રિલાયન્સ ઈન્ડસ્ટ્રીઝ લિમિટેડ (RIL)ના ચેરમેન અને મેનેજિંગ ડિરેક્ટર મુકેશ અંબાણીએ ભારતની લાંબા ગાળાની આર્થિક સંભાવનાઓમાં વિશ્વાસ વ્યક્ત કરતા કહ્યું કે દેશ 8થી 10 ટકાનો વિકાસ દર જાળવી શકે છે અને તેમાં ડબલ ડિજિટનો ગ્રોથ પણ પ્રાપ્ત કરી શકે છે.
મને ભારત વિશ્વ કરતાં વધુ ઝડપથી વિકાસ કરતું દેખાઈ રહ્યું છે: મુકેશ અંબાણી
મુંબઈમાં Jio-BlackRock ઈવેન્ટ દરમિયાન BlackRockના CEO લેરી ફિંક સાથે વાત કરતા મુકેશ અંબાણીએ કહ્યું, "મને ભારત વિશ્વ કરતાં વધુ ઝડપથી વિકાસ કરતું દેખાઈ રહ્યું છે. ભારતીય અર્થવ્યવસ્થાનું વૃક્ષ હવે સ્પષ્ટપણે ફળ આપી રહ્યું છે અને તે પણ સ્થિરતા અને ભરપૂર સંભાવનાઓની સાથે. આપણી નીતિઓ ટકાઉ રહી છે, નીતિમાં જળવાઈ રહી છે અને આપણે હંમેશા રૂઢિચુસ્ત વલણ અપનાવ્યું છે."
ભારતીયોની બચત પર આપ્યું મોટું નિવેદન
ભારતીય બચત વિશે બોલતા મુકેશ અંબાણીએ કહ્યું, "ભારતીય લોકો છેલ્લા પાંચથી છ દાયકાથી સતત બચત કરી રહ્યા છે, પરંતુ તે બચત તેટલી પ્રોડક્ટિવ રહી નથી. Jio-BlackRock માટે તક એ છે કે અમે લોકોને બચતની સાથે સાથે તેનાથી કમાણી કરવાનો વિકલ્પ આપવામાં આવે. " ઊર્જા ક્ષેત્ર અંગે તેમણે કહ્યું કે ભારત આગામી દાયકામાં તેની 80 ટકા ઊર્જા આયાત કરશે નહીં. મુકેશ અંબાણીએ કહ્યું, "ટેકનોલોજીકલ માળખાગત સુવિધાઓના સંદર્ભમાં ભારત વિશ્વથી પાછળ રહેશે નહીં. મારું માનવું છે કે ભારતમાં $4.5 ટ્રિલિયનની તક છે અને આગામી 20-30 વર્ષમાં તે બાકીના વિશ્વ કરતાં વધુ ઝડપથી વિકાસ કરશે."
વિશ્વની સૌથી મોટી એસેટ મેનેજમેન્ટ કંપની છે બ્લેકરોક
ઉલ્લેખનીય છે કે Jio-BlackRockએ Jio Financial Services (JFSL) અને BlackRock, વિશ્વની સૌથી મોટી એસેટ મેનેજમેન્ટ કંપની વચ્ચેનું 50:50 સંયુક્ત સાહસ છે. આ ભાગીદારી પર મુકેશ અંબાણીએ કહ્યું, "લેરીએ મને કહ્યું કે BlackRockનું લક્ષ્ય ફક્ત ટૂંકા ગાળાના પરિણામો અથવા રોકાણકારો માટે વળતર નથી. જો આપણે પહેલા આ પૈસાનો ઉપયોગ સમાજના સારા ભવિષ્ય માટે ન કરી શકીએ તો અમારું કાર્ય અધૂરું છે. રિલાયન્સ પણ એ જ દ્રષ્ટિકોણ ધરાવે છે."
આ પણ વાંચો : HAL 5th જનરેશન ફાઈટર જેટ પ્રોજેક્ટમાંથી થઈ બહાર, શેરનો ભાવ અચાનક જ ગગડ્યો
