નાણા મંત્રાલય દ્વારા 1 નવેમ્બર, 2026થી અમલમાં આવનારા સુધારેલા માસિક GST રિટર્ન ફોર્મમાં પ્રસ્તાવિત ફેરફારો અંગે વ્યવસાયો અને વ્યાવસાયિકો પાસેથી ટિપ્પણીઓ તથા સૂચનો માંગવામાં આવશે. સમાચાર એજન્સી પીટીઆઈ (PTI) ના અહેવાલ મુજબ, સેન્ટ્રલ બોર્ડ ઓફ ઇન્ડાયરેક્ટ ટેક્સીસ એન્ડ કસ્ટમ્સ (CBIC) ના GST પોલિસી ડિવિઝનના કમિશનર ગૌરવ સિંહે જણાવ્યું હતું કે વિભાગ GST ઓડિટ પ્રક્રિયાને વધુ સુવ્યવસ્થિત અને સરળ બનાવવા માટે પણ સક્રિયપણે કામ કરી રહ્યું છે.
GST રિટર્નમાં સુધારાની જરૂર કેમ પડી?
કેન્દ્ર અને રાજ્યના નાણામંત્રીઓની હાજરીમાં યોજાયેલી GST કાઉન્સિલની 57મી બેઠકમાં, GST રિટર્નમાં ટેક્સ જવાબદારીઓ અને ઇનપુટ ટેક્સ ક્રેડિટ (ITC)ની ભૂલોને સુધારવા માટે એક નવી વૈકલ્પિક પદ્ધતિને મંજૂરી આપવામાં આવી હતી. આ ફેરફારનો મુખ્ય હેતુ રિટર્ન ફાઇલિંગમાં આવતી વિસંગતતાઓને દૂર કરવાનો અને કરદાતાઓને બિનજરૂરી નોટિસોથી રાહત આપવાનો છે.
ડેટા મેચિંગ મજબૂત થશે અને ભૂલો સુધારી શકાશે
GST કાઉન્સિલે GSTR-1, GSTR-1A અને IFF જેવા ફોર્મ્સમાં જરૂરી સુધારાઓને લીલી ઝંડી આપી દીધી છે, જેથી આ ફોર્મ્સમાં ભરેલી માહિતીને માસિક કર ચુકવણી ફોર્મ GSTR-3B સાથે વધુ ચોકસાઈથી મેચ કરી શકાય. નવા ફોર્મ્સ દ્વારા કરદાતાઓને રિટર્નમાં પોતાની જવાબદારીઓ અને ITC માં સુધારો કરવાનો વિકલ્પ મળશે, જેનાથી સિસ્ટમ દ્વારા ઓટો-જનરેટ થતી નોટિસોનું પ્રમાણ નોંધપાત્ર રીતે ઘટશે.
તમે ક્યારે અને કેવી રીતે સૂચનો આપી શકશો?
સુધારેલા GST રિટર્ન ફોર્મના ડ્રાફ્ટને 1 નવેમ્બરના રોજ 'MyGov' પોર્ટલ પર જાહેર જનતા અને નિષ્ણાતોના પ્રતિસાદ માટે અપલોડ કરવામાં આવશે, જ્યાં 30 નવેમ્બર સુધી તમામ હિતધારકો પોતાના સૂચનો આપી શકશે. આ સુધારેલા GST રિટર્ન ફોર્મ્સ 1 એપ્રિલ, 2027 થી પૂર્ણપણે અમલમાં આવશે.
કાનૂની મંજૂરી અને કરદાતાઓને સ્પષ્ટતા
8 ઓક્ટોબરના રોજ લેવાયેલા નિર્ણયોને કાનૂની રૂપ આપવા માટે નાણા મંત્રાલયના કાનૂની વિભાગે સંબંધિત સૂચનાઓ અને પરિપત્રોને અંતિમ મંજૂરી આપી દીધી છે. શુક્રવારે આ વિગતો જાહેર થયા બાદ કરદાતાઓ અને વિવિધ વ્યવસાયોને નિયમો અંગે વધુ સ્પષ્ટતા મળશે.
આ પણ વાંચો : India હવે દરિયામાંથી મેળવશે 'વ્હાઇટ ગોલ્ડ': ઓટો માર્કેટમાં ઇલેક્ટ્રિક વાહનો અને બેટરી ક્ષેત્રે નવી ક્રાંતિના એંધાણ!
