કોમ્પિટિશન કમિશન ઓફ ઈન્ડિયા (CCI)એ સ્ટીલ ક્ષેત્રમાં મોટી ગેરરીતિઓ શોધી કાઢી છે. તપાસમાં જાણવા મળ્યું છે કે ટાટા સ્ટીલ, JSW સ્ટીલ અને સરકારી માલિકીની કંપની SAILએ સ્ટીલના વેચાણ ભાવ નક્કી કરવા માટે સાંઠગાંઠ કરી હતી. એક અહેવાલ મુજબ આ કૌભાંડમાં 25 અન્ય કંપનીઓ પણ સંડોવાયેલી છે.
56 વરિષ્ઠ અધિકારીઓને દોષિત ઠેરવવામાં આવ્યા
CCIએ 2015થી 2023ના અલગ અલગ સમયગાળામાં ભાવમાં ગેરરીતિ માટે 56 વરિષ્ઠ અધિકારીઓને જવાબદાર ઠેરવ્યા છે. 6 ઓક્ટોબરના રોજ CCIના આદેશ મુજબ આમાં JSW સ્ટીલના મેનેજિંગ ડિરેક્ટર સજ્જન જિંદાલ, ટાટા સ્ટીલના CEO ટી.વી. નરેન્દ્રન અને SAILના ચાર ભૂતપૂર્વ અધ્યક્ષોનો સમાવેશ થાય છે, જે હજુ સુધી જાહેર કરવામાં આવ્યું નથી. JSW સ્ટીલે આ બાબતે ટિપ્પણી કરવાનો ઈનકાર કર્યો હતો. ટાટા સ્ટીલ, SAIL અને સંબંધિત અધિકારીઓએ આ પૂછપરછનો જવાબ આપ્યો ન હતો. CCI પણ કોઈ પ્રતિભાવ આપતું નહોતું.
તપાસ 2021માં શરૂ થઈ હતી
ભારતના સ્ટીલ ક્ષેત્રની સૌથી હાઈ-પ્રોફાઈલ તપાસમાંની એક માનવામાં આવતી આ તપાસ 2021માં શરૂ થઈ હતી, જ્યારે એક બિલ્ડર્સ એસોસિએશને તમિલનાડુ રાજ્યની કોર્ટમાં ફરિયાદ દાખલ કરી હતી. જેમાં આરોપ લગાવવામાં આવ્યો હતો કે સ્ટીલ કંપનીઓ પુરવઠાને પ્રતિબંધિત કરવા અને કિંમતો વધારવા માટે મિલીભગત કરી રહી છે. બાદમાં તપાસનો વિસ્તાર 31 કંપનીઓ, અનેક ઉદ્યોગ સંસ્થાઓ અને ડઝનબંધ અધિકારીઓ સુધી કરવામાં આવ્યો. CCIના નિયમો મુજબ કાર્યવાહી પૂર્ણ ન થાય ત્યાં સુધી કાર્ટેલ સંબંધિત કેસોની સંપૂર્ણ વિગતો જાહેર કરવામાં આવતી નથી.
CCIના આદેશમાં શું કહેવામાં આવ્યું છે
ઓક્ટોબરના તેના આદેશમાં, CCIએ જણાવ્યું હતું કે, "પક્ષોનું વર્તન ભારતીય સ્પર્ધા કાયદાનું ઉલ્લંઘન કરતું હોવાનું જાણવા મળ્યું છે" અને "કેટલાક વ્યક્તિઓને વ્યક્તિગત રીતે જવાબદાર પણ ઠેરવવામાં આવ્યા છે." આ તારણોની હવે સીસીઆઈના વરિષ્ઠ અધિકારીઓ દ્વારા સમીક્ષા કરવામાં આવશે. ત્યારબાદ કંપનીઓ અને અધિકારીઓને તેમના વાંધા નોંધાવવાની તક આપવામાં આવશે, ત્યારબાદ અંતિમ આદેશ જાહેર કરવામાં આવશે. ભારત વિશ્વનો બીજો સૌથી મોટો ક્રૂડ સ્ટીલ ઉત્પાદક દેશ છે. CCI પાસે નિયમોના ઉલ્લંઘન બદલ કંપનીઓ પર દર વર્ષે તેમના નફાના 3 ગણા અથવા તેમના ટર્નઓવરના 10 ટકા, જે વધારે હોય તે દંડ લાદવાની સત્તા છે. વ્યક્તિગત અધિકારીઓ પર પણ અલગ દંડ લાદવામાં આવી શકે છે.
આ પણ વાંચો: Budget 2026 : શું બદલાશે બજેટ રજૂ કરવાની તારીખ! શું છે સરકારની તૈયારી?
