એન્જિનિયરિંગ ક્ષેત્ર માટે ખાસ મેટલ પાર્ટ્સ બનાવતી કંપની ઈન્ડો-એમઆઈએમ (Indo-MIM)એ શેરબજારમાં શાનદાર શરૂઆત કરી છે. કંપનીનો શેર IPOના ઈશ્યૂ પ્રાઈસ ₹485 સામે બોમ્બે સ્ટોક એક્સચેન્જ પર સીધો ₹703 પર લિસ્ટ થયો હતો, એટલે કે રોકાણકારોને પહેલા જ દિવસે આશરે 45 ટકા જેટલો જંગી નફો મળ્યો. લિસ્ટિંગ બાદ શેરમાં વધુ તેજી જોવા મળી અને તે દિવસ દરમિયાન લગભગ ₹757.75 સુધી પહોંચ્યો હતો. બપોરે 3 વાગ્યે શેર લગભગ ₹742ની આસપાસ ટ્રેડ થઈ રહ્યો હતો.
ઈશ્યૂને 72.34 ગણું સબ્સ્ક્રિપ્શન મળ્યું હતું
કંપનીના IPOને મળેલા જબરદસ્ત પ્રતિસાદથી જ તેના મજબૂત લિસ્ટિંગના સંકેતો મળી ગયા હતા. IPOના છેલ્લા દિવસે આ ઈશ્યૂને 72.34 ગણું સબ્સ્ક્રિપ્શન મળ્યું હતું, જે રોકાણકારોના ભારે વિશ્વાસને દર્શાવે છે. કંપનીએ IPO માટે પ્રતિ શેર ₹461થી ₹485ની પ્રાઈસ બેન્ડ નક્કી કરી હતી. સફળ લિસ્ટિંગ બાદ કંપનીનું માર્કેટ કેપિટલાઇઝેશન ₹35,132 કરોડથી વધુ પહોંચી ગયું છે.
કંપનીએ ₹500 કરોડના નવા શેર ઈશ્યુ કરીને ભંડોળ એકત્ર કર્યું
IPO મારફતે કંપનીએ ₹500 કરોડના નવા શેર ઈશ્યુ કરીને ભંડોળ એકત્ર કર્યું છે. ઉપરાંત, હાલના શેરધારકોએ ઓફર ફોર સેલ (OFS) હેઠળ લગભગ 6.83 કરોડ શેરોનું વેચાણ કર્યું છે. કંપનીના મેનેજમેન્ટ અનુસાર નવા ભંડોળમાંથી ₹400 કરોડનો ઉપયોગ બેંકના જૂના દેવા ચૂકવવા માટે કરવામાં આવશે, જ્યારે બાકીની રકમ બિઝનેસના વિસ્તરણ અને અન્ય કામગીરીમાં ખર્ચાશે. દેવું ઘટવાથી કંપનીની નાણાકીય સ્થિતિ વધુ મજબૂત બનવાની અપેક્ષા છે.
એન્જિનિયરિંગ પાર્ટ્સ બનાવે છે કંપની
1996માં સ્થાપિત બેંગલુરુ સ્થિત ઇન્ડો-એમઆઈએમ મેટલ ઈન્જેક્શન મોલ્ડિંગ (MIM) ટેક્નોલોજી દ્વારા ઉચ્ચ ગુણવત્તાવાળા અને ચોકસાઈ ધરાવતા એન્જિનિયરિંગ પાર્ટ્સ બનાવે છે. કંપની ઉત્પાદનથી લઈને સંપૂર્ણ મેન્યુફેક્ચરિંગ સોલ્યુશન્સ પૂરા પાડે છે. લાંબા અનુભવ, આધુનિક ટેક્નોલોજી અને મજબૂત બિઝનેસ મોડલને કારણે કંપનીને રોકાણકારોનો જબરદસ્ત પ્રતિસાદ મળ્યો છે.
આ પણ વાંચો : Bajaj Housing Finance Q1 Results : બજાજ ગ્રુપની કંપનીને થયો 715નો નફો, શેર પર જોવા મળશે અસર
ડિસ્કલેમર: શેરબજારમાં કે મ્યુચ્યુઅલ ફંડમાં રોકાણ કરતા પહેલા તમારા ફાઈનાન્શિયલ એડવાઈઝરની સલાહ અવશ્ય લો.
