રમ્પને અભિનંદન પાઠવ્યા. તેમણે કહ્યું, “પ્રિય ડોનાલ્ડ અને મેલાનિયા ટ્રમ્પ, ઈતિહાસમાં સૌથી મહાન ફરી આગમન બદલ અભિનંદન! વ્હાઇટ હાઉસમાં તમારું ઐતિહાસિક આગમન અમેરિકા માટે નવી શરૂઆત અને ઈઝરાયલ અને અમેરિકા વચ્ચેના મહાન જોડાણ માટે શક્તિશાળી કટિબદ્ધતા પ્રદાન કરે છે. આ એક મોટી જીત છે! તમારા સાચા મિત્ર બેન્જામિન અને સારા નેતન્યાહૂ

સાંસદ કંગના રણાવતે ડોનાલ્ડ ટ્રમ્પને શુભેચ્છા પાઠવી ફોટા શેર કર્યા

અમેરિકામાં પ્રમુખપદની ચૂંટણીના પરિણામ લગભગ આવી ગયા છે. પૂર્વ રાષ્ટ્રપતિ અને રિપબ્લિકન પાર્ટીના ઉમેદવાર ડોનાલ્ડ ટ્રમ્પે ચૂંટણીમાં ઐતિહાસિક જીત નોંધાવી છે અને ફરી એકવાર અમેરિકાના રાષ્ટ્રપતિ બનવા માટે તૈયાર છે. આ જીત બાદ ટ્રમ્પને દુનિયાભરમાંથી અભિનંદન મળી રહ્યા છે. આવી સ્થિતિમાં ભારતીય જનતા પાર્ટીના સાંસદ અને અભિનેત્રી કંગના રનૌતે પણ ડોનાલ્ડ ટ્રમ્પને તેમની જીત પર અભિનંદન પાઠવ્યા છે.

ચૂંટણીમાં જીત પછી ડોનાલ્ડ ટ્રમ્પે કહ્યું, ‘’ભગવાને મારો જીવ એટલે બચાવ્યો’’

અમેરિકામાં ચૂંટણીમાં વિજેતા થયા પછી ટ્રમ્પે અમેરિકનોનો આભાર માન્યો હતો. ટ્રમ્પે જણાવ્યું કે, ‘’અશકયને શકય કરી બતાવ્યું…અમેરિકી લોકોનાં પરિવાર અને તેઓના ભવિષ્ય માટે હું લડીશ. આગામી ચાર વર્ષ અમેરિકા માટે અગત્યના છે.’’ ટ્રમ્પે વધુમાં કહ્યું કે, ‘’કદાચ! ભગવાને મારો જીવ આ દિવસ માટે બચાવ્યો હતો.’’

અમેરિકામાં ચૂંટણી જીત બાદ ટ્રમ્પને ઓસ્ટ્રેલિયાથી પ્રથમ શુભેચ્છા આવી

અમેરિકામાં રાષ્ટ્રપતિની ચૂંટણી ટ્રમ્પની રિપબ્લિકન પાર્ટીએ જીત નોંધાવી છે. આ પછી, ટ્રમ્પને પણ સોશિયલ મીડિયા પર તેમની જીત માટે અભિનંદન મળવા લાગ્યા. ઓસ્ટ્રેલિયાના પૂર્વ વડાપ્રધાન સ્કોટ મોરિસને સોશિયલ મીડિયા પોસ્ટમાં ડોનાલ્ડ ટ્રમ્પને તેમની જીત બદલ અભિનંદન પાઠવ્યા છે. ટ્રમ્પ સાથેની તસવીર શેર કરતા તેણે લખ્યું- અભિનંદન રાષ્ટ્રપતિ ટ્રમ્પ.

વડાપ્રધાન નરેન્દ્ર મોદીએ ડોનાલ્ડ ટ્રમ્પને જીત બદલ અભિનંદન પાઠવ્યા

વડાપ્રધાન નરેન્દ્ર મોદીએ ડોનાલ્ડ ટ્રમ્પને રાષ્ટ્રપતિ બનવા પર અભિનંદન પાઠવ્યા છે. પીએમએ કહ્યું કે હું મારા મિત્ર ડોનાલ્ડ ટ્રમ્પને ચૂંટણી જીતવા બદલ હૃદયપૂર્વક અભિનંદન આપું છું. અમેરિકી રાષ્ટ્રપતિની ચૂંટણીમાં ડોનાલ્ડ ટ્રમ્પનો જાદુ ફરી એકવાર કામ કરી ગયો છે. તેમણે આ ચૂંટણી જીતીને કમલા હેરિસને હરાવ્યા છે.  

ડોનાલ્ડ ટ્રમ્પની જીત બાદ ભારતીય માર્કેટમાં તેજી, સેન્સેક્સમાં 856 પોઈન્ટનો વધારો

અમેરિકામાં રાષ્ટ્રપતિ પદ માટેની ચૂંટણી ડોનાલ્ડ ટ્રમ્પ જીતી ચુક્યા છે. જ્યારે તેઓના હરિફ એવા કમલા હેરિસને હારનો સામનો કરવાની નોબત આવી છે. આ ખબરને લીધે ભારતીય શેરમાર્કેટમાં શાનદાર તેજી જોવા મળી રહી છે. સેન્સેક્સ અને નિફ્ટીમાં ઉછાળો જોવા મળ્યો છે.

જેડી વેંસ અમેરિકાના નવા ઉપરાષ્ટ્રપતિ

ડોનાલ્ડ ટ્રમ્પે સંબોધનમાં જણાવ્યું કે દરેક અમેરિકીનુ સપનુ પુરુ થશે. સીનેટ પર ફરીથી અમારુ નિયંત્રણ હશે. સાથે જ જણાવ્યું કે જેડી વેંસ અમેરિકાના નવા ઉપરાષ્ટ્રપતિ હશે.  મહત્વનું છે કે ડોનાલ્ડ ટ્રમ્પ અમેરિકાના 47મા રાષ્ટ્રપતિ બન્યા છે. તેમણે કહ્યું કે અમે અમેરિકાના ભવિષ્ય માટે કામ કરીશું. 

 ડોનાલ્ડ ટ્રમ્પ ચૂંટણી જીત્યા બાદ તેમની કંપનીના શેરમાં 40 ટકાનો ઉછાળો  

અમેરિકાના નવા રાષ્ટ્રપતિ ડોનાલ્ડ ટ્રમ્પ બનશે. ટ્રમ્પ ચૂંટણી જીતશે તેની આશા પહેલાથી લગાવવામાં આવી રહી હતી. આ કારણે ટ્રમ્પની જીત પહેલા સોશિયલ મીડિયા કંપનીના શેર 40 ટકા સુધી ઉછળ્યા હતા. ગત રાત્રે ટ્રમ્પ મીડિયા એન્ટ ટેક્નોલૉજી ગૃપના શેરમાં 40 ટકાનો જોરદાર ઉછાળો આવ્યો હતો.જોકે, ટ્રેડિંગના કલાકો પછી ઔપચારિકતાના અંત સુધીમાં શેરમાં 10 ટકાનો વધારો થયો હતો.  

અમેરિકાની ચૂંટણીમાં ભારતીય મૂળના ઉમેદવારો પણ જીત નોંધાવી

ભારતીય મૂળના ઘણા ઉમેદવારો યુએસની ચૂંટણી જીતીને હાઉસ ઓફ રિપ્રેઝન્ટેટિવ ​​પણ બન્યા છે. આ ચૂંટણીમાં સુહાસ સુબ્રમણ્યમ, અમી બેરા, રાજા કૃષ્ણમૂર્તિ, રો ખન્ના, પ્રમિલા જયપાલ અને શ્રી થાનેદાર ગૃહમાં પહોંચ્યા છે.

ડ્રોનાલ્ડ ટ્રમ્પના ભાષણના 10 મહત્વના મુદ્દા

એલન મસ્કના ટ્રમ્પે કર્યા વખાણ

ડોનાલ્ડ ટ્રમ્પે એલન મસ્કના વખાણ કરતા કહ્યું કે આપણ અસંભવને સંભવ કરીને બતાવ્યુ.  એલન મસ્ક અદભૂત વ્યક્તિ છે. 

અમારે બોર્ડર સુરક્ષિત કરવી છે- ટ્રમ્પ 

ડોનાલ્ડ ટ્રમ્પે સંબોધન કરતા જણાવ્યું કે હવે અમારે બોર્ડર સુરક્ષિત કરવવી છે. કાયદાકીય રીતે અમેરિકા આવો. અમેરિકામાં ગેરકાયદેસર એન્ટ્રી બંધ થશે. 

આવી જીત ક્યારેય જોઈ નથી - ટ્રમ્પ

ડોનાલ્ડ ટ્રમ્પે પોતાના મતદારોને સંબોધતા કહ્યું કે અમે મતદાતાઓ માટે બધું જ યોગ્ય કરવા જઈ રહ્યા છીએ. આ એક રાજકીય જીત છે જે આપણા દેશે અગાઉ ક્યારેય જોઈ નથી. 47માં રાષ્ટ્રપતિ તરીકે હું તમારા માટે દરરોજ લડીશ. આ અમેરિકા માટે એક મહાન વિજય છે, જે અમેરિકાને ફરીથી મહાન બનાવશે.

અમેરિકાને ફરીથી એક મહાન રાષ્ટ્ર બનાવીશું -ટ્રમ્પ 

અમેરિકાને મહાન રાષ્ટ્ર બનાવીશું, તેમણે વધુમાં કહ્યું કે આવી જીતની આશા ન હતી. આવી જીત અમેરિકામાં ક્યારેય જોઇ નથી. આ ઐતિહાસિક અને અવિશ્વસનીય જીત છે. કોઇને આ પ્રકારની જીતની આશા ન હતી.  આગામી 4 વર્ષ અમેરિકા માટે મહત્વના હશે. અમને પોપ્યુલર વોટ અને સ્વિંગ સ્ટેટનુ સમર્થન મળ્યું.

અમેરિકાએ અભૂતપૂર્વ જનાદેશ આપ્યો- ટ્રમ્પ 

વધુમાં કહ્યું કે સ્વિંગ સ્ટેટનો સાથ મળ્યો. અમેરિકા ફરીથી મહાન બનશે. અમેરિકાનો પ્રેમ મને પસંદ આવ્યો. અમેરિકા માટે આ સુવર્ણ અવસર છે. મારી સાથે લડાઇમાં મારી સાથે ઉભા રહેવા બદલ તમારો આભાર. 315 ઇલેક્ટોરલ વોટની આશા છે. 

આવી જીત ક્યારેય નથી જોઇ- ડોનાલ્ડ ટ્રમ્પ 

ડોનાલ્ડ ટ્રમ્પ જીત બાદ સંબોધન કરી રહ્યા છે. તેમણે કહ્યું કે આવી જીત મે ક્યારેય જોઇ નથી. મારો દરેક પળ અમેરિકા માટે છે. જનતાએ મને અમેરિકાના 47મા રાષ્ટ્રપતિ તરીકે પસંદગી કરી તે માટે આભાર માનુ છું  

ટ્રમ્પ જીતની નજીક, સ્થાનિક મીડિયા હાઉસનો દાવો

ડોનાલ્ડ ટ્રમ્પે અમેરિકી રાષ્ટ્રપતિની ચૂંટણી જીતી લીધી છે. અમેરિકન મીડિયા હાઉસ ફોક્સ ન્યૂઝે જાહેરાત કરી છે કે ડોનાલ્ડ ટ્રમ્પ આ ચૂંટણી જીતી ગયા છે. ટ્રમ્પની જીત સાથે એ જોવાનું રસપ્રદ રહેશે કે અમેરિકન લોકો રિપબ્લિકનની આ જીતને કેવી રીતે લે છે.

ફ્લોરિડામાં ટ્રમ્પ હેડક્વાર્ટર પહોંચ્યા એલન મસ્ક 

ફ્લોરિડામાં ટ્રમ્પ હેડક્વાર્ટર પર ટ્રમ્પના સમર્થકોની ભીડ જોવા મળી રહી છે. જ્યાં એલન મસ્ક પણ પહોંચ્યા છે. પામ બીચ પર મોટી સંખ્યામાં સમર્થકોની હાજરી જોવા મળી રહી છે. ટ્રમ્પ થોડી વારમાં અહીંથી સંબોધન કરશે. 

ટ્રમ્પને મળી બહુમતી, થોડીવારમાં કરશે સંબોધન

ફોક્સ ન્યૂઝ ન્યૂઝના અહેવાલ મુજૂ રાષ્ટ્રપતિ ચૂંટણીમાં ટ્રમ્પની જીત થઇ છે. ટ્રમ્પને 277 ઇલેક્ટ્રોરલ વોટ મળ્યા છે. કમલા હેરિસને 226 ઇલેક્ટ્રોરલ વોટ મળ્યા છે. આ સાથે ડોનાલ્ડ ટ્રમ્પ અમેરિકાના 47મા રાષ્ટ્રપતિ બનશે. 

ડોનાલ્ડ ટ્રમ્પના કટ્ટર ટેકેદાર એલન મસ્કે ટ્રમ્પની જીત અંગે ટવિટ કર્યું

અમેરિકાના રાષ્ટ્રપતિ પદની મતગણતરી દરમિયાન બિઝનેસમેન એલન મસ્કે ટવિટ કરી ટ્રમ્પને અમેરિકાએ ચોખ્ખી રીતે મેન્ડેટ આપ્યાની વાત કરી હતી. મસ્કે ટવિટ કરીને લખ્યું કે, અમેરિકનો હવે ફરીથી ટ્રમ્પને રાષ્ટ્રપતિ જોવા માગે છે. ચૂંટણી પ્રચારમાં પણ મસ્ક ટ્રમ્પ માટે ભારે પ્રચાર કર્યો હતો.

ડોનાલ્ડ ટ્રમ્પ માટે જ્યોર્જિયાની જીત મહત્ત્વની

જ્યોર્જિયાની જીત ડોનાલ્ડ ટ્રમ્પ માટે ખૂબ જ મહત્વપૂર્ણ માનવામાં આવે છે. સ્વિંગ સ્ટેટ જ્યોર્જિયામાં જીત સાથે ટ્રમ્પને 16 ઈલેક્ટોરલ વોટ મળ્યા છે. જો બાઈડેને વર્ષ-2020માં જ્યોર્જિયામાં નજીવી જીત મેળવી હતી. રાજ્યમાં બે ડેમોક્રેટિક યુએસ સેનેટર છે. જો કે, ટ્રમ્પની જીત સાબિત કરે છે કે જ્યોર્જિયા હજુ પણ રિપબ્લિકન તરફ ઝૂકાવ્યું છે. 

અમેરિકાના રાષ્ટ્રપતિ પદની ચૂંટણીના આશ્ચર્યજનક પરિણામો

અમેરિકી રાષ્ટ્રપતિની ચૂંટણીની અંતિમ ક્ષણોમાં ડેમોક્રેટ ઉમેદવાર કમલા હેરિસે આશ્ચર્યજનક શરૂઆત કરી છે. તેણે અત્યાર સુધીમાં 210 ઈલેક્ટોરલ કોલેજ વોટ મેળવ્યા છે. જ્યારે ડોનાલ્ડ ટ્રમ્પ હજુ પણ જાદુઈ નંબરથી દૂર છે. જીત માટે 270 ઈલેક્ટોરલ કોલેજ વોટની જરૂર છે. જ્યારે ટ્રમ્પને 230 ઈલેક્ટોરલ કોલેજ વોટ મળ્યા છે.

કમલા હેરિસ હાર્વર્ડ યુનિવર્સિટીમાં સંબોધન નહિ કરે

અમેરિકામાં મતગણતરી વચ્ચે કમલા હેરિસે મોટો નિર્ણય લીધો છે. તેણે હાર્વર્ડ યુનિવર્સિટીમાં ભાષણમાં ભાગ ન લેવાનો નિર્ણય લીધો છે. આ પછી મોટી સંખ્યામાં લોકો ત્યાંથી બહાર જવા લાગ્યાં છે. ઉલ્લેખનીય છે કે, હાલમાં ડોનાલ્ડ ટ્રમ્પ 538 માંથી 230 ઈલેક્ટોરલ કોલેજોમાં આગળ છે. આ સમયે, કમલા હેરિસ 210 પર આગળ છે.

અમેરિકાની ચૂંટણીમાં હરિયાણા જેવું અપસેટ, કમલાની સીટો ઝડપથી વધી  

અમેરિકી રાષ્ટ્રપતિની ચૂંટણીમાં હરિયાણા વિધાનસભાના પરિણામો જેવો ઉલટફેર જોવા મળ્યો છે.ભારતમાં ગત મહિનાના 8 ઑક્ટોબરે આવેલા હરિયાણાના પરિણામોમાં, કોંગ્રેસે શરૂઆતના ટ્રેન્ડમાં મોટી લીડ મેળવી હતી, પરંતુ ધીમે ધીમે ભાજપે પુનરાગમન કર્યું અને તેને હરાવ્યું. તેવી જ રીતે આજે જ્યારે અમેરિકાની ચૂંટણીના પરિણામો જાહેર થવા લાગ્યા ત્યારે દરેક જગ્યાએ ડોનાલ્ડ ટ્રમ્પની જીતના આંકડા દેખાવા લાગ્યા. પ્રારંભિક વલણોમાં, તેઓ બહુમતીની નજીક આવ્યા હતા. પરંતુ જેમ જેમ સમય પસાર થઈ રહ્યો છે તેમ તેમ ચિત્ર ઝડપથી બદલાઈ રહ્યું છે. કમલા હેરિસે શાનદાર વાપસી કરી છે અને હવે તે ટ્રમ્પને ટક્કર આપી રહી છે. કમલાની બેઠકો સતત વધી રહી છે અને 210 પર પહોંચી ગઈ છે, જ્યારે ટ્રમ્પ 230 પર અટવાયેલા છે.

ભારતીય મૂળના પ્રતિનિધિ રાઉ ખન્નાનો વિજય

ભારતીય મૂળના ડેમોક્રેટિક પ્રતિનિધિ રાઉ ખન્નાએ યુએસ હાઉસની કેલિફોર્નિયા સીટ માટે ચૂંટણી જીતી છે. કેલિફોર્નિયાના રાઉ ખન્નાએ રિપબ્લિકન અનિતા ચેનને ખૂબ જ સરળતાથી હરાવ્યા છે. રાઉ ખન્ના પ્રથમ વખત વર્ષ-2016માં યુએસ હાઉસમાં ચૂંટાયા હતા, જ્યારે તેમણે અન્ય ડેમોક્રેટ, વર્તમાન પ્રતિનિધિ માઇક હોન્ડાને હરાવ્યા હતા. 

ડોનાલ્ડ ટ્રમ્પ કયા રાજ્યોમાં જીત્યા અને હેરિસ કયા જીત્યા?

રિપબ્લિકન પાર્ટીના ઉમેદવાર ડોનાલ્ડ ટ્રમ્પ અત્યાર સુધી કુલ 24 રાજ્યોમાં જીત નોંધાવી ચુક્યા છે અને પાંચ રાજ્યોમાં લીડ મેળવી રહ્યા છે. જ્યારે તેમના હરિફ અને ડેમોક્રેટિક ઉમેદવાર કમલા હેરિસ અત્યાર સુધી કુલ 17 રાજ્યોમાં જીત મેળવી ચુક્યા છે અને તેઓ 3 રાજયોમાં આગળ છે. 

ટ્રમ્પ ફ્લોરિડામાં સમર્થકોને સંબોધિત કરશે

ડોનાલ્ડ ટ્રમ્પ ફ્લોરિડામાં પામ બીચ કાઉન્ટી કન્વેન્શન સેન્ટર પહોંચ્યા છે. ટ્રમ્પ અહીંથી પોતાના સમર્થકોને સંબોધિત કરી શકે છે. ટ્રમ્પે મંગળવારે જ્યોર્જિયા અને નોર્થ કેરોલિનામાં જીત નોંધાવી હતી.

 અમેરિકામાં મતગણતરીની તાજી સ્થિતિ શું છે?   

અમેરિકાના રાષ્ટ્રપતિ પદની ચૂંટણીમાં મત ગણતરી ચાલી રહી છે. તાજી સ્થિતિમાં ડોનાલ્ડ ટ્રમ્પ 230 વોટ પર આગળ ચાલી રહ્યા છે. અને કમલા હેરિસ 210 પર જીત નોંધાવી છે.

ડોનાલ્ડ ટ્રમ્પે કમલા હેરિસને આ મુદ્દે પાછળ છોડી દીધા

અમેરિકામાં આવતા મહિને પાંચમી નવેમ્બરે યોજાનારી પ્રમુખપદની ચૂંટણી પહેલાં રશિયા-યુક્રેન યુદ્ધ અને ઈઝરાયલ-હમાસ, ઈઝરાયેલ-હિઝબુલ્લાહ અને ઈઝરાયલ-ઈરાન યુદ્ધો અંગે દેશ સમક્ષ પોતાનો સ્પષ્ટ મંતવ્ય અને વ્યૂહરચના રજૂ કરનાર ભૂતપૂર્વ રાષ્ટ્રપતિ ડોનાલ્ડ ટ્રમ્પ તેઓના હરિફ કમલા હેરિસની ટીકા કરી છે. એક ખાનગી કંપનીના રિપોર્ટ અનુસાર ટ્રમ્પે આ મામલે હેરિસ પર મોટી લીડ લીધી છે. રશિયા-યુક્રેન યુદ્ધને હેન્ડલ કરવામાં કોણ શ્રેષ્ઠ છે તે અંગેના સરવેમાં મતદાન અનુસાર, ટ્રમ્પ સાત સ્વિંગ રાજ્યોમાં 50 ટકા વોટ સાથે હેરિસના 39 ટકાથી આગળ છે.

ટ્રમ્પે મિસોરી અને ઓક્લાહોમામાં જીતનો ધ્વજ લહેરાવ્યો  

પૂર્વ રાષ્ટ્રપતિ ડોનાલ્ડ ટ્રમ્પે મિસોરી અને ઓક્લાહોમામાં પણ જીત મેળવી છે. જે બાદ ટ્રમ્પે 101 મતદારો સાથે અને કમલા હેરિસને 71 મતદારો સાથે મોખરાનું સ્થાન મળ્યું છે. અમેરિકી રાષ્ટ્રપતિની ચૂંટણી જીતવા માટે 270ની જરૂર છે.

અમેરિકામાં રાજા કૃષ્ણમૂર્તિ ફરી જીત્યા

ડેમોક્રેટિક પાર્ટીના નેતા રાજા કૃષ્ણમૂર્તિ ફરી એકવાર ઈલિનોઇસથી જીત્યા. કૃષ્ણમૂર્તિ પ્રથમ વખત વર્ષ-2016માં કોંગ્રેસ યુએસ સંસદ પદ માટે ચૂંટાયા હતા. ડેમોક્રેટિક પાર્ટીના રાજા કૃષ્ણમૂર્તિએ 8મી કૉંગ્રેસનલ ડિસ્ટ્રિક્ટ ઑફ ઈલિનોઇસમાંથી યુએસ હાઉસ ઑફ રિપ્રેઝન્ટેટિવ્સમાં ફરીથી ચૂંટણી જીતી છે.

 અમેરિકામાં મતગણતરી વચ્ચે એલન મસ્ક સાથે ડોનાલ્ડ ટ્રમ્પે વાતચીત કરી

અમેરિકામાં રાષ્ટ્રપતિની ચૂંટણી માટે મતગણતરી ચાલુ છે. ડેમોક્રેટ કમલા હેરિસ અને રિપબ્લિકન ડોનાલ્ડ ટ્રમ્પ વચ્ચે જોરદાર ટક્કર છે. આવી સ્થિતિમાં શું પરિણામ આવે છે તે જોવું રસપ્રદ રહેશે. આ દરમિયાન ડોનાલ્ડ ટ્રમ્પ અને એલોન મસ્કની તસવીરો પણ સોશિયલ મીડિયા પર વાયરલ થઈ રહી છે.

અમેરિકાના 7 સ્વિંગ રાજ્યોની અત્યારે શું સ્થિતિ છે?

અમેરિકામાં રાષ્ટ્રપતિ ચૂંટણી બાદ મત ગણતરી પૂરજોશમાં ચાલી રહી છે. એવામાં 192 ઈલેકટોરલ બેઠકો પર કમલા હેરિસ આગળ ચાલી રહ્યાં છે. જ્યારે ડોનાલ્ડ ટ્રમ્પે 230 સીટો પર લીડ મેળવી લીધી છે. આ દરમ્યાન સાત સ્વિંગ સ્ટેટની શું સ્થિતિ છે જાણો...

એરિઝોના - ટ્રમ્પ આગળ છે

જ્યોર્જિયા - ટ્રમ્પ આગળ છે

મિશિગન - હેરિસ અગ્રણી

નેવાડા - હજુ સુધી કોઈ પરિણામ નથી

ઉત્તર કેરોલિના - ટ્રમ્પની જીત

પેન્સિલવેનિયા - ટ્રમ્પ આગળ

વિસ્કોન્સિન – ટ્રમ્પ આગળ

ટ્રમ્પે વધુ ચાર રાજ્યોમાં જીત નોંધાવી

અમેરિકી રાષ્ટ્રપતિની ચૂંટણીમાં રિપબ્લિકન ડોનાલ્ડ ટ્રમ્પ વધુ ચાર રાજ્યો જીતતા જોવા મળી રહ્યા છે. જેમાં મહત્વના રાજ્યોમાંના એક ટેક્સાસનો સમાવેશ થાય છે, જ્યારે ડેમોક્રેટ કમલા હેરિસ ડેલાવેરમાં જીત્યા છે, ટ્રમ્પ નોર્થ ડાકોટા, સાઉથ ડાકોટા અને વ્યોમિંગમાં પણ જીત્યા છે.

ડોનાલ્ડ ટ્રમ્પના ટેકેદારો એકઠા થયા

રિપબ્લિકન ઉમેદવાર ડોનાલ્ડ ટ્રમ્પ અને તેઓના મિત્ર જેડી વેંસના ટેકેદાર અને અભિયાન કાર્યકર્તા ચૂંટણીના પરિણામો જાણવા માટે એકઠા થયા છે. ફ્લોરિડામાં વેસ્ટ પામ બીચ પર કાઉન્ટી કન્વેન્શન સેન્ટરથી સમર્થકોનો વીડિયો સામે આવ્યો છે.  

કયા રાજ્યમાં કોણ જીતે છે?

અમેરિકામાં અત્યારે રાષ્ટ્રપતિ પદની ચૂંટણી બાદ મત ગણતરી હાથ ધરાઈ છે. જેમાં બે મહત્ત્વના ઉમેદવારો કમલા હેરિસ અને ડોનાલ્ડ ટ્રમ્પ વચ્ચે રેસ છે. 

કમલા હેરિસે કોલોરાડો, કનેક્ટિકટ, ડેલવેર, ઈલિનોઈસ, મેસેચ્યુસેટ્સ, મેરીલેન્ડ, ન્યૂ જર્સી, ન્યૂયોર્ક, રોડ આઈલેન્ડ અને વર્મોન્ટ સહિત અનેક ડેમોક્રેટિક ગઢમાં જીતનો દાવો કર્યો છે.

જયારે બીજી તરફ ટ્રમ્પ, પરંપરાગત રીતે લાલ રાજ્યો, અલાબામા, અરકાનસાસ, ફ્લોરિડા, ઇન્ડિયાના, કેન્ટુકી, લ્યૂઇસિયાના, મિઝોરી, મિસિસિપી, મોન્ટાના, નોર્થ ડાકોટા, નેબ્રાસ્કા, ઓહિયો, ઓક્લાહોમા, સાઉથ કેરોલિના, સાઉથ ડાકોટા, ટેનેસી, ટેક્સાસમાં પ્રભુત્વ ધરાવે છે. ઉટાહ વેસ્ટ વર્જિનિયા અને વ્યોમિંગમાં ટ્રમ્પ જીતી રહ્યા છે.