નાણાકીય વર્ષ 2027-28ના સામાન્ય બજેટની તૈયારીઓનો સત્તાવાર પ્રારંભ થઈ ગયો છે, અને આ વખતે કેન્દ્ર સરકારે એક અત્યંત નવીન અને ઐતિહાસિક પહેલ કરી છે. દર વર્ષે બજેટ પહેલાં ઉદ્યોગપતિઓ અને અર્થશાસ્ત્રીઓના મંતવ્યો લેવાની પરંપરા રહી છે, પરંતુ આ વખતે નાણામંત્રી નિર્મલા સીતારમણ દેશની યુવા પેઢી એટલે કે 'જનરલ ઝેડ' (Gen Z) સાથે પણ સીધો સંવાદ સાધશે. આગામી બજેટની રૂપરેખા નક્કી કરવામાં યુવાનોની આકાંક્ષાઓ અને સૂચનોને સ્થાન આપવા માટે ખાસ સત્રનું આયોજન કરવામાં આવ્યું છે, જ્યાં યુવા પ્રતિનિધિઓ ટોચના સરકારી અધિકારીઓ અને નિષ્ણાતો સમક્ષ પોતાના વિચારો રજૂ કરી શકશે.

સોમવારથી શરૂ થશે પ્રી બજેટ બેઠક

સોમવારથી શરૂ થયેલી આ પ્રી-બજેટ બેઠકોના પ્રથમ તબક્કામાં મુખ્ય આર્થિક સલાહકાર વી. અનંત નાગેશ્વરન, આર્થિક બાબતોના સચિવ અનુરાધા ઠાકુર અને દેશના જાણીતા અર્થશાસ્ત્રીઓ ઉપસ્થિત રહ્યા હતા. આ બેઠકમાં સૌથી વધુ ભાર દેશના વધતા જતા સરકારી દેવા અને રાજકોષીય ખાધને નિયંત્રિત કરવા પર મૂકવામાં આવ્યો હતો. નિષ્ણાતોએ સરકારને સ્પષ્ટ સલાહ આપી હતી કે ભવિષ્યમાં ખર્ચ વધવાની સંભાવના હોવા છતાં, સરકારે દેવું ઘટાડવાના પોતાના સંકલ્પ પરથી પાછળ હટવું જોઈએ નહીં. ઉલ્લેખનીય છે કે સરકારે 2030-31 સુધીમાં દેશનું દેવું જીડીપી (GDP) ના 50 ટકા (વત્તા-ઓછા 1 ટકા) સુધી મર્યાદિત રાખવાનું મહત્વાકાંક્ષી લક્ષ્ય નિર્ધારિત કર્યું છે.

લાખો યુવાનો માટે આશાસ્પદ ચર્ચા થઇ 

બેઠકમાં શેરબજારમાં રોકાણ કરતા લાખો યુવાનો અને સામાન્ય રોકાણકારો માટે પણ એક આશાસ્પદ ચર્ચા થઈ હતી. હાલમાં શેર વેચાણ પર એક વર્ષ બાદ 12.5% લોંગ ટર્મ કેપિટલ ગેઇન્સ (LTCG) ટેક્સ અને એક વર્ષ પહેલાં 20% ટેક્સ ઉપરાંત STT તથા ડિવિડન્ડ ટેક્સ વસૂલવામાં આવે છે. બેઠકમાં LTCG ટેક્સ ઘટાડવા અંગે વિચારણા કરવામાં આવી હતી, જે લાગુ થાય તો રોકાણકારોને મોટી રાહત મળી શકે છે.

વિવિધ ક્ષેત્રોના પ્રતિનિધિઓ સાથે યોજાશે તબક્કાવાર બેઠક

બીજી તરફ, આગામી બજેટમાં સરકાર સામે આઠમા પગાર પંચની ભલામણોનો અમલ અને પશ્ચિમ એશિયાના તણાવને કારણે ક્રૂડ ઓઈલના વધતા ભાવ જેવા બે મોટા આર્થિક પડકારો રહેશે. જોકે, અર્થશાસ્ત્રીઓએ તેલની મોંઘવારીને કામચલાઉ સમસ્યા ગણીને આગળ વધવા સૂચન કર્યું છે. 16 થી 26 નવેમ્બર સુધી ચાલનારી આ પરામર્શ પ્રક્રિયામાં કૃષિ, બેંકિંગ, વીમા, MSME, સ્ટાર્ટઅપ્સ, શિક્ષણ અને આરોગ્ય સહિતના વિવિધ ક્ષેત્રોના પ્રતિનિધિઓ સાથે તબક્કાવાર બેઠકો યોજીને બજેટને આખરી ઓપ આપવામાં આવશે.

આ પણ વાંચોઃ UPI પેમેન્ટમાં ભારતનો નવો ઇતિહાસ, સપ્ટેમ્બરના તમામા રેકોર્ડ તોડ્યા, ઓક્ટોબરમાં વ્યવહારો 31.53 લાખ કરોડને પાર