Isha Ambaniએ ખરીદી પ્રિયંકા ચોપરાની બ્રાન્ડ 'Anomaly', જાણો શું છે કંપનીનો બિઝનેસ

રિલાયન્સ રિટેલે એક મોટી બિઝનેસ ડીલ કરી છે. અભિનેત્રી પ્રિયંકા ચોપરા જોનાસના ગ્લોબલ હેરકેર બ્રાન્ડ 'Anomaly'ને ખરીદી લીધી છે. આ ડીલ સાથે રિલાયન્સે પોતાના બ્યુટી અને પર્સનલ કેર બિઝનેસને વધુ મજબૂત બનાવવાની દિશામાં મહત્વપૂર્ણ પગલું ભર્યું છે. કંપનીએ જણાવ્યું છે કે આ ખરીદીમાં 'Anomaly' બ્રાન્ડના તમામ ટ્રેડમાર્ક, અધિકારો અને ડિજિટલ પ્લેટફોર્મ્સનો સમાવેશ થાય છે. એટલે હવે આ બ્રાન્ડનું સંપૂર્ણ માલિકી રિલાયન્સ રિટેલ પાસે રહેશે. જોકે આ ડીલની કિંમત જાહેર કરવામાં આવી નથી.

શું કહ્યું ઈશા અંબાણીએ ?

રિલાયન્સ રિટેલનું કહેવું છે કે તે હવે પોતાના વિશાળ રિટેલ નેટવર્ક અને ઓનલાઈન પ્લેટફોર્મ્સ, ખાસ કરીને બ્યુટી પ્લેટફોર્મ Tira મારફતે 'Anomaly'ને ઝડપથી આગળ વધારશે. આ બ્રાન્ડ 2021માં પ્રિયંકા ચોપરાએ શરૂ કરી હતી અને તે કેમિકલ-ફ્રી તથા વેગન હેરકેર પ્રોડક્ટ્સ માટે જાણીતી છે. રિલાયન્સની ડિરેક્ટર ઈશા અંબાણીએ જણાવ્યું કે 'Anomaly'ને પોર્ટફોલિયોમાં સામેલ કરવી એક સ્ટ્રેટેજિક નિર્ણય છે. તેમનું માનવું છે કે આ બ્રાન્ડ ગુણવત્તા, યોગ્ય કિંમત અને વૈશ્વિક ઓળખને કારણે ગ્રાહકોમાં વધુ લોકપ્રિય બનશે.

પ્રિયંકા ચોપરા આ બ્રાન્ડ સાથે ક્રિએટિવ ડિરેક્ટર તરીકે જોડાયેલી રહેશે

કંપનીએ સ્પષ્ટ કર્યું છે કે હવે ભારત 'Anomaly' માટે મુખ્ય માર્કેટ રહેશે. સાથે જ બ્રાન્ડને ઉત્તર અમેરિકા, યુકે અને મધ્ય પૂર્વ જેવા બજારોમાં પણ વિસ્તૃત કરવામાં આવશે. પ્રિયંકા ચોપરા આ બ્રાન્ડ સાથે ક્રિએટિવ ડિરેક્ટર તરીકે જોડાયેલી રહેશે અને પ્રોડક્ટ ડિઝાઇન તથા બ્રાન્ડ સ્ટ્રેટેજીમાં મહત્વપૂર્ણ ભૂમિકા ભજવશે. આ ડીલથી સ્પષ્ટ થાય છે કે રિલાયન્સ રિટેલ બ્યુટી અને ફેશન સેક્ટરમાં પોતાની હાજરી ઝડપથી વિસ્તારી રહી છે અને ડિજિટલ તથા ગ્લોબલ બ્રાન્ડ્સમાં ભારે રોકાણ કરી રહી છે.

આ પણ વાંચો : Business : 1 મેના રોજ શેરબજાર રહેશે બંધ, નહીં થાય કોઈ ટ્રેડિંગ, જાણો કારણ

 ડિસ્કલેમર: શેરબજારમાં કે મ્યુચ્યુઅલ ફંડમાં રોકાણ કરતા પહેલા તમારા ફાઈનાન્શિયલ એડવાઈઝરની સલાહ અવશ્ય લો.