ઘણા લોકો પરિવારના ભવિષ્યને ધ્યાનમાં રાખીને એવી યોજનાઓમાં રોકાણ કરવાનું પસંદ કરે છે, જેમાંથી તેમને જરૂરી સમયે નિયમિત આવક મળી શકે. આવી સ્થિતિમાં પોસ્ટ ઓફિસ માસિક આવક યોજના (POMIS) અને LIC જીવન શાંતિ બે મોટી લોકપ્રિય યોજનાઓ છે. બંને યોજનાઓ એકબીજાથી અલગ છે અને તેમના પોતાના ફાયદા છે. સરળ ભાષામાં સમજીએ કે આ યોજનાઓ શું છે, કેવી રીતે કામ કરે છે અને તમારી જરૂરિયાત પ્રમાણે કઈ યોગ્ય રહેશે.
LICની જીવન શાંતિ યોજના
LICની જીવન શાંતિ યોજના એક સિંગલ પ્રીમિયમ પેન્શન યોજના છે, જેમાં એક વખત જ રૂપિયા જમા કરાવવાના હોય છે. પોલિસીની મુદત પૂરી થયા બાદ તમને માસિક અથવા વાર્ષિક પેન્શન મળવાનું શરૂ થઈ જાય છે. તેમાં બે વિકલ્પ મળે છે — સિંગલ લાઇફ અને સંયુક્ત લાઇફ. એટલે કે, તમે એકલા તમારા માટે અથવા તમારા જીવનસાથી સાથે મળીને પણ પેન્શન મેળવી શકો છો. આ યોજનાનો મુખ્ય ફાયદો એ છે કે પેન્શનનો દર શરૂઆતથી જ નક્કી થઈ જાય છે અને પછી બજારની પરિસ્થિતિથી તેનો કોઈ સંબંધ રહેતો નથી. તેથી નિવૃત્તિની તૈયારી કરનારાઓ માટે આ યોજના ખૂબ ફાયદાકારક છે.
પોસ્ટ ઓફિસ MIS
બીજી તરફ, પોસ્ટ ઓફિસ MIS એક એવી યોજના છે, જેમાં તમે રોકાણ કર્યા પછી તરત જ દર મહિને નિશ્ચિત આવક મેળવવાનું શરૂ થાય છે. હાલ આ યોજના 7.4% વાર્ષિક વ્યાજ આપે છે, જેને માસિક હપ્તામાં ચુકવવામાં આવે છે. માસિક ખર્ચ કરવો હોય, વરિષ્ઠ નાગરિકો કે ગૃહિણીઓ માટે આ ખુબ જ સરળ અને વિશ્વસનીય યોજના માનવામાં આવે છે. ફક્ત ₹1,000થી શરૂઆત કરી શકાય છે અને વ્યક્તિગત કે સંયુક્ત ખાતું ખોલી શકાય છે. તેની મુદત 5 વર્ષ છે અને પૂરું થયા પછી મૂડી પરત મળે છે.
યોજનાઓમાં સ્પષ્ટ તફાવત
બંને યોજનાઓમાં સ્પષ્ટ તફાવત છે. જીવન શાંતિ લાંબા ગાળાની પેન્શન યોજના છે, જેમાં તમને આગળ જઈને નિયમિત આવક મળતી રહે છે, જ્યારે POMIS તરત જ માસિક આવક આપે છે. જીવન શાંતિમાં લઘુત્તમ રોકાણ ₹1.5 લાખ છે અને મહત્તમ મર્યાદા નથી, જ્યારે POMISમાં વ્યક્તિગત ખાતા માટે ₹9 લાખ અને સંયુક્ત માટે ₹15 લાખની મર્યાદા છે. જીવન શાંતિમાં કર લાભ મળે છે, જ્યારે POMIS કોઈ કર લાભ આપતું નથી.
તમારા હેતુ પર આધારિત
કઈ યોજના તમારા માટે સારી છે તે તમારા હેતુ પર આધારિત છે. જો તમે નિવૃત્તિનું આયોજન કરી રહ્યા છો અને ભવિષ્યમાં સ્થિર પેન્શન મેળવવા માંગો છો, તો LIC જીવન શાંતિ સૌથી યોગ્ય વિકલ્પ છે. પરંતુ જો તમને તરત જ માસિક આવકની જરૂર હોય અને ઓછા જોખમ સાથે સરળ યોજના જોઈએ, તો પોસ્ટ ઓફિસ MIS સૌથી સારું વિકલ્પ છે. બંને યોજનાઓ સારી છે, ફક્ત તમારી જરૂરિયાતો અને રોકાણ ક્ષમતા અનુસાર એક પસંદગી કરવી પડે.
આ પણ વાંચો : Auto News : નવી SUV બજારમાં ધૂમ મચાવશે, બુકિંગ શરૂ થઈ ગયું છે , ક્રેટા અને સીએરા સાથે સીધી કોમ્પિટિશન
