Passport માટે હવે આ તારીખ પછી જન્મેલા લોકોને જન્મ પ્રમાણપત્ર ફરજિયાત

દેશમાં પાસપોર્ટને લઈને નવો નિયમ લાગુ થઈ ગયો છે. 1 ઓક્ટોબર, 2023 પછી જન્મેલા તમામ લોકોએ હવે પાસપોર્ટ માટે અરજી કરતી વખતે જન્મ પ્રમાણપત્ર આપવું પડશે. નવા નિયમો હેઠળ, 1 ઓક્ટોબર, 2023 ના રોજ અથવા તે પછી જન્મેલા અરજદારો માટે જન્મતારીખનો એકમાત્ર માન્ય પુરાવો જન્મ પ્રમાણપત્ર માનવામાં આવશે. જ્યારે, જૂના અરજદારો અન્ય દસ્તાવેજો પસંદ કરી શકે છે.

સમજો સંપૂર્ણ પ્રક્રિયા

પાસપોર્ટ માટે હવે જન્મ પ્રમાણપત્ર જરૂરી છે. 1 ઓક્ટોબર, 2023 પછી જન્મેલા લોકોને જન્મ અને મૃત્યુની સુધારેલી નોંધણી અધિનિયમ, 2023 હેઠળ આવરી લેવામાં આવ્યા છે. આ નવા નિયમ મુજબ હવે પાસપોર્ટ અરજી સાથે જન્મ પ્રમાણપત્ર જોડવું ફરજિયાત રહેશે. પરંતુ, જો તમારો જન્મ તે પહેલા થયો હોય, તો પણ તમારી પાસે અન્ય દસ્તાવેજો સબમિટ કરવાનો વિકલ્પ છે.

વૈકલ્પિક દસ્તાવેજો વિશે જાણો

આ વૈકલ્પિક દસ્તાવેજોની સૂચિ પાસપોર્ટ (સુધારા) નિયમો, 2025 માં આપવામાં આવી છે.તેમાં ટ્રાન્સફર સર્ટિફિકેટ, સ્કૂલ લીવિંગ સર્ટિફિકેટ, મેટ્રિક્યુલેશન સર્ટિફિકેટ, પાન કાર્ડ, સર્વિસ રેકોર્ડ અથવા સરકારી કર્મચારીઓ માટે પેન્શન ઓર્ડર, ડ્રાઇવિંગ લાયસન્સ, વોટર આઈડી કાર્ડ અને એલઆઈસી અથવા જાહેર કંપનીઓ દ્વારા જારી કરાયેલ પોલિસી બોન્ડનો સમાવેશ થાય છે. 

સરકારી કામમાં ઝડપ આવશે

આ પહેલા પણ 26 જાન્યુઆરી 1989ના રોજ જન્મ પ્રમાણપત્ર ફરજિયાત કરવામાં આવ્યું હતું.પરંતુ 2016માં પાસપોર્ટ નિયમોમાં સુધારો કરીને તેને દૂર કરવામાં આવ્યો હતો. ત્યારબાદ તમામ અરજદારોને જન્મના પુરાવા તરીકે ઉપરોક્ત દસ્તાવેજોમાંથી કોઈપણ એક સબમિટ કરવાની મંજૂરી આપવામાં આવી હતી. સરકારનું માનવું છે કે તેનાથી લોકોને ઘણો ફાયદો થશે. જન્મ પ્રમાણપત્રને દેશમાં એક મહત્વપૂર્ણ દસ્તાવેજ બનાવવાની દિશામાં આ પગલું એક મોટું પગલું છે. આનાથી લોકોને સરળતા તો મળશે જ, પરંતુ સરકારી કામમાં પણ ઝડપ આવશે.