Delhi મેટ્રો રેલ કોર્પોરેશન (DMRC) આ એપ દ્વારા મુસાફરોની રોજિંદી મુસાફરીને વધુ સરળ અને સુવિધાજનક બનાવવાના સતત પ્રયાસો કરી રહ્યું છે. સારથી એપ પર પરિવહન સાથે જોડાયેલી વિવિધ સેવાઓ ઉપરાંત ઘણી અન્ય સુવિધાઓ પણ એક જ સરળ અને યુઝર-ફ્રેન્ડલી ડિજિટલ પ્લેટફોર્મ પર ઉપલબ્ધ છે.
એક જ એપથી મુસાફરીનું આયોજન
સારથી એપને એવી રીતે તૈયાર કરવામાં આવી છે કે મુસાફરો પોતાની મુસાફરીનું આયોજન સરળતાથી કરી શકે. મુસાફરી દરમિયાન અલગ-અલગ પ્લેટફોર્મ પર જવાની જરૂરિયાત ઓછી થાય અને તેમને એક સરળ ડિજિટલ અનુભવ મળે તેવો પ્રયાસ કરવામાં આવ્યો છે.
મેટ્રો ઉપરાંત કઈ સેવાઓનું બુકિંગ કરી શકાય?
એપમાં વિવિધ પરિવહન સેવાઓને એકસાથે જોડવામાં આવી છે. તેમાં DTC બસ, IRCTC દ્વારા રેલ ટિકિટ બુકિંગ, આંતરરાજ્ય બસ બુકિંગ, NCRTCની નમો ભારત અને NMRCની નોઈડા મેટ્રો જેવી સેવાઓ સામેલ છે. એટલે મુસાફરો એક જ પ્લેટફોર્મ પરથી જાહેર પરિવહનના વિવિધ સાધનોની માહિતી મેળવી શકે છે અને સેવાઓનો ઉપયોગ કરી શકે છે.
મેટ્રો મુસાફરો માટે બીજી ઘણી સુવિધાઓ
સારથી એપ પર મેટ્રો નકશો, પ્રથમ અને છેલ્લી મેટ્રોના સમય, પાર્કિંગની માહિતી, સ્ટેશન પર ઉપલબ્ધ સુવિધાઓ, ઇલેક્ટ્રિક વાહન (EV) ચાર્જિંગ સ્ટેશન, બેટરી સ્વેપિંગ સ્ટેશન અને રૂટ ગાઈડન્સ જેવી અનેક સુવિધાઓ પણ ઉપલબ્ધ છે. પરિવહન સેવાઓ ઉપરાંત સારથી એપ દ્વારા મોબાઇલ રિચાર્જ, દવાઓનો ઓર્ડર, FASTag રિચાર્જ અને અન્ય યુટિલિટી બિલની ચુકવણી જેવી સુવિધાઓ પણ ઉપલબ્ધ છે. એપમાં વર્ચ્યુઅલ મેટ્રો કાર્ડની સુવિધા પણ આપવામાં આવી છે.
એક જ પ્લેટફોર્મ પર અનેક સેવાઓ
આ તમામ સુવિધાઓને એક જ પ્લેટફોર્મ પર ઉપલબ્ધ કરાવીને સારથી એપ મુસાફરો માટે ડિજિટલ મોબિલિટી સાથી તરીકે ઉભરી રહી છે. તેના દ્વારા પરિવહન સંબંધિત માહિતી, ટિકિટિંગ અને અન્ય જરૂરી સેવાઓ સરળતાથી મેળવી શકાય છે. આ પહેલ દિલ્હી મેટ્રો રેલ કોર્પોરેશનના એકીકૃત, ડિજિટલ-ફર્સ્ટ અને મુસાફર કેન્દ્રિત મોબિલિટી ઇકોસિસ્ટમ વિકસાવવાના પ્રયાસોનો એક ભાગ છે. તેનો હેતુ જાહેર પરિવહનના વધુમાં વધુ એકીકૃત ઉપયોગને પ્રોત્સાહન આપવાનો પણ છે.
શિયાળામાં મેટ્રોના ઉપયોગ પર ભાર
શિયાળાના મહિનાઓમાં રાષ્ટ્રીય રાજધાનીને હવા પ્રદૂષણની ગંભીર સમસ્યાનો સામનો કરવો પડે છે. આવા સમયે દિલ્હી-NCRના લોકોને મેટ્રોનો વધુમાં વધુ ઉપયોગ કરવા માટે પ્રોત્સાહિત કરવામાં આવશે. સાથે જ મુસાફરોને ટિકિટિંગ સંબંધિત જરૂરિયાતો માટે સારથી એપનો ઉપયોગ કરવા માટે પણ પ્રેરિત કરવામાં આવશે.
આ પણ વાંચો: AMC એ 9 મેટ્રો સ્ટેશન નજીક ફ્રી પાર્કિંગ પ્લોટ ફાળવ્યા; ટ્રાફિક સમસ્યામાંથી મળશે રાહત