સરકારી ઓઈલ રિફાઈનરી કંપની મેંગ્લોર રિફાઈનરી એન્ડ પેટ્રોકેમિકલ્સ લિમિટેડ (MRPL)ના શેરોમાં આજે જોરદાર તેજી જોવા મળી હતી. કંપનીએ જૂન 2026 ત્રિમાસિકના મજબૂત નાણાકીય પરિણામો જાહેર કર્યા બાદ શેરમાં ઇન્ટ્રા-ડે દરમિયાન લગભગ 7 ટકાનો ઉછાળો નોંધાયો. જોકે, બાદમાં કેટલાક રોકાણકારોએ નફાવસૂલી કરતા શેરમાં થોડો ઘટાડો થયો, છતાં બજારમાં તે મજબૂત સ્થિતિમાં રહ્યો. બીએસઈ પર MRPLનો શેર લગભગ 6 ટકા વધીને ₹167.15 પર ટ્રેડ થયો હતો, જ્યારે દિવસ દરમિયાન તે ₹168.60 સુધી પહોંચ્યો હતો.
EBITDA માર્જિન 1.03 ટકાથી વધીને 3.44 ટકા થયો
જૂન 2026 ત્રિમાસિકમાં કંપનીએ ગયા વર્ષની સમાન સમયગાળાના ₹270.7 કરોડના નુકસાનની સરખામણીએ ₹945.7 કરોડનો ચોખ્ખો નફો નોંધાવ્યો છે. સાથે જ કંપનીની ઓપરેશનલ આવકમાં આશરે 120 ટકાનો વધારો થયો અને તે ₹38,254.2 કરોડ સુધી પહોંચી. EBITDA પણ ₹179.5 કરોડથી વધીને ₹1,317.6 કરોડ થયો, જ્યારે EBITDA માર્જિન 1.03 ટકાથી વધીને 3.44 ટકા થયો છે.
ઈન્ફ્રાસ્ટ્રક્ચર અને લોજિસ્ટિક્સ નેટવર્કનો પણ વિસ્તાર
કંપનીએ આ સમયગાળા દરમિયાન પોતાના ઈન્ફ્રાસ્ટ્રક્ચર અને લોજિસ્ટિક્સ નેટવર્કનો પણ વિસ્તાર કર્યો છે. બેંગલુરુના કેમ્પેગૌડા ઈન્ટરનેશનલ એરપોર્ટ સુધી એવિએશન ટર્બાઈન ફ્યુઅલ (ATF) પાઈપલાઈન માટે PNGRBની મંજૂરી મળી છે. ઉપરાંત મંગલુરુ, આંધ્ર પ્રદેશ અને તમિલનાડુમાં નવા ટર્મિનલ અને ડેપોથી પ્રોડક્ટ લોડિંગ પણ શરૂ કરવામાં આવ્યું છે.
MRPLએ રોકાણકારોને સારું વળતર આપ્યું
ગ્રીન એનર્જી ક્ષેત્રે પણ કંપનીએ મહત્વપૂર્ણ સિદ્ધિ મેળવી છે. એપ્રિલમાં ISCC CORSIA સર્ટિફિકેશન મળ્યા બાદ હવે MRPL વપરાયેલા કુકિંગ ઓઈલ (UCO)માંથી સસ્ટેનેબલ એવિએશન ફ્યુઅલ (SAF)નું ઉત્પાદન કરી શકશે. શેરના પ્રદર્શનની વાત કરીએ તો છેલ્લા એક વર્ષમાં MRPLએ રોકાણકારોને સારું વળતર આપ્યું છે. ઓગસ્ટ 2025માં ₹120.35ના નીચલા સ્તરેથી માર્ચ 2026માં શેર ₹214.95 સુધી પહોંચ્યો હતો, જે એક વર્ષનું સર્વોચ્ચ સ્તર રહ્યું હતું.
આ પણ વાંચો : Groww Q1 Results : કંપનીના નફામાં 94%નો ઉછાળો, શેરના ભાવમાં જોવા મળી જોરદાર તેજી
ડિસ્કલેમર: શેરબજારમાં કે મ્યુચ્યુઅલ ફંડમાં રોકાણ કરતા પહેલા તમારા ફાઈનાન્શિયલ એડવાઈઝરની સલાહ અવશ્ય લો.
