ભારતીય શેરબજાર માટે વિદેશી રોકાણકારોને લઈને સારા સમાચાર સામે આવ્યા છે. વિદેશી પોર્ટફોલિયો રોકાણકારો (FPI) ઓગસ્ટમાં સતત બીજા મહિને ભારતીય શેરબજારમાં નેટ ખરીદદાર રહ્યા છે. ઓગસ્ટ દરમિયાન FPIએ ભારતીય શેરોમાં ₹30,919 કરોડનું નેટ રોકાણ કર્યું છે. આ પહેલા જુલાઈમાં પણ વિદેશી રોકાણકારોએ આશરે ₹20,200 કરોડનું રોકાણ કર્યું હતું. સતત બે મહિના વિદેશી રોકાણ વધતાં ભારતીય શેરબજાર પ્રત્યે તેમનો વિશ્વાસ ધીમે-ધીમે પરત ફરી રહ્યો હોવાના સંકેતો મળી રહ્યા છે.
વિદેશી રોકાણકારોએ માર્ચ મહિનામાં 1.17 લાખ કરોડની વેચવાલી કરી
આ ફેરફાર એટલા માટે પણ મહત્વપૂર્ણ છે કે માર્ચથી જૂન દરમિયાન FPI સતત ચાર મહિના ભારતીય બજારમાંથી નાણાં પાછા ખેંચી રહ્યા હતા. માત્ર માર્ચ મહિનામાં જ વિદેશી રોકાણકારોએ આશરે ₹1.17 લાખ કરોડની નેટ વેચવાલી કરી હતી.
ભારતમાં FPIના વધતા રોકાણ પાછળ અનેક કારણો છે. તેમાં ભારતીય રૂપિયાની સ્થિરતા, સ્થાનિક કંપનીઓની કમાણીમાં સુધારો અને વૈશ્વિક રોકાણના બદલાતા વલણનો સમાવેશ થાય છે. આ ઉપરાંત વૈશ્વિક રોકાણકારો આર્ટિફિશિયલ ઈન્ટેલિજન્સ અને સેમિકન્ડક્ટર જેવા ક્ષેત્રોમાંથી કેટલીક મૂડી અન્ય બજારો તરફ વાળી રહ્યા છે, જેનો લાભ ભારતને મળી શકે છે.
અર્થવ્યવસ્થામાં મોટા ઘટાડાની ચિંતા પણ ઓછી થઈ
અમેરિકન ફેડરલ રિઝર્વ દ્વારા વ્યાજદરમાં ઘટાડાની આશા અને ભારતીય અર્થવ્યવસ્થાની મજબૂતીથી પણ રોકાણકારોનો વિશ્વાસ વધ્યો છે. જૂન ક્વાર્ટરમાં ભારતીય કંપનીઓના પરિણામોમાં સુધારો જોવા મળતાં અર્થવ્યવસ્થામાં મોટા ઘટાડાની ચિંતા પણ ઓછી થઈ છે. જોકે, 2026માં અત્યાર સુધી FPIએ ભારતીય શેરબજારમાંથી ₹2.23 લાખ કરોડ ઉપાડ્યા છે, જે 2025ના સમગ્ર વર્ષમાં ઉપાડવામાં આવેલી ₹1.66 લાખ કરોડની રકમ કરતાં વધુ છે. આગળ જતાં મધ્યપૂર્વનો તણાવ, ક્રૂડ ઓઈલના ભાવ, અમેરિકન બોન્ડ યીલ્ડ, ફેડની બેઠક, GDP વૃદ્ધિ અને મોંઘવારીના આંકડા બજારની દિશા નક્કી કરવામાં મહત્વની ભૂમિકા ભજવશે.
આ પણ વાંચો : Business News : રિલાયન્સ-HDFC બેન્ક સહિત 7 દિગ્ગજ કંપનીઓને નુકસાન, TCSને થયો ફાયદો
ડિસ્કલેમર: શેરબજારમાં કે મ્યુચ્યુઅલ ફંડમાં રોકાણ કરતા પહેલા તમારા ફાઈનાન્શિયલ એડવાઈઝરની સલાહ અવશ્ય લો.
