વર્ષ 2026માં પશ્ચિમ એશિયામાં ચાલી રહેલા યુદ્ધ અને તણાવની અસર હવે વૈશ્વિક ઊર્જા બજાર પર સ્પષ્ટપણે દેખાઈ રહી છે. આંતરરાષ્ટ્રીય સ્તરે ક્રૂડ ઓઈલના ભાવમાં અસ્થિરતા હોવા છતાં, ભારત સરકારની ચોક્કસ રણનીતિને કારણે સીએનજી (CNG) વાહનો અત્યારે રસ્તા પર 'VIP' સાબિત થઈ રહ્યા છે. પેટ્રોલ અને ડીઝલના વધતા ભાવ વચ્ચે CNG હવે માત્ર એક વિકલ્પ નથી, પરંતુ સામાન્ય માણસ માટે સૌથી સુરક્ષિત અને સસ્તું ઈંધણ બની ગયું છે.
સરકારની પ્રાથમિકતામાં સીએનજી પ્રથમ
ભારત સરકારના 'નેચરલ ગેસ કંટ્રોલ ઓર્ડર' મુજબ, ઘરેલું ગેસના વિતરણમાં સૌથી પહેલી પસંદગી સિટી ગેસ ડિસ્ટ્રિબ્યુશન (CGD) સેક્ટરને આપવામાં આવે છે. આનો અર્થ એ છે કે, જો દેશમાં ગેસની અછત સર્જાય, તો પણ સરકાર ઉદ્યોગો કે પાવર પ્લાન્ટનો ગેસ કાપીને સૌપ્રથમ સામાન્ય લોકોની રસોઈ (PNG) અને વાહનો (CNG) માટે પુરવઠો સુનિશ્ચિત કરે છે. આ પ્રાથમિકતાને કારણે જ ઈંધણ સંકટના સમયમાં પણ સીએનજી સ્ટેશનો પર પુરવઠો જળવાઈ રહે છે.
