ભારત સરકાર આગામી વર્ષથી આવકવેરાના નિયમોમાં ધરમૂળથી ફેરફાર કરવાની તૈયારી કરી રહી છે. સેન્ટ્રલ બોર્ડ ઓફ ડાયરેક્ટ ટેક્સિસ (CBDT) એ નવા આવકવેરા કાયદા 2025 ના અમલીકરણ માટે ડ્રાફ્ટ નિયમો જાહેર કર્યા છે. આ ફેરફારો 1 એપ્રિલ, 2026 થી અમલમાં આવવાની શક્યતા છે, જેનો મુખ્ય ઉદ્દેશ્ય સામાન્ય નાગરિકો માટે નાના વ્યવહારો સરળ બનાવવાનો અને મોટા વ્યવહારો પર કડક નજર રાખવાનો છે.
બેંકિંગ અને રોકડ વ્યવહારોમાં ફેરફાર
વર્તમાન નિયમ મુજબ, બેંકમાં એક દિવસમાં ₹50,000 થી વધુ જમા કરાવવા પર PAN કાર્ડ ફરજિયાત છે. જોકે, નવા ડ્રાફ્ટ મુજબ હવે દૈનિક મર્યાદાને બદલે વાર્ષિક મર્યાદા પર ધ્યાન અપાશે. જો તમે વર્ષ દરમિયાન એક અથવા વધુ ખાતામાંથી કુલ ₹10 લાખ કે તેથી વધુ રકમ જમા કરો કે ઉપાડો, તો જ PAN કાર્ડની જરૂર પડશે. આ ફેરફારથી મધ્યમ વર્ગને રોજિંદા બેંકિંગ કાર્યોમાં મોટી રાહત મળશે.
રિયલ એસ્ટેટ અને વાહન ખરીદીમાં મોટી રાહત
મિલકત બજારમાં વધતા ભાવોને ધ્યાનમાં રાખીને, સરકારે PAN ની મર્યાદા બમણી કરવાનો પ્રસ્તાવ મૂક્યો છે. હવે ₹20 લાખ સુધીના મિલકત વ્યવહારો (ખરીદ-વેચાણ કે ભેટ) માટે PAN કાર્ડ જરૂરી રહેશે નહીં, જે હાલમાં ₹10 લાખ છે. તેવી જ રીતે, વાહન ખરીદનારાઓ માટે પણ સારા સમાચાર છે. હવે ₹5 લાખથી વધુ કિંમતની કાર કે બાઇક માટે જ PAN કાર્ડ આપવું પડશે. અગાઉ ટુ-વ્હીલર સહિતના વાહનો માટે નિયમો અસ્પષ્ટ હતા, જે હવે સરળ બનશે.
વીમો અને હોસ્પિટાલિટી ક્ષેત્ર
વીમા ક્ષેત્રમાં પારદર્શિતા લાવવા માટે નિયમો કડક કરાયા છે. હવે કોઈપણ વીમા કંપની સાથે સંબંધ શરૂ કરતી વખતે (એકાઉન્ટ ખોલાવતી વખતે) PAN કાર્ડ ફરજિયાત બનશે. બીજી તરફ, હોટેલ બિલ અથવા ઇવેન્ટ મેનેજમેન્ટ માટેની પેમેન્ટ મર્યાદા ₹50,000 થી વધારીને ₹1 લાખ કરવામાં આવી છે. એટલે કે, ફેમિલી ફંક્શન કે હોટેલ રોકાણ દરમિયાન હવે વારંવાર PAN કાર્ડ આપવાની જરૂર નહીં રહે.ે
ક્રિપ્ટો અને ડિજિટલ પેમેન્ટ પર નજર
નવા નિયમોમાં ભવિષ્યની ટેકનોલોજીનો પણ સમાવેશ કરાયો છે. ક્રિપ્ટો એક્સચેન્જોએ હવે તમામ વ્યવહારોની માહિતી આવકવેરા વિભાગ સાથે શેર કરવી પડશે. આ ઉપરાંત, ડિજિટલ રૂપિયો (CBDC) ને માન્ય ઇલેક્ટ્રોનિક ચુકવણીનો દરજ્જો આપવાની દરખાસ્ત છે, જે ડિજિટલ અર્થતંત્રને વેગ આપશે.
આ પણ વાંચોઃ 8th Pay Commission: કેન્દ્ર સરકારના કર્મચારીઓ માટે મોટા સમાચાર, જાણો ક્યારે લાગુ થશે નવો પગાર?
