અમદાવાદ સ્થિત ટોરેન્ટ ફાર્માએ નાણાકીય વર્ષ 2026-27ના બીજા ત્રિમાસિકનાં પરિણામો જાહેર કર્યાં છે. કંપનીની કુલ આવકમાં વાર્ષિક ધોરણે 51%નો વધારો નોંધાયો છે. કંપનીની આવક વધીને રૂ. 4,979 કરોડ થઈ છે, પરંતુ ચોખ્ખો નફો ગત વર્ષના સમાન ગાળાના રૂ. 591 કરોડની સરખામણીએ ઘટીને રૂ. 534 કરોડ નોંધાયો છે.
સંચાલન નફામાં 54%નો વધારો
કંપનીનો સંચાલન નફો અપવાદરૂપ ખર્ચ પહેલાં રૂ. 1,666 કરોડ રહ્યો છે, જે ગયા વર્ષના સમાન ત્રિમાસિકના રૂ. 1,083 કરોડ કરતાં 54% વધુ છે. સંચાલન નફાનું માર્જિન 33.5% નોંધાયું છે, જ્યારે કુલ નફાનું માર્જિન 75.4% રહ્યું છે. સંશોધન અને વિકાસ પાછળ કંપનીએ રૂ. 211 કરોડ ખર્ચ્યા છે, જે ગયા વર્ષના સમાન ગાળાના રૂ. 156 કરોડ કરતાં 35% વધુ છે.
ભારતમાં આવકમાં 20%ની વૃદ્ધિ
કંપનીના મુખ્ય ભારતીય વ્યવસાયની આવક 20% વધીને રૂ. 2,181 કરોડ થઈ છે. આ વૃદ્ધિ ભારતીય ફાર્માસ્યુટિકલ બજારના 12%ના વિકાસદર કરતાં વધુ છે. બ્રાઝિલમાં આવક 38% વધીને રૂ. 440 કરોડ થઈ છે, જ્યારે અમેરિકામાં 24%ના વધારા સાથે આવક રૂ. 417 કરોડ નોંધાઈ છે. બીજી તરફ, જર્મનીમાં આવક 7% ઘટીને રૂ. 283 કરોડ થઈ છે.
બિઝનેસના એકીકરણની અસર
કંપનીના જણાવ્યા મુજબ, 8 જુલાઈ, 2026થી અમલમાં આવેલા વિલીનીકરણ બાદ ભારતીય વ્યવસાયનું એકીકરણ, વૈશ્વિક વ્યવસાયિક નેટવર્કનું પુનર્ગઠન અને ઉત્પાદન તથા ગુણવત્તા વ્યવસ્થાનું સંકલન કરવામાં આવ્યું છે. આ પ્રક્રિયાની અસર બીજા ત્રિમાસિક દરમિયાન આવક પર કામચલાઉ રીતે પડી હતી.
પ્રથમ છ મહિનાની આવકમાં 52.8%નો વધારો
નાણાકીય વર્ષ 2026-27ના પ્રથમ છ મહિનામાં કંપનીની કુલ આવક રૂ. 9,900 કરોડ નોંધાઈ છે, જે અગાઉના વર્ષના સમાન ગાળાના રૂ. 6,480 કરોડ કરતાં 52.8% વધુ છે. આ સમયગાળા દરમિયાન સંચાલન નફો 57.4% વધીને રૂ. 3,330 કરોડ થયો છે.
આ પણ વાંચો : Entertainment: રૂ. 450 કરોડની બ્રામાં એવું શું છે કે આખી દુનિયામાં તેની ચર્ચા થઈ રહી છે? વાંચો, વિવાદ અને ગ્લૅમરની રસપ્રદ કહાની
