કોમ્પિટિશન કમિશન ઓફ ઈન્ડિયા (CCI)એ બુધવારે દેશની સૌથી મોટી એરલાઈન ઈન્ડિગો સામેના સંચાલન અવરોધોને કારણે ડિસેમ્બરમાં હજારો ફ્લાઇટ્સ રદ કરવાની વિગતવાર તપાસનો આદેશ આપ્યો છે. આ ઘટનાના લગભગ 2 મહિના પછી જાહેર કરાયેલા આદેશમાં CCIએ જણાવ્યું હતું કે મોટી સંખ્યામાં ફ્લાઈટ્સ રદ કરીને, ઈન્ડિગોએ બજારમાંથી તેની સુનિશ્ચિત ક્ષમતાનો નોંધપાત્ર ભાગ દૂર કર્યો, જેના કારણે કૃત્રિમ અછત ઊભી થઈ અને માગમાં વધારો થવાના સમયે મુસાફરોની હવાઈ મુસાફરીની ઍક્સેસ મર્યાદિત થઈ ગઈ.
2,507 ફ્લાઈટ્સ રદ કરવામાં આવી હતી
કમિશને જણાવ્યું હતું કે પ્રભાવશાળી કંપની દ્વારા આવા વર્તનને સ્પર્ધા કાયદાની કલમ 4(2)(b)(i) હેઠળ સેવાઓના પુરવઠાને પ્રતિબંધિત કરવા તરીકે જોઈ શકાય છે. સ્પર્ધા કાયદાની કલમ 4 બજારમાં પ્રભુત્વ ધરાવતા સ્થાનના દુરુપયોગ સાથે વ્યવહાર કરે છે. CCIએ જણાવ્યું હતું કે પ્રથમ દ્રષ્ટિએ ઈન્ડિગોના આચરણથી ભારતમાં સ્પર્ધા પર પ્રતિકૂળ અસર પડી રહી હોય તેવું લાગે છે. આને ધ્યાનમાં રાખીને કમિશને તેના ડિરેક્ટર જનરલને આ બાબતની વિગતવાર તપાસ કરવાનો નિર્દેશ આપ્યો છે.
કમિશને તેના આદેશમાં એ પણ નોંધ્યું છે કે ડિસેમ્બરની શરૂઆતમાં ઈન્ડિગોને નોંધપાત્ર કામગીરીમાં વિક્ષેપોનો સામનો કરવો પડ્યો હતો. આ પછી ડિરેક્ટોરેટ જનરલ ઓફ સિવિલ એવિએશન (DGCA)એ એરલાઈનના શિયાળાના ફ્લાઈટ શેડ્યૂલમાં 10 ટકાનો ઘટાડો કર્યો, જે 10 ફેબ્રુઆરી સુધી અમલમાં રહેશે. CCI અનુસાર 3થી 5 ડિસેમ્બર દરમિયાન, 2,507 ઈન્ડિગો ફ્લાઈટ્સ રદ કરવામાં આવી હતી અને 1,852 વિલંબિત થઈ હતી, જેનાથી દેશભરના એરપોર્ટ પર 3,00,000થી વધુ મુસાફરો પ્રભાવિત થયા હતા.
DGCAએ ડિસેમ્બરમાં ફ્લાઈટ વિક્ષેપો માટે કુલ રૂપિયા 22.20 કરોડનો દંડ ફટકાર્યો
આદેશમાં જણાવાયું હતું કે હજારો ફ્લાઈટ્સ રદ કરીને જે સુનિશ્ચિત ક્ષમતાના નોંધપાત્ર ભાગ જેટલી છે, ઈન્ડિગોએ બજારમાંથી તેની સેવા અસરકારક રીતે કાપી નાખી, કૃત્રિમ અછત ઊભી કરી અને માગમાં વધારો થવા પર ગ્રાહકોની હવાઈ મુસાફરીની ઍક્સેસને પ્રતિબંધિત કરી. 17 જાન્યુઆરીના રોજ DGCAએ ડિસેમ્બરમાં ફ્લાઈટ વિક્ષેપો માટે કુલ રૂપિયા 22.20 કરોડનો દંડ ફટકાર્યો અને CEO પીટર એલ્બર્સ અને અન્ય બે વરિષ્ઠ અધિકારીઓને બેદરકારી બદલ ચેતવણી આપી. તેણે એરલાઇનને લાંબા ગાળાના પ્રણાલીગત સુધારા સુનિશ્ચિત કરવા માટે રૂપિયા 50 કરોડની બેન્ક ગેરંટી સબમિટ કરવાનો પણ નિર્દેશ આપ્યો.
આ પણ વાંચો : India-US ડીલથી સૌથી વધારે આ 28 કંપનીઓને થશે ફાયદો, રોકાણકારો માટે છે સારી તક
