ભારતમાં સ્માર્ટ મીટર પ્રોજેક્ટને ગતિ મળતા સ્માર્ટ વીજળી અને ગેસ મીટર બનાવતી અગ્રણી કંપની પોલારિસ સ્માર્ટ મીટરિંગના વેચાણની પ્રક્રિયા નિર્ણાયક તબક્કામાં પહોંચી છે. કંપનીની માલિક આઈ સ્ક્વાયર્ડ કેપિટલ પોતાના રોકાણમાંથી બહાર નીકળવાની તૈયારી કરી રહી છે. અંદાજે ₹1,500 કરોડના આ સોદા માટે અદાણી એનર્જી સોલ્યુશન્સ, અપ્રાવા એનર્જી અને પ્રાઇવેટ ઈક્વિટી ફંડ એક્ટિસ સહિત અનેક મોટી કંપનીઓ વચ્ચે સ્પર્ધા ચાલી રહી છે.
સિંગાપુરની કંપની પાસે પણ છે ભાગીદારી
મળતી માહિતી મુજબ પસંદ કરાયેલા ચારથી પાંચ સંભવિત ખરીદદારો હાલમાં કંપનીની નાણાકીય અને વ્યવસાયિક તપાસ (ડ્યૂ ડિલિજન્સ) કરી રહ્યા છે અને ઓગસ્ટની શરૂઆત સુધી અંતિમ બાઈન્ડિંગ બોલીઓ રજૂ કરે તેવી શક્યતા છે. આઈ સ્ક્વાયર્ડ કેપિટલે ફેબ્રુઆરી 2023માં લગભગ 100 મિલિયન ડોલરનું રોકાણ કરીને પોલારિસમાં નિયંત્રણકારી હિસ્સો મેળવ્યો હતો, જ્યારે બાકીની ભાગીદારી સમુન્નતિ સિંગાપુર પાસે છે.
કંપની પાસે ઉત્તર પ્રદેશ અને પશ્ચિમ બંગાળમાં મોટા પ્રોજેક્ટ્સ
પોલારિસ ઘરેલુ અને ઔદ્યોગિક ઉપયોગ માટે સ્માર્ટ વીજળી અને ગેસ મીટર બનાવે છે. કંપની પાસે ઉત્તર પ્રદેશ અને પશ્ચિમ બંગાળમાં મોટા પ્રોજેક્ટ્સ છે. ઉત્તર પ્રદેશમાં મધ્યાંચલ વિદ્યૂત વિતરણ નિગમ સાથે મળીને લખનૌ અને અયોધ્યા ક્લસ્ટરમાં 51 લાખ સ્માર્ટ મીટર સ્થાપિત કરવાનો કરાર છે, જ્યારે પશ્ચિમ બંગાળમાં 22 લાખ સ્માર્ટ મીટર લગાવવાનો પ્રોજેક્ટ પણ કંપની સંભાળી રહી છે.
દેશભરમાં 25 કરોડ પ્રીપેડ સ્માર્ટ મીટર લગાવવાનું લક્ષ્ય
સ્માર્ટ મીટર એવા ડિજિટલ ઉપકરણો છે, જે વીજળી અથવા ગેસના વપરાશનો ડેટા આપમેળે રેકોર્ડ કરીને વીજ કંપની સુધી પહોંચાડે છે. તેના કારણે રિયલ-ટાઈમ વપરાશની માહિતી મળે છે, બિલિંગમાં પારદર્શિતા વધે છે અને અંદાજિત બિલની સમસ્યા ઘટે છે. કેન્દ્ર સરકાર રિવેમ્પ્ડ ડિસ્ટ્રિબ્યુશન સેક્ટર સ્કીમ (RDSS) હેઠળ વર્ષ 2027 સુધી દેશભરમાં 25 કરોડ પ્રીપેડ સ્માર્ટ મીટર લગાવવાનો લક્ષ્ય ધરાવે છે. આશરે ₹1.35 લાખ કરોડના આ અભિયાનથી વીજ વિતરણમાં થતા નુકસાનમાં નોંધપાત્ર ઘટાડો થવાની અપેક્ષા છે.
આ પણ વાંચો : Share Marketમાં વિદેશી રોકાણકારોનો વિશ્વાસ વધ્યો, FIIએ એક જ દિવસમાં રૂપિયા 2,603 કરોડના શેર ખરીદ્યા
ડિસ્કલેમર: શેરબજારમાં કે મ્યુચ્યુઅલ ફંડમાં રોકાણ કરતા પહેલા તમારા ફાઈનાન્શિયલ એડવાઈઝરની સલાહ અવશ્ય લો.
