ભારતના વિદેશી વેપારમાં જૂન 2026 દરમિયાન નોંધપાત્ર વૃદ્ધિ જોવા મળી છે. સરકાર દ્વારા જાહેર કરવામાં આવેલા આંકડા મુજબ, જૂન મહિનામાં ભારતની નિકાસમાં 15.5 ટકાનો વધારો નોંધાયો છે અને તે વધીને 40.41 અબજ ડોલર થઈ છે. બીજી તરફ, આયાતમાં 31 ટકાનો મોટો વધારો નોંધાતા તે 70.84 અબજ ડોલર સુધી પહોંચી છે.

વેપાર ખાધ કોને કહેવામાં આવે છે?

આયાતમાં નિકાસની સરખામણીએ વધુ ઝડપથી વધારો થતાં દેશનું વેપાર ખાધ (ટ્રેડ ડેફિસિટ) વધીને 30.43 અબજ ડોલર થઈ ગયું છે. વેપાર ખાધ ત્યારે સર્જાય છે જ્યારે કોઈ દેશની આયાત તેની નિકાસ કરતાં વધુ હોય છે. એટલે કે, વિદેશમાંથી માલ અને સેવાઓ ખરીદવામાં થતો ખર્ચ, વિદેશમાં વેચાણથી થતી આવક કરતાં વધારે હોય ત્યારે આ તફાવતને વેપાર ખાધ કહેવામાં આવે છે. ચાલુ નાણાકીય વર્ષ 2026-27ના પ્રથમ ત્રિમાસિક ગાળા (એપ્રિલથી જૂન)માં પણ ભારતના વિદેશી વેપારમાં વૃદ્ધિ નોંધાઈ છે. આ સમયગાળા દરમિયાન દેશની કુલ નિકાસ 15.92 ટકા વધીને 129.32 અબજ ડોલર રહી છે, જ્યારે આયાત 19.89 ટકા વધીને 216.18 અબજ ડોલર થઈ છે.

સોનાની આયાતમાં પણ વધારો નોંધાયો

પ્રથમ ત્રિમાસિકમાં સોનાની આયાતમાં પણ વધારો નોંધાયો છે. ગયા વર્ષે એપ્રિલ-જૂન દરમિયાન 7.49 અબજ ડોલરની સોનાની આયાત સામે આ વર્ષે આ આંકડો વધીને 11.01 અબજ ડોલર થયો છે. વાણિજ્ય સચિવ રાજેશ અગ્રવાલે જણાવ્યું કે, જૂન 2026માં પશ્ચિમ એશિયાઈ દેશોમાં ભારતની નિકાસ 7.29 ટકા વધીને 5 અબજ ડોલર સુધી પહોંચી છે. તેમણે જણાવ્યું કે આ ક્ષેત્રમાં ભારતીય ઉત્પાદનોની માંગ સતત જળવાઈ રહી છે, જેના કારણે નિકાસને મજબૂતી મળી છે.

જૂન મહિનામાં આયાતમાં થયેલા વધારાનું મુખ્ય કારણ ક્રૂડ ઓઈલ, ઈલેક્ટ્રોનિક્સ સામાન, મશીનરી અને કિંમતી ધાતુઓની વધુ ખરીદી રહ્યું છે. નિષ્ણાતો અનુસાર, વધતી આયાત ભારતની આર્થિક પ્રવૃત્તિ અને ઔદ્યોગિક માગમાં વધારો દર્શાવે છે, પરંતુ વેપાર ખાધને નિયંત્રિત કરવું પણ સરકાર માટે મહત્વપૂર્ણ રહેશે.

આ પણ વાંચો : Retail Inflation : જૂન 2026માં છુટક મોંઘવારી દર 4.38 ટકા નોંધાયો, ખાદ્ય મોંઘવારી દર 5.32% પર પહોંચ્યો