દેશની આર્થિક રાજધાની અને સપનાના શહેર ગણાતા મુંબઈમાં રહેવું કેટલું મોંઘું સાબિત થઈ શકે છે, તેનો જીવતો-જાગતો પુરાવો સોશિયલ મીડિયા પર વાયરલ થઈ રહ્યો છે. મુંબઈના અત્યંત પોશ વિસ્તાર વર્લીમાં રહેતા એક ઇન્વેસ્ટમેન્ટ બેંકરે પોતાના માસિક ખર્ચનો એવો હિસાબ કિતાબ રજૂ કર્યો છે, જેણે મોટા મોટા કમાતા પ્રોફેશનલ્સને પણ વિચારતા કરી દીધા છે. હાઈ સેલરી હોવા છતાં મુંબઈની મોંઘવારી આ કમાણીને કેવી રીતે ગળી જાય છે, તેની વિગતવાર પોસ્ટ હાલ ઇન્ટરનેટ પર જોરદાર ચર્ચાનો વિષય બની છે.
સમય બચાવવા માટે દર મહિને 60 હજારનું ભાડું
આ સોશિયલ મીડિયા પોસ્ટમાં બેંકરે જણાવ્યું છે કે તેનો સૌથી મોટો ખર્ચ ઘરનું ભાડું છે, જે દર મહિને 60,000 રૂપિયા છે. તેણે આ અંગે સ્પષ્ટતા કરતા લખ્યું કે, "હું મારી ઓફિસથી માત્ર 5 મિનિટના અંતરે રહું છું. ઇન્વેસ્ટમેન્ટ બેંકિંગ ક્ષેત્રમાં તમારો સમય જ તમારી સૌથી મોટી મૂડી છે. તેથી હું મુસાફરીના સમય બચાવવા માટે ભાડામાં કોઈ સમજૂતી કરવા માંગતો નથી." અઠવાડિયાના 80 કલાકથી વધુ કામ કરવાના કારણે ઓફિસની નજીક રહેવું એ લક્ઝરી નહીં પણ જરૂરિયાત છે.
ઘરકામ અને મોડી રાતના ભોજનનો ખર્ચ
વ્યસ્ત શિડ્યુલના કારણે આ બેંકર ઘરના કામો માટે સમય ફાળવી શકતો નથી, જેથી તે ઘરકામની મદદ (મેડ) માટે દર મહિને 5,000 રૂપિયા ખર્ચ કરે છે. આ ઉપરાંત, મોડી રાત્રે 11 વાગ્યા પછી ઘરે પરત ફરવાના કારણે તે રાતનું ભોજન બહારથી ઓર્ડર કરે છે, જેનો માસિક ખર્ચ આશરે 15,000 રૂપિયા થાય છે.
અન્ય મૂળભૂત માસિક ખર્ચાઓ પર એક નજર
મુસાફરી (કેબ/ટેક્સી સેવાઓ): રૂ. 10,000 (ટ્રાફિક અને પાર્કિંગની ઝંઝટથી બચવા પોતાની કાર નથી રાખતા)
કરિયાણું અને વીજળી બિલ: રૂ. 12,000 (તેમના મતે મુંબઈનું વીજળી બિલ માણસને જમીન પર લાવી દે છે)
સોશિયલ લાઈફ અને મિત્રો સાથે આઉટિંગ: રૂ. 10,000
દિલ્હીમાં પરિવારને મળવા માટે ફ્લાઇટ ટિકિટ: રૂ. 12,000
આ તમામ પ્રાથમિક ખર્ચાઓનો સરવાળો કરવામાં આવે તો દર મહિને આંકડો 1.3 લાખ રૂપિયા પર પહોંચી જાય છે.
"મુંબઈ કમાણી છૂપી રીતે પાછી ખેંચી લે છે"
આ આખી પોસ્ટમાં સૌથી ચોંકાવનારી બાબત એ છે કે આ 1.3 લાખ રૂપિયાના તોતિંગ બજેટમાં વેકેશન, લોનનો EMI કે કોઈ મોટો વૈભવી ખર્ચ સામેલ નથી. બેંકરે દિલ્હી અને મુંબઈની સરખામણી કરતા અંતમાં લખ્યું કે, મુંબઈમાં સમાન જીવનશૈલી જીવવા માટે દિલ્હી કરતા 1.5 ગણો વધુ ખર્ચ થાય છે. ઇન્વેસ્ટમેન્ટ બેંકિંગ ક્ષેત્ર ખૂબ સારો પગાર આપે છે, પરંતુ મુંબઈ તે પૈસા એટલી જ ચુપકીદીથી તમારી પાસેથી પાછા છીનવી લે છે.
આ પણ વાંચો:Xi Jinping: 7 વર્ષ પછી ચીની રાષ્ટ્રપતિ શી જિનપિંગ ઉત્તર કોરિયાના પ્રવાસે, અમેરિકા ચિંતામાં
