- ભારત-ફિલિપાઈન્સનો આ સોદો 'ડ્રેગન'ને ચકિત કરશે
- ભારતની બ્રહ્મપુત્રા નદી પરથી બ્રહ્મોસ મિસાઈલ નામ આપવામાં આવ્યું
- ભારતે ફિલિપાઈન્સ સાથે વર્ષ-2022માં મિસાઈલ વેચવાના કરાર કર્યા હતા
ભારતને પાડોશી દેશ એવા ચીન અને પાકિસ્તાન સાથે વર્ષોથી ઘર્ષણ થતું રહ્યું છે. એવામાં ગમે તે સમયે યુદ્ધ જેવી સ્થિતિ સર્જાય તો મિસાઈલ કામ આવે એ માટે ભારતે વર્ષો પહેલાં બ્રહ્મોસ મિસાઈલ ડેવલપ કરી છે. અને આ મિસાઈલનો પહેલો સેટ ફિલિપાઈન્સને સોંપવા જઈ રહ્યું છે. 2022 માં આ હથિયાર પ્રણાલી માટે બંને દેશો વચ્ચે 375 મિલિયન યુએસ ડોલરના સોદા પર હસ્તાક્ષર કરવામાં આવ્યા હતા.
બ્રહ્મોસ મિસાઇલ
ચીનની રણનીતિનો જવાબ આપવા માટે ભારત બ્રહ્મોસ સુપરસોનિક ક્રૂઝ મિસાઈલની પ્રથમ બેચ શુક્રવારે એટલે કે આજે ફિલિપાઈન્સને સોંપી શકે છે. આ સમગ્ર મામલા સાથે જોડાયેલા લોકોએ આ માહિતી આપી છે. સૂત્રોએ જણાવ્યું કે આ હથિયાર પ્રણાલીના સપ્લાય માટે દક્ષિણ પૂર્વ એશિયાઈ દેશ ફિલિપાઈન્સ સાથે યુએસ $375 મિલિયનના કરાર થયાના બે વર્ષ બાદ આ સપ્લાય થવા જઈ રહ્યો છે. ફિલિપાઈન્સને જે મિસાઈલો આપવામાં આવી રહી છે તે નાની આવૃત્તિની છે.
ફિલિપાઇન્સ સાથે કરાર કરવામાં આવ્યો હતો
સૂત્રોએ જણાવ્યું હતું કે ભારતીય વાયુસેનાનું એક મિલિટરી ટ્રાન્સપોર્ટ એરક્રાફ્ટ મિસાઇલ અને લોન્ચર લઈને ફિલિપાઈન્સમાં પહોંચી શકે છે. ભારતે જાન્યુઆરી 2022માં ફિલિપાઈન્સ સાથે મિસાઈલની ત્રણ બેટરીની સપ્લાય માટે કરાર પર હસ્તાક્ષર કર્યા હતા. ફિલિપાઈન્સ પહેલો દેશ હશે જેને ભારત અત્યાધુનિક બ્રહ્મોસ મિસાઈલ સપ્લાય કરશે.
ચીન સાથે તણાવ છે
ઉલ્લેખનીય છે કે ફિલિપાઈન્સને આ મિસાઈલ સિસ્ટમ એવા સમયે મળી રહી છે જ્યારે દક્ષિણ ચીન સાગરમાં ચીન સાથે સતત સંઘર્ષના અહેવાલો આવી રહ્યા છે. બ્રહ્મોસ સુપરસોનિક ક્રુઝ મિસાઈલ હસ્તગત કર્યા બાદ ફિલિપાઈન્સની તાકાત વધશે. ફિલિપાઈન્સ બ્રહ્મોસ મિસાઈલ સિસ્ટમની ત્રણ બેટરીને તેના દરિયાકાંઠાના વિસ્તારોમાં તૈનાત કરશે જેથી આ ક્ષેત્રમાં કોઈપણ ખતરા સામે રક્ષણ મળી શકે.
બ્રહ્મોસ ઘાતક મિસાઇલોમાં સામેલ છે
તેનું નામ બ્રહ્મપુત્રા અને મોસ્કવા નદીઓ પરથી રાખવામાં આવ્યું છે. બ્રહ્મોસ મિસાઇલોને બ્રહ્મોસ એરોસ્પેસ દ્વારા વિકસાવવામાં આવી છે, જે ડિફેન્સ રિસર્ચ એન્ડ ડેવલપમેન્ટ ઓર્ગેનાઇઝેશન (DRDO) અને રશિયાના માશિનોસ્ટ્રોયેનિયા દ્વારા સ્થાપિત સંયુક્ત સાહસ કંપની છે. ઈન્ડોનેશિયા, વિયેતનામ, થાઈલેન્ડ અને મલેશિયા પણ વિશ્વની સૌથી ઘાતક મિસાઈલોમાંથી એક બ્રહ્મોસ ખરીદવા માટે ભારત સાથે વાતચીત કરી રહ્યા છે. ખાસ વાત એ છે કે આ તમામ દેશોનો ચીન સાથે દરિયાઈ સરહદ વિવાદ છે.
