દિવાળીના તહેવારોની શરુઆત સાથે જ બજારો રોશની અને ગ્રાહકોની ખરીદીથી ધમધમી ઊઠે છે. ધનતેરસના પવિત્ર દિવસે નવી વસ્તુઓ, સોનું, ચાંદી, દાગીના કે વાસણો ખરીદવાની પરંપરા સદીઓથી ચાલી આવે છે. ધાર્મિક માન્યતા અનુસાર, આ દિવસે નવી વસ્તુઓ ખરીદીને ઘરે લાવવાથી ધનની દેવી લક્ષ્મીજી અને ભગવાન ધનવંતરીના આશીર્વાદ પ્રાપ્ત થાય છે, જેનાથી ઘરમાં સુખ, શાંતિ, સુખાકારી અને સમૃદ્ધિનો વાસ થાય છે. જોકે, વર્તમાન સમયમાં વધતી જતી મોંઘવારીના કારણે દરેક વ્યક્તિ માટે સોના કે ચાંદીની વસ્તુઓ ખરીદવી શક્ય હોતી નથી. પરંતુ, જ્યોતિષશાસ્ત્ર અને શાસ્ત્રો અનુસાર, સોના-ચાંદી સિવાય પણ કેટલીક અત્યંત સસ્તી અને શુભ વસ્તુઓ છે, જે માત્ર ₹100 કે તેનાથી ઓછા બજેટમાં ખરીદીને ઘરમાં લાવવાથી સમાન ફળ મળે છે.
ધનતેરસ પર ઘરે લાવવા માટેની 7 પવિત્ર અને શુભ વસ્તુઓ:
સાવરણી: ધનતેરસના દિવસે નવી સાવરણી (ઓછામાં ઓછી બે) ખરીદવી ખૂબ જ શુભ ગણાય છે. સાવરણીને માતા લક્ષ્મીનું પ્રતીક માનવામાં આવે છે, જે ઘરમાંથી ગરીબી, નકારાત્મક ઊર્જા અને દરિદ્રતાને દૂર કરે છે.
આખા ધાણા (બીજ): આખા ધાણા સમૃદ્ધિનું પ્રતીક છે. ધનતેરસ પર ધાણા ખરીદીને પૂજામાં દેવી લક્ષ્મીને અર્પણ કરવાથી આર્થિક તંગી દૂર થાય છે અને નાણાકીય સ્થિતિ સુધરે છે.
નવું મીઠું: આ દિવસે મીઠું ખરીદવું ખૂબ જ ફળદાયી માનવામાં આવે છે. નવું મીઠું ઘરમાં લાવવાથી વાસ્તુદોષ દૂર થાય છે અને ઘરની અંદર સકારાત્મક ઊર્જાનો સંચાર થાય છે.
હળદરનો ગઠ્ઠો: હળદરને પવિત્રતા અને સૌભાગ્ય સાથે જોડવામાં આવે છે. આ દિવસે આખી હળદર ખરીદીને પૂજા સ્થળ પર અર્પણ કરવાથી ધન-ધાન્યમાં વૃદ્ધિ થાય છે.
ગોમતી ચક્ર: માતા લક્ષ્મીને ગોમતી ચક્ર અતિ પ્રિય છે. ધનતેરસના દિવસે 5 ગોમતી ચક્ર ખરીદીને ઘરમાં પૂજા કર્યા બાદ તિજોરીમાં રાખવાથી અણધાર્યો ધનલાભ થાય છે.
પિત્તળ કે તાંબાના વાસણ: પિત્તળને ભગવાન ધનવંતરીની પ્રિય ધાતુ ગણવામાં આવે છે. જો સોના-ચાંદીના વાસણ ન ખરીદી શકાય તો પિત્તળ કે તાંબાનો નાનો દીવો, લોટો કે વાસણ ખરીદવું પણ તેટલું જ પુણ્યદાયી છે.
શ્રીયંત્ર કે કુબેર યંત્ર: ધનતેરસ પર નાનું શ્રીયંત્ર કે કુબેર યંત્ર ખરીદીને ઘર અથવા વેપારના સ્થળે સ્થાપિત કરવાથી આર્થિક પ્રગતિના દ્વાર ખુલે છે.
આ પણ વાંચોઃ Britain :વાવાઝોડા બોએલોની ભયાનક એન્ટ્રી, 130 કિમીની ઝડપે પવન, વીજળી ગુલ, અનેક ફ્લાઇટ્સ રદ્દ
