અમેરિકા: ઈલિનોઈસમાં ચાકુબાજીમાં ચાર લોકોનાં મોત, સાત ઈજાગ્રસ્ત

• ઈલિનોઈસમાં ચાકુબાજીને લઈ સમગ્ર વિસ્તારમાં ચકચાર મચી
  
• પોલીસે આરોપીની અટકાયત કરી આગળની કાર્યવાહી હાથ ધરી
• ઈલિનોઈસમાં હુમલાની ઘટના બાદ પોલીસે સુરક્ષા વધારી

અમેરિકાના ઉત્તરી ઈલિનોઈસમાં છરી વડે હુમલાની ઘટનાથી લોકોમાં ભયનો માહોલ ફેલાયો છે. આ ભયાનક ઘટનામાં ચાર લોકોનાં મોત થયા હતા અને સાત અન્ય ઘાયલ થયા હતા. અધિકારીઓએ આ માહિતી આપી હતી. રોકફોર્ડ પોલીસ વડા કાર્લા રેડે જણાવ્યું હતું કે 22 વર્ષીય શંકાસ્પદ પોલીસ કસ્ટડીમાં છે અને તેની પૂછપરછ કરવામાં આવી રહી છે. તેમણે કહ્યું કે ઈજાગ્રસ્તોમાં એક વ્યક્તિની હાલત ગંભીર છે. રેડે પત્રકારોને કહ્યું, “મારા વિચારો આ સમયે પીડિતોના પરિવારો સાથે છે.

તેમણે જણાવ્યું હતું કે, રોકફોર્ડ પોલીસને બુધવારે સ્થાનિક સમયાનુસાર બપોરે 1.14 કલાકે પહેલો કોલ આવ્યો હતો, ત્યારબાદ બીજા ઘણા ફોન આવ્યા હતા. પોલીસ વડાએ જણાવ્યું હતું કે હાલમાં આ ઘટનામાં અન્ય કોઈની સંડોવણી હોવાની શંકા નથી અને "આવો જઘન્ય અપરાધ કરવા પાછળના શંકાસ્પદના હેતુ વિશે અમને હજુ સુધી ખબર નથી." રોકફોર્ડ પોલીસે શરૂઆતમાં અહેવાલ આપ્યો હતો કે આ ઘટનામાં પાંચ લોકો ઘાયલ થયા છે, પરંતુ વિન્નેબેગો કાઉન્ટી શેરિફ ઓફિસના જનસંપર્ક અધિકારી કોરી હિલીયાર્ડે સાંજે કહ્યું કે કુલ સાત લોકો ઘાયલ થયા છે.જેમાં 2 મહિલા અને 2 પુરૂષોના મોત થયા હતા

અધિકારીના જણાવ્યા અનુસાર, ત્રણ લોકોનું ઘટનાસ્થળે જ મોત થયું હતું જ્યારે ચોથાનું હોસ્પિટલમાં મોત થયું હતું. પોલીસે જણાવ્યું કે મૃતકોમાં 15 વર્ષની છોકરી, 63 વર્ષની મહિલા, 49 વર્ષીય પુરૂષ અને 22 વર્ષીય યુવકનો સમાવેશ થાય છે. ચારેયની ઓળખ જાહેર કરવામાં આવી નથી. આ ઘટનાના થોડા દિવસો પહેલા, રોકફોર્ડમાં વોલમાર્ટના એક કિશોર કર્મચારીની સ્ટોરની અંદર છરીના ઘા મારીને હત્યા કરવામાં આવી હતી. "આજે, અમે અમારા સમુદાયના નિર્દોષ સભ્યો સામે હિંસાના બીજા ભયાનક કૃત્યથી આઘાત અનુભવીએ છીએ," રોકફોર્ડના મેયર ટોમ મેકનામારાએ કહ્યું. "હવે જ્યારે શંકાસ્પદ વ્યક્તિ કસ્ટડીમાં છે, અમારી પ્રાથમિક ચિંતા એ સુનિશ્ચિત કરવાની છે કે આ હિંસાથી સીધા પ્રભાવિત લોકોને સમર્થન આપવામાં આવે," તેમણે કહ્યું.