સિનિયર સિટીઝન્સ માટે 5 વર્ષની ફિક્સ્ડ ડિપોઝિટ (FD) પર ખાનગી અને સરકારી બેંકોના વ્યાજ દરોમાં મોટો તફાવત જોવા મળી રહ્યો છે. કેટલીક બેંકો 8% સુધીનું વળતર આપી રહી છે. તેથી, રોકાણ કરતા પહેલાં વ્યાજ દરોની સરખામણી કરીને વધુ સારું વળતર આપતો વિકલ્પ પસંદ કરવો ફાયદાકારક રહેશે.
નિવૃત્તિ (રિટાયરમેન્ટ) પછી નિયમિત અને સુરક્ષિત આવકની શોધમાં હોય તેવા વરિષ્ઠ નાગરિકો માટે ફિક્સ્ડ ડિપોઝિટ (FD) આજે પણ સૌથી પસંદગીના રોકાણ વિકલ્પોમાંથી એક છે. જોકે, બધી બેંકો એકસરખું વ્યાજ આપતી નથી. આવી સ્થિતિમાં રોકાણ કરતા પહેલાં અલગ-અલગ બેંકોના FD દરોની સરખામણી કરવી ખૂબ જ જરૂરી છે. જો તમે 3 વર્ષ કે 5 વર્ષની FD કરવાનું પ્લાનિંગ કરી રહ્યા છો, તો કેટલીક ખાનગી અને સરકારી બેંકો વરિષ્ઠ નાગરિકોને આકર્ષક વ્યાજ દરો ઓફર કરી રહી છે.
5 વર્ષની FD પર ખાનગી બેંકોમાં કોણ સૌથી આગળ?
5 વર્ષની FD પર ખાનગી ક્ષેત્રની બેંકોમાં DCB Bank સૌથી વધુ 8.00% વ્યાજ આપી રહી છે. ત્યારબાદ SBM Bank India અને YES Bank 7.50% નો દર ઓફર કરી રહ્યા છે.જ્યારે Jammu & Kashmir Bank 7.35%, Axis Bank 7.25% અને RBL Bank તથા Tamilnad Mercantile Bank 7.20% વ્યાજ આપી રહ્યા છે. આ પરિસ્થિતિમાં વધુ વળતર ઈચ્છતા વરિષ્ઠ નાગરિકો માટે ખાનગી બેંકો વધુ સારો વિકલ્પ સાબિત થઈ શકે છે.
સરકારી બેંકોમાં SBI સૌથી આગળ
જો તમે સરકારી બેંકમાં રોકાણ કરવા માંગો છો, તો State Bank of India (SBI) 5 વર્ષની FD પર વરિષ્ઠ નાગરિકોને 7.05% વ્યાજ આપી રહી છે.ત્યારબાદ Bank of Baroda 6.90%, Punjab National Bank (PNB) 6.85%, જ્યારે Bank of India અને Canara Bank 6.75% વ્યાજ આપી રહ્યા છે. અન્ય જાહેર ક્ષેત્રની (સરકારી) બેંકોમાં આ દર 6.50% થી 6.60% ની વચ્ચે છે.
3 વર્ષની FD પર પણ મળી રહ્યું છે આકર્ષક વળતર
જો તમારા રોકાણનો સમયગાળો 3 વર્ષનો છે, તો ખાનગી બેંકોમાં Bandhan Bank, IndusInd Bank અને YES Bank વરિષ્ઠ નાગરિકોને 7.75% વ્યાજ આપી રહ્યા છે.જ્યારે RBL Bank 7.70% અને IDFC FIRST Bank તથા SBM Bank India 7.60% નો દર ઓફર કરી રહ્યા છે. સરકારી બેંકોમાં Bank of India 7.45% સાથે સૌથી આગળ છે, જ્યારે PNB અને SBI 6.80% તથા Bank of Baroda અને Canara Bank 6.75% વ્યાજ આપો છો.
રોકાણ કરતા પહેલાં આ બાબતોનું ખાસ ધ્યાન રાખો
નિષ્ણાતોનું કહેવું છે કે માત્ર સૌથી વધુ વ્યાજ દર જોઈને FDમાં રોકાણ ન કરવું જોઈએ. રોકાણ કરતા પહેલાં બેંકની વિશ્વસનીયતા, મુદત પૂરી થાય તે પહેલાં FD તોડવાના નિયમો (Premature Withdrawal Rules), વ્યાજ ચુકવણીનો વિકલ્પ (માસિક, ત્રિમાસિક કે વાર્ષિક) અને ટેક્સ (TDS) સંબંધિત નિયમોને સમજવા જરૂરી છે.જો રોકાણની રકમ મોટી હોય, તો તેને એક જ બેંકમાં મૂકવાને બદલે અલગ-અલગ બેંકોમાં વહેંચીને રોકાણ કરવું એ જોખમ ઘટાડવાની એક શ્રેષ્ઠ રણનીતિ હોઈ શકે છે. યોગ્ય સરખામણી કર્યા પછી જ કરાયેલું રોકાણ વરિષ્ઠ નાગરિકોને સુરક્ષિત અને સારું વળતર મેળવવામાં મદદ કરી શકે છે.
આ પણ વાંચો: Iran War 2026: ઈરાન વિરુદ્ધ અખાતી દેશો, બહરીન-કુવૈતે કર્યા સીક્રેટ હુમલા
