આસો વદ ચૌદસ એટલે કે દિવાળીના આગલા દિવસે ઉજવાતી કાળીચૌદસ (રૂપ ચૌદસ કે નરક ચૌદસ)નું ધાર્મિક, આધ્યાત્મિક અને જ્યોતિષીય દૃષ્ટિએ અત્યંત મોટું મહત્ત્વ છે. આ દિવસને મહાકાળી, મહાકાલ અને યમરાજની ઉપાસનાનો વિશેષ દિવસ માનવામાં આવે છે. લોકવાયકા મુજબ આ રાત્રિએ નકારાત્મક શક્તિઓ, અદૃશ્ય બાધાઓ, ગ્રહ દોષો અને જીવનના કષ્ટોનું નિવારણ લાવવા માટેની સાધનાઓ ખૂબ જ ફળદાયી નીવડે છે.
જીવનમાં અચાનક ઊભી થતી મુશ્કેલીઓ, માનસિક અશાંતિ, આર્થિક ભીડ અને શત્રુપીડાથી છુટકારો મેળવવા માટે જ્યોતિષશાસ્ત્ર અને તંત્રશાસ્ત્રમાં કેટલાક સરળ અને સચોટ ઉપાયો જણાવવામાં આવ્યા છે. તેના વિશે જાણીએ.
આર્થિક સંકટ અને દેવાથી મુક્તિ મેળવવા
જો તમે લાંબા સમયથી આર્થિક તંગી, વ્યાપારમાં નુકસાન કે દેવાના બોજ હેઠળ દબાયેલા હોવ, તો કાળીચૌદસની રાત્રિ લક્ષ્મીજીની સાથે મહાકાળીને પ્રસન્ન કરવાની રાત્રિ છે.
- ઉપાય : કાળીચૌદસની રાત્રે સ્નાન કર્યા પછી લાલ રંગના વસ્ત્ર ધારણ કરો. ઘરમાં માતા લક્ષ્મી અને મહાકાળીની પ્રતિમા સમક્ષ તલના તેલનો દીવો પ્રગટાવો. ત્યારબાદ ૐ હ્રીં ક્લીં મહાલક્ષ્મ્યૈ નમઃ અથવા ૐ ક્રોં કાલિકાયૈ નમઃ મંત્રની એકાક્ષરી કે 11 માળા જાપ કરો. પૂજા પૂર્ણ થયા પછી પાંચ અખંડ કોડીઓ અને થોડા પીળા ચોખા લાલ કપડામાં બાંધીને તમારી તિજોરી કે ધન રાખવાના સ્થાન પર મૂકી દો. આનાથી ધન આગમનના નવા માર્ગો ખુલે છે.
ગ્રહ દોષ અને શનિ-રાહુની પીડા શાંત કરવા
જો કુંડળીમાં શનિ, રાહુ કે કેતુની મહાદશા અથવા પનોતી ચાલતી હોય અને તેના કારણે અશુભ પરિણામો મળતા હોય, તો કાળીચૌદશની રાત્રિ આ ગ્રહોના દોષ નિવારવા માટે શ્રેષ્ઠ માનવામાં આવે છે.
- ઉપાય : એક લોખંડની વાટકીમાં સરસવનું તેલ લો અને તેમાં થોડા કાળા તલ નાખો. ત્યારબાદ તે તેલમાં તમારો ચહેરો જોઈને (છાંયા જોઈને) કોઈ જરૂરિયાતમંદ વ્યક્તિને અથવા શનિ મંદિરમાં દાન કરો. આ ઉપાય કરવાથી કુંડળીના અશુભ ગ્રહોનો પ્રભાવ ઓછો થાય છે અને અચાનક આવતી મુશ્કેલીઓ ટળે છે.
પીપળાના વૃક્ષની પૂજા અને દીપદાન
ઘણી વખત પિતૃદોષ કે અજ્ઞાત બાધાઓના કારણે પરિવારમાં પ્રગતિ અટકી જાય છે અને અશાંતિ રહે છે.
- ઉપાય : કાળીચૌદશની સાંજે અથવા રાત્રે નજીકના પીપળાના વૃક્ષની નીચે સરસવના તેલનો દીવો પ્રજ્વલિત કરવો અને પીપળાના મૂળમાં પાણી તથા મીઠાઈ ચડાવવી. વૃક્ષની સાત પ્રદક્ષિણા કરવી. માન્યતા છે કે આનાથી પિતૃઓ પ્રસન્ન થાય છે અને ઘરમાં સુખ-શાંતિ તથા વંશવૃદ્ધિના યોગ બને છે
નોકરી કે ધંધામાં આવતી અડચણો દૂર કરવા
જો તમારા વેપારમાં સતત નુકસાન થતું હોય અથવા નોકરીમાં ઉપરી અધિકારીઓ કે સહકર્મીઓ દ્વારા અડચણો ઊભી કરવામાં આવતી હોય, તો આ પ્રયોગ કરી શકાય.
- ઉપાય : કાળીચૌદસની રાત્રે એક આખું લીંબુ લો અને તેમાં ચારેય ખૂણામાં ચાર લવીંગ ખોસી દો. ત્યારબાદ આ લીંબુને તમારા ઇષ્ટદેવ અથવા હનુમાનજીના ચરણોમાં મૂકીને તમારા કાર્યમાં આવતી અડચણો દૂર કરવા પ્રાર્થના કરો. બીજા દિવસે સવારે તેને નિર્જન સ્થાને અથવા ચાર રસ્તે મૂકીને પાછા વળીને જોયા વગર ઘરે પાછા આવી જવું.
રાત્રિના સમયે અજાણ્યા ભય કે દુઃસ્વપ્નોથી રક્ષણ માટે
જે લોકોને રાત્રે અચાનક ડર લાગતો હોય, ખરાબ કે ડામાડોળ સપનાં આવતા હોય અથવા અનિદ્રાની સમસ્યા રહેતી હોય, તેમણે આ ઉપાય અપનાવવો જોઈએ.
- ઉપાય : કાળીચૌદશની રાત્રે થોડી પીળી સરસવ અને કાળા તલ લઈને એક કાળા રંગના નાના કપડામાં બાંધીને પોટલી બનાવી લો. આ પોટલીને સૂતી વખતે તમારા તકીયાની નીચે અથવા પલંગ પાસે મૂકી રાખો. બીજા દિવસે સવારે તેને ઘરની બહાર કોઈ પવિત્ર કે નિર્જન જગ્યાએ દટી દેવી અથવા વહેતા પાણીમાં પધરાવી દેવી. આનાથી માનસિક ભય દૂર થાય છે.
અટકેલા કાર્યો પાર પાડવા રાઈ અને મીઠાનો પ્રયોગ
લાંબા સમયથી કોઈ મહત્ત્વનું કામ અટકેલું હોય, કોર્ટ-કચેરીના ધક્કા ખાવા પડતા હોય અથવા લાખ પ્રયત્નો છતાં સફળતા ન મળતી હોય તો આ ઉપાય કારગર સાબિત થાય છે.
- ઉપાય : કાળીચૌદસની રાત્રે થોડું આખું મીઠું (મીઠાંના ગાંગડા) અને થોડી રાઈના દાણા મુઠ્ઠીમાં લઈને ઘરના દરેક સભ્યના માથા પરથી ઘડિયાળની દિશામાં સાત વાર ઉતારી લો. ત્યારબાદ તેને ઘરની બહાર કોઈ ચોક કે ચાર રસ્તા પર પાછળ જોયા વગર ફેંકી દો. આનાથી નકારાત્મક નજર ઉતરી જાય છે અને અટકેલા કાર્યોના માર્ગ ખુલે છે.
ઘરની નકારાત્મક ઊર્જા અને વાસ્તુદોષ દૂર કરવા
ઘરમાં પારિવારિક કંકાશ રહેતો હોય અથવા અશાંતિનું વાતાવરણ હોય તો કાળીચૌદસની રાત્રે આ ઉપાય અચૂક કરવો જોઈએ.
- ઉપાય : રાત્રે 12 વાગ્યાની આસપાસ (મધ્યરાત્રિએ) ઘરના દરેક ખૂણામાં થોડું મીઠું છાંટવું અને સવારે સૂર્યોદય પહેલાં તે મીઠાને સાફ કરીને ઘરની બહાર ફેંકી દેવું. જ્યોતિષશાસ્ત્ર મુજબ મીઠું વાતાવરણની નકારાત્મક ઊર્જાને શોષી લે છે. આ ઉપરાંત, ઘરના મુખ્ય દરવાજા પર લીંબુ અને મરચાં લટકાવવાની પરંપરા પણ આ દિવસે નિભાવવામાં આવે છે, જે નજર દોષથી રક્ષણ આપે છે.
કાળીચૌદસની રાત્રે કઈ બાબતોની સાવચેતી રાખવી?
આ રાત્રિએ આધ્યાત્મિક ઊર્જા ઉચ્ચ સ્તરે હોય છે, તેથી કેટલીક બાબતોનું વિશેષ ધ્યાન રાખવું જરૂરી છે.
- સકારાત્મક વિચારો : રાત્રિના સમયે મનમાં નકારાત્મક વિચારો કે ડર ન લાવવો. હનુમાન ચાલીસા કે મહામૃત્યુંજય મંત્રનો જાપ કરવો શ્રેષ્ઠ છે.
- શૂન્ય આચાર-વિચાર : રાત્રે વણજોઇતી કે અજાણી જગ્યાએ એકલા જવાનું ટાળવું જોઈએ.
- સાત્વિકતા : આ દિવસે સાત્વિક આહાર અને વિચારો અપનાવવા જોઈએ. માંસાહાર અથવા તામસિક ભોજનથી દૂર રહેવું.
આ પણ વાંચો: Mahakali Temples in India: શક્તિ ઉપાસનાનાં પ્રાચીન કેન્દ્રો છે મહાકાળી માતાનાં આ મંદિરો
(Disclaimer: આ સમાચારમાં આપવામાં આવેલી માહિતી ધાર્મિક માન્યતાઓ અને સામાન્ય માહિતી પર આધારિત છે. (sandesh news) સંદેશ ન્યૂઝ આની પુષ્ટિ કરતું નથી.)