ભારતીય શેરબજારમાં વધુ એક મોટો IPO આવવાની તૈયારી છે. કોકા-કોલાની ભારતીય બોટલિંગ કંપની હિન્દુસ્તાન કોકા-કોલા હોલ્ડિંગ્સે (HCCH) IPO માટે SEBI સમક્ષ ડ્રાફ્ટ રેડ હેરિંગ પ્રોસ્પેક્ટસ (DRHP) ફાઇલ કર્યો છે. આ કંપની ભારતમાં કોકા-કોલા, થમ્સ અપ, સ્પ્રાઇટ, ફેન્ટા અને માઝા જેવી લોકપ્રિય બ્રાન્ડ્સનાં પીણાંનું ઉત્પાદન અને વિતરણ કરે છે. અગાઉના અહેવાલો મુજબ, IPOનું કદ આશરે ₹9,500 કરોડ અને કંપનીનું સંભવિત મૂલ્યાંકન લગભગ $10 અબજ હોઈ શકે છે. જોકે, અંતિમ ઇશ્યૂ સાઇઝ અને શેરની કિંમત હજુ જાહેર કરવામાં આવી નથી. 

IPOમાં વેચાશે લગભગ 100 કરોડ શેર

આ IPO સંપૂર્ણપણે ઓફર ફોર સેલ (OFS) હશે. એટલે કંપની નવા શેર બહાર પાડીને ભંડોળ એકત્ર નહીં કરે, પરંતુ હાલના પ્રમોટર પોતાના શેર વેચશે. કંપનીના પ્રમોટર હિન્દુસ્તાન કોકા-કોલા ઓવરસીઝ હોલ્ડિંગ્સ પ્રાઇવેટ લિમિટેડ લગભગ 99.75 કરોડ શેર વેચવાની યોજના ધરાવે છે. આ શેરનું ફેસ વેલ્યૂ ₹10 છે. IPO બાદ પ્રમોટરનો હિસ્સો હાલના 60%થી ઘટીને આશરે 45% થઈ શકે છે. હાલમાં કોકા-કોલા પાસે કંપનીનો 60% હિસ્સો છે, જ્યારે જુબિલન્ટ ભારતી ગ્રુપ પાસે 40% હિસ્સો છે. જુબિલન્ટ ભારતી ગ્રુપ આ IPOમાં પોતાના શેર વેચવાનું નથી. 

કંપનીની આવકમાં 9.4%નો ઘટાડો

કંપનીના નાણાકીય આંકડા પણ મહત્વના છે. માર્ચ 2026માં પૂરા થયેલા નાણાકીય વર્ષમાં HCCHની આવક 9.4% ઘટીને ₹11,549 કરોડ રહી હતી. અગાઉના નાણાકીય વર્ષમાં આ આવક આશરે ₹12,750 કરોડ હતી. કંપનીએ આવકમાં ઘટાડા પાછળ બોટલિંગના કેટલાક વિસ્તારો અન્ય કોકા-કોલા બોટલર્સને સોંપવાની પ્રક્રિયાને જવાબદાર ગણાવી હતી. જોકે, જૂન 2026માં પૂરા થયેલા ત્રિમાસિક ગાળામાં કંપનીના જાળવી રાખેલા વ્યવસાયની આવક ₹4,310.17 કરોડ રહી હતી, જે વાર્ષિક ધોરણે 20.46% વધુ હતી. 

10 રાજ્યોમાં ફેલાયેલો છે વ્યવસાય

હિન્દુસ્તાન કોકા-કોલા હોલ્ડિંગ્સ ભારતમાં કોકા-કોલાની સૌથી મોટી બોટલિંગ કંપની છે. તેનો વ્યવસાય 10 રાજ્યો અને 4 કેન્દ્રશાસિત પ્રદેશોમાં ફેલાયેલો છે. કંપની પાસે 14 ઉત્પાદન એકમો અને 8 કો-પેકિંગ એકમો છે. તેના પોર્ટફોલિયોમાં કોકા-કોલા, થમ્સ અપ, સ્પ્રાઇટ, ફેન્ટા, માઝા, કિનલી અને મિનિટ મેઇડ જેવી બ્રાન્ડ્સ સામેલ છે. IPOની પ્રાઇસ બેન્ડ અને લિસ્ટિંગની તારીખ હજુ જાહેર થઈ નથી.

આ પણ વાંચો: Ethanol Blending: તમારા વાહનમાં ભરાતા પેટ્રોલમાં થઇ રહ્યો છે ખેલ? કર્ણાટક સરકારના 31.2% ઇથેનોલના દાવાથી ખળભળાટ!