ભારતીય ડિફેન્સ સેક્ટરની અગ્રણી કંપની ભારત ફોર્જ (Bharat Forge) એ વૈશ્વિક સંરક્ષણ બજારમાં એક નવો ઈતિહાસ રચી દીધો છે. કંપનીની સંરક્ષણ શાખા કલ્યાણી સ્ટ્રેટેજિક સિસ્ટમ્સ લિમિટેડ (KSSL) એ અમેરિકાની દિગ્ગજ સૈન્ય વાહન નિર્માતા કંપની ‘એએમ જનરલ’ (AM General) સાથે એક વ્યૂહાત્મક કરાર કર્યો છે. આ વૈશ્વિક ભાગીદારી હેઠળ બંને કંપનીઓ મળીને ૧૫૫mm (155mm) ની અત્યાધુનિક મોબાઈલ આર્ટિલરી ગન સિસ્ટમ (તોપ) વિકસાવશે, જે દુર્ગમ વિસ્તારો અને ગમે તેવા ખરાબ હવામાનમાં પણ સચોટ નિશાન સાધવામાં સક્ષમ હશે. આ ડીલના સમાચાર આવતા જ શેરબજારમાં સંરક્ષણ ક્ષેત્રના શેરોમાં ભારે હલચલ જોવા મળી રહી છે.
પેરિસ ડિફેન્સ એક્સ્પોમાં થઈ ઐતિહાસિક ડીલ
ફ્રાન્સની રાજધાની પેરિસમાં યોજાયેલા પ્રતિષ્ઠિત 'યુરોસેટરી ડિફેન્સ એક્સ્પો' (Eurosatory Defense Expo) દરમિયાન આ ઐતિહાસિક સમજૂતી પર હસ્તાક્ષર કરવામાં આવ્યા હતા. આ સમજૂતીનો મુખ્ય હેતુ વિશ્વભરની સેનાઓને નેક્સ્ટ જનરેશન આર્ટિલરી પ્લેટફોર્મ પૂરું પાડવાનો છે. સૌથી મહત્વની વાત એ છે કે, AM General એ અમેરિકી સેનાના 'મોબાઈલ ટેક્ટિકલ કેનન' (MTC) પ્રોગ્રામ માટે એક પ્રસ્તાવ પણ સોંપ્યો છે. આ પ્રસ્તાવમાં ભારત ફોર્જના MArG (માઉન્ટેડ આર્ટિલરી ગન) પ્લેટફોર્મનો ઉપયોગ કરવામાં આવશે. જો અમેરિકી સેના આ પ્રોજેક્ટને મંજૂરી આપશે, તો વર્ષ ૨૦૨૭ થી તેની ડિલિવરી શરૂ થઈ શકે છે, જે ભારતીય સંરક્ષણ ઉત્પાદન માટે એક માઈલસ્ટોન સાબિત થશે.
