અદાણી ટોટલ ગેસે માર્ચ ત્રિમાસિક (Q4) તેમજ સમગ્ર નાણાકીય વર્ષ 2025-26ના પરિણામો જાહેર કર્યા છે. કંપનીએ ચોથા ત્રિમાસિકમાં ₹168.34 કરોડનો નફો નોંધાવ્યો છે, જે ગયા વર્ષની સમાન સમયગાળાના ₹154.59 કરોડની સરખામણીએ લગભગ 9% વધુ છે. ડિસેમ્બર ત્રિમાસિકના ₹157.22 કરોડના નફા કરતાં પણ આમાં આશરે 8% વધારો નોંધાયો છે.
ઓપરેશનલ સ્તરે કંપનીનું EBITDA ₹300.32 કરોડ રહ્યું
આ ત્રિમાસિક દરમિયાન કંપનીની કુલ આવક ₹1,694.61 કરોડ રહી, જે ગયા વર્ષના ₹1,453.37 કરોડની તુલનાએ લગભગ 16.6%નો વધારો દર્શાવે છે. ઓપરેશનલ સ્તરે કંપનીનું EBITDA ₹300.32 કરોડ રહ્યું, જે અગાઉના વર્ષના ₹266 કરોડ કરતાં વધુ છે. જોકે EBITDA માર્જિન થોડું ઘટીને 17.72% રહ્યું છે, જે અગાઉ 18.30% હતું. અદાણી ગ્રુપ અને ટોટલ એનર્જીની સંયુક્ત ભાગીદારીવાળી આ કંપની દેશભરમાં ઉદ્યોગો, ઘરેલુ વપરાશકર્તાઓ અને વાહનોને નેચરલ ગેસ સપ્લાય કરે છે.
કંપનીના શેરમાં તાજેતરમાં સુધારો જોવા મળ્યો
સમગ્ર નાણાકીય વર્ષ 2025-26 દરમિયાન કંપનીનું કુલ રેવેન્યુ ₹6,408.53 કરોડ રહ્યું, જે ગયા વર્ષના ₹5,411.68 કરોડની સરખામણીએ નોંધપાત્ર વધારો દર્શાવે છે. જોકે, વર્ષભરનો નફો લગભગ સ્થિર રહ્યો છે અને ₹655.72 કરોડ રહ્યો, જે FY25ના ₹654.41 કરોડની આસપાસ છે. કંપનીએ FY26 માટે પ્રતિ શેર ₹0.25ના ફાઈનલ ડિવિડન્ડની જાહેરાત કરી છે, જે શેરહોલ્ડર્સની મંજૂરી બાદ અમલમાં આવશે. શેરબજારમાં કંપનીના શેરમાં તાજેતરમાં સુધારો જોવા મળ્યો છે. એપ્રિલ મહિનામાં શેરમાં લગભગ 25%નો ઉછાળો આવ્યો છે, જ્યારે તેના પહેલા પાંચ મહિના સતત ઘટાડો નોંધાયો હતો. હાલની રિકવરીને કારણે આ વર્ષે અત્યાર સુધી શેરમાં લગભગ 12%નો વધારો થયો છે.
આ પણ વાંચો :Mobikwik હવે NBFC જેવી સર્વિસ આપી શકશે, RBIએ આપી મંજૂરી
ડિસ્કલેમર: શેરબજારમાં કે મ્યુચ્યુઅલ ફંડમાં રોકાણ કરતા પહેલા તમારા ફાઈનાન્શિયલ એડવાઈઝરની સલાહ અવશ્ય લો.
