જ્યારે ફળોના રાજા ગણાતી કેરીની વાત આવે ત્યારે સમગ્ર વિશ્વમાં ભારતનો કોઈ મુકાબલો નથી. વિદેશી બજારોમાં ભારતીય કેરીની મીઠાશનો એવો જાદુ છે કે નિકાસના મામલે ભારત હંમેશા ટોચ પર રહે છે. તાજેતરમાં ભારતીય નિકાસકારોને ત્યારે મોટો ઝટકો લાગ્યો જ્યારે જાપાનના પ્લાન્ટ ક્વોરેન્ટાઇન સત્તાવાળાઓએ ઇન્સ્પેક્શન દરમિયાન ફ્યુમિગેશન (કીટ નિયંત્રણ પ્રક્રિયા) માં ટેકનિકલ ખામીઓ દર્શાવીને આપણી કેટલીક પ્રીમિયમ કેરીઓની આયાત પર રોક લગાવી દીધી હતી. પરંતુ બિઝનેસની દુનિયામાં કહેવત છે ને કે 'જ્યારે એક દરવાજો બંધ થાય ત્યારે બીજો ખુલે છે'. જાપાને જે ક્વોલિટી કેરી નકારી કાઢી, તે જ કેરી હવે સિંગાપોરના સુપરમાર્કેટમાં ધડલ્લેથી વેચાઈ રહી છે અને લોકો તેને હાથોહાથ ખરીદી રહ્યા છે.
સિંગાપોરના બજારોમાં ભારે ડિમાન્ડ
જાપાને કેસર, અલ્ફાન્સો, લંગડો અને બંગનપલ્લી જેવી ભારતની જે ટોપ ક્લાસ પ્રીમિયમ જાતોની આયાત પર બ્રેક લગાવી હતી, તેની હવે સિંગાપોરમાં બમ્પર ડિમાન્ડ જોવા મળી રહી છે. સિંગાપોર સ્થિત ભારતીય હાઈ કમિશને પોતે સોશિયલ મીડિયા પ્લેટફોર્મ એક્સ (X) પર આ ટ્રેન્ડની માહિતી શેર કરી છે. હાઈ કમિશનના જણાવ્યા અનુસાર, સિંગાપોરના લોકો પર ભારતીય કેરીનો એવો ક્રેઝ છવાયો છે કે સુપરમાર્કેટ્સમાં સ્ટોક આવતાની સાથે જ મિનિટોમાં કબાટો અને છાજલીઓ ખાલી થઈ જાય છે.
ખાડી દેશોથી લઈને અમેરિકા-યુરોપ સુધી દબદબો
આંતરરાષ્ટ્રીય વ્યાપારના મોરચે ભારતની કૃષિ નિકાસ અત્યંત મજબૂત સ્થિતિમાં છે. માત્ર સિંગાપોર જ નહીં, પરંતુ ખાડી દેશો (Gulf Countries) માં પણ આપણી પ્રીમિયમ કેરીઓની જબરદસ્ત માંગ રહે છે. કૃષિ અને પ્રક્રિયા કરેલા ખાદ્ય ઉત્પાદન નિકાસ વિકાસ સત્તામંડળ (APEDA) ના આંકડા આ સફળતાની સાક્ષી પૂરે છે. વર્ષ ૨૦૨૪ ના ડેટા અનુસાર, ભારતે માત્ર યુએઈ (UAE) ને અંદાજે ૧૬૬ કરોડ રૂપિયા ($20 Million) ની કિંમતની ૧૨,૮૯૭ મેટ્રિક ટનથી વધુ કેરીની નિકાસ કરી હતી. આ સિવાય અમેરિકા, બ્રિટન, કતાર અને કુવૈત જેવા વિકસિત બજારોમાં પણ ભારતીય કેરીનો દબદબો છે.
રેકોર્ડ ઉત્પાદનથી ખેડૂતો માલામાલ
પીઆઈબી (PIB) ના સત્તાવાર અંદાજ મુજબ, વર્ષ ૨૦૨૪-૨૫ દરમિયાન દેશમાં ૨૨૮.૩૭ લાખ મેટ્રિક ટન કેરીના ઉત્પાદનનો અંદાજ છે, જે વિશ્વમાં સૌથી વધુ છે. ભારતની ભૌગોલિક વિવિધતાના કારણે દેશમાં અલ્ફાન્સો, બંગનપલ્લી, કેસર, તોતાપુરી, નીલમ, સિંદુરા અને મલ્લિકા જેવી અદ્ભુત જાતો પાકે છે. ઉત્તર પ્રદેશ, આંધ્ર પ્રદેશ, બિહાર, કર્ણાટક, ગુજરાત અને મધ્ય પ્રદેશ જેવા રાજ્યો આ બમ્પર ઉત્પાદનના મુખ્ય કેન્દ્રો છે, જે વિદેશી અને સ્થાનિક બજારમાં ઊંચી કિંમતો મેળવીને લાખો ખેડૂતોની આજીવિકાનો મોટો આધાર બન્યા છે.
આ પણ વાંચો:Donald Trump: અમેરિકા વધુ એક યુદ્ધના મૂડમાં, ક્યુબા પર હુમલા માટે પેન્ટાગનનો ‘માસ્ટર પ્લાન’ તૈયાર, ટ્રમ્પની મંજૂરીની રાહ
